Estudante no profesora iha Canossa, marka prezensa iha loron dahuluk aula prezensiál, segunda (20/09). Imajen TATOLI/António Gonçalves.

OÉ-CUSSE, 07 outubru 2021 (TATOLI)—Sekretáriu Rejionál Asuntu Saúde, Manuel da Costa, informa dadus provizóriu iha Servisu Saúde Rejionál simu hosi Servisu Edukasaun RAEOA rejista estudante idade 12 to’o 17 hamutuk rihun 11 mak preparadu atu simu vasina Pfizer da doze dahuluk.

Notísia Relevante: Vasina Pfizer implementa ba alunu 50.000 idade 12 to’o 17

“Governu liuhosi Ministériu Saúde sei halo vasina ba labarik sira ho idade 12 to’o 17 ho vasina Pfizer. Daudaun ne’e, Servisu Saúde RAEOA esforsu halo koordenasaun no provizóriu simu ona dadus hosi Sekretária Edukasaun Solidariedade Sosiál no Inkluzaun, hamutuk labarik rihun 11 preparadu atu simu vasina doze dahuluk,” Manuel da Costa informa ba Agência Tatoli iha Sikluli, Oé-Cusse, kinta ne’e.

Nia hateten, Servisu Saúde Rejionál halo ona koordenasaun no hato’o ona pedidu ba Sekretária Edukasaun Solidariedade Sosiál no Inkluzaun, atu kontinua distribui formatu ba eskola sira, nune’e bele fornese dadus ho loloos.

Estratéjia ne’ebé uza atu motiva estudante sira atu simu vasina Pfizer ne’e, sei hala’o uluk sensibilizasaun ba eskola sira hotu iha teritoriu Oé-Cusse, ho nune’e estudante sira bele komprende importante hosi vasinasaun ne’e ho nia vantajen sira. 

Notísia Relevante: Governu deside sosa vasina Pfizer ba sidadaun idade 12 to’o 17

Órariu atu halo lansamentu ba vasina Pfizer ba estudante sira ne’e seidauk termina, tanba sei hein dadus kompletu mak foin anunsia ba loron vasinasaun.

Nia informa, ekipa vasinasaun sira iha RAEOA, daudaun ne’e hala’o hela formasaun iha servisu sentrál.

Antes ne’e, Diretór EBC Passabe, Gaspar da Cruz hato’o preokupasaun katak estudante barak mak seidauk koopera ho servisu saúde atu simu vasina no hakbesik-an ba iha eskola tanba sei trauma no lakoi simu vasina, maibé nia espera ekipa Servisu Saúde Rejionál bele halo sensibilizasaun ba inan-aman no estudante sira iha terrenu.

Entretantu, Diretór Edukasaun RAEOA, Daniel Mauno, hateten parte Servisu Edukasaun Rejionál mós forma ona ekipa hodi tun ba baze hamutuk ho servisu saúde rejionál hodi hala’o sensibilizasaun no apela ba estudante sira iha obrigasaun atu simu vasina, nune’e bele prevene-an hosi moras COVID-19.

Notísia Relevante: Instalasaun zelera malirin ba vasina Pfizer tama ona inspesaun ikus

Jornalista : Abílio Elo Nini

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here