Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/07). Imajen TATOLI/Egas Cristóvão

DILI, 14 jullu 2021 (TATOLI)–Governu liuhosi Konsellu Ministru (KM), iha kuarta ne’e, aprova projetu deliberasaun ida atu sosa vasina prevensaun COVID-19 ho marka Pfizer ba sidadaun ho idade 18 ba kraik.

“Hodi garante vasinasaun ba populasaun tomak, liuliu ba foinsae ho idade hosi idade 12 to’o 17, Konsellu Ministru orienta ona Ministériu Saúde (MS) hodi hahú halo prosesu akizisaun vasina Pfizer, hodi garante kondisaun no ekipamentu sira ne’ebé presiza ba armazenamentu no transporte,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: TL hetan ona doasaun vasina COVID-19 doze 404.800

Tanba ne’e, iha reuniaun KM orienta ministériu hotu no instituisaun relevante hanesan Servisu Autónomu Medikamentu no Ekipamentu Saúde (SAMES) atubele esforsu hodi koordena ho parseiru dezenvolvimentu sira hodi hetan vasina ne’e ho sistema korrente malirin.

“Naturalmente ida-ne’e asuntu hanesan asuntu ne’ebé kabe ba kompeténsia ministériu, ne’ebé MS halo esforsu lubuk ona ho parseiru sira atu vasina ne’e bele mai tan iha ita-nia rain ho sistema apropriadu ba Pfizer ne’e bele prontu,” Portavoz Governu akresenta.

Tuir Ministru, vasina ne’ebé konsidera iha reputasaun di’ak liu ba foin-sa’e sira pur enkuantu iha mundu mak Pfizer.

“Di’ak ba joven sira no efikásia hasoru variante COVID-19 nian,” nia subliña.

Kona-ba orsamentu ba sosa vasina refere no ninia kuantidade, Governu sei haree posibilidade no sei halo prosesu aprovizionamentu ho kompeténsia hosi MS, SAMES, hamutuk ho pareseiru dezenvolvimentu.

Dadaun ne’e, Timor-Leste utiliza vasina ho tipu rua, hanesan AstraZeneca no Sinovac.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here