Diretór Ezekutivu SAMES, Santana Martins. Imajen Tatoli/Francisco Sony

DILI, 04 outubru 2021 (TATOLI)—Diretór Servisu Autonómu Medikamentu no Ekipamentus Saúde (SAMES), Santana Martins inform,a  SAMES  halo ona prosesu instalasaun ba zelera malirin no teste  ba vasina Pfizer   ne’ebé mak atu mai iha tempu-badak.

‘’Ita-nia preparasaun atu simu vasina Pfizer oras ne’e daudaun  SAMES  halo ona  prosesu instalasaun no teste hahú semana ida resin entaun  ita  haree temperatura  di’ak  no ohin ami halo inspesun ikus  nune’e ami  bele relata hikas  ba iha  UNICEF katak ita-nia situasaun  estabilidade temperatura ne’e  bele di’ak ona ka seidauk,’’ Diretór SAMES, Santana Martins ba jornalista sira iha nia kna’ar fatin Kampu Alor, ohin.

Ezekutivu ne’e dehan, aban SAMES sei organiza fila fali treinamentu ba armazenamentu ba kontrolu iha zelera Pfizer nian tanba  treinamentu ne’e sei liuhusi zoom meeting  hamutuk ho ekipa tékniku sira husi UNICEF nian.

“Nune’e ita hanoin katak se  bazeia ba asesment (avaliasaun) ne’ebé mak halo depois  define katak zelera   ita bele utiliza ona ami hanoin  Governu   bele foti ona desizaun atu bele lori ona vasina  Pfizer ne’e mai  iha rai-laran. Ne’ebé,  intermu preparasaun husi SAMES nian ami hanoin katak prontu ona,” Diretór SAMES, Santana Martins garante.

Pesoál ne’ebé mak atu tuir treinamentu ba armazenementu ba kontrolu zelera prizer hamutuk na’in neen.

Notísia relevante:Vasina Pfizer implementa ba alunu 50.000 idade 12 to’o 17

Jornalista : Felicidade Ximenes

Editór : Rafy Belo

PUBLISIDADEiklan