Aula prezensiál iha Ensinu Báziku Canossa, hafoin MEJD fó sai sirkular hodi reativa fali aula prezensiál iha Dili, segunda (20/09). Imajen TATOLI/António Gonçalves

DILI, 22 setembru 2021 (TATOLI)—Komisaun interministeriál ba elaborasaun no koordenasaun ezekusaun planu vasina kontra COVID-19 halo aprezentasaun iha reuniaun Konsellu Ministru (KM) kona-ba mekanizmu implementasaun vasina Pfizer.

Komisaun ne’e lidera hosi Vise-Primeiru-Ministru no Ministra Solidariedade Sosiál no Inkluzaun, Armanda Berta dos Santos, ne’ebé kompostu hosi Ministra Saúde, Odete Maria Freitas Belo, inklui ministériu relevante sira.

Ministru Prezidénsia Konsellu Ministru, Fidelis Manuel Leite Magalhães, haktuir, bazeia ba aprezentasaun ne’e, tuir planu vasinasaun ne’e sei realiza iha eskola sira no ba alunu foin-sa’e 50.000 sira hosi 6 0 to’o 110 ano , hosi  munisípiu pre-selesionadu ne’ebé maka sei simu vasina ba dahuluk.

“Responsável sira hosi elaborasaun no koordenasaun ezekusaun planu nasionál ne’e, permite vasinasaun ba foin-sa’e sira ho idade hosi 12 to’o 17,” Ministru relata hafoin reuniaun ezekutivu iha Palásiu Governu, kuarta ne’e.

Notísia relevante: TL sei simu doasaun vasina Pfizer doze 100.620

Aleinde ne’e, mekanizmu COVAX konfirma ona atu disponibiliza haruka doze 100.620, ne’ebé sei to’o iha Dili iha tempu badak nia laran.

Iha faze daruak, sei vasina alunu sira seluk no ba foin-sa’e sira ne’ebé la rejista iha eskola sira.

Define mós katak, doze daruak hosi vasina ne’e sei administra ho intervalu loron 21.

“Preparasaun ba kondisaun nesesária armazenamentu vasina nian, sei realiza iha SAMES ho apoiu tékniku no finanseiru UNICEF nian, ne’ebé prepara ona prosedimentu operasionál ba armazenamentu, transporte, jestaun no aplikasaun vasina no sei asegura ho apoiu tékniku hosi Organizasaun Mundiál Saúde.

Vasina Pfizer kontra COVID-19 iha efikásia 95% kontra infesaun sintomátika SARS-CoV-2 nian.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here