Vise Xefe Bankada Parlamentár PLP, Francisco de Vasconcelos. Imajen/ Egas Cristovao..

DILI, 29 setembru 2021 (TATOLI)–Komisaun A ne’ebé trata asuntu Konstitusionál no Justisa sei diskute alterasaun ba lei pensaun vitalísia (LPV) iha tinan 2022.

Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”

Vise-Prezidente Komisaun A, Deputadu Francisco de Vasconcelos, hateten proposta-lei barak tebes ne’ebé komisaun seidauk finaliza.

“Agora, kona-bá Lei Pensaun Vitalísia ne’e, Prezidente Komisaun A orienta ona katak tinan oin mak foin diskute,” Vise-Prezidente Komisaun A ne’e informa ba jornalista sira, iha uma fukun, kuarta ne’e.

Nia rekoñese proposta alterasaun ne’e parte ezekutivu hatama ba uma fukun kleur ona maibé tanba proposta sira seluk barak entaun alterasaun ba LPV ne’e seidauk ajenda.

“Agora ita boot sira hatene, orsamentu 2022 mós atu tama ona entaun lei sira-ne’ebé suspende hela ne’e bankada parlamentár sira sei konsensu inklui proposta alterasaun ba lei pensaun vitalísia ne’e sei diskute iha tinan oin,” Deputadu Bankada Partidu Libertasaun Populár ne’e hateten.

Tuir nia, Komisaun A halo hela diskusaun ba proposta-lei sira seluk mak hanesan estatutu Konsellu Superiór Majistratura Judisiáriu nian, lei organizasaun judisiáriu no estatutu Ministériu Públiku.

“Kona-bá proposta alterasaun ba LPV ne’e, parlamentu sei diskute iha tinan oin (2022),” Vise-Prezidente Komisaun A ne’e informa.

Notísia Relevante: KM Aprova Proposta Alterasaun Lei Pensaun Vitalísia

PLP: alterasaun Lei Pensaun Vitalísia aposta ba rejime jurídiku seguransa sosiál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here