Deputada hosi bankada PLP, Maria Angelina Sarmento. Imajen Egas Cristovão

DILI, 17 juñu 2021 (TATOLI)—Partidu Libertasaun Populár (PLP) nia pozisaun ba alterasaun Lei Pensaun Vitalísia (LPV) tenke aposta ba rejime jurídiku seguransa sosiál, nune’e justa ba ema hotu.

Deputada Bankada Partidu Libertasaun Popular (PLP), Maria Angelina Lopes Sarmento, fó-sai katak Governu aprezenta ba uma fukun dezde 2020 liubá no oras ne’e tama ona iha Komisaun A.

Notísia Relevante: Governu konsidera PN mak iha kompeténsia altera lei pensaun vitalísia

“Ha’u hanoin dezde inísiu kedas Bankada PLP ka Partidu PLP rasik ninia pozisaun mak aposta ba lei rejime jurídiku seguransa sosiál. Tanba rejime jurídiku ba seguransa sosiál mak rejime ne’ebé mak bankada nia haree justu liu atu aplika iha rai laran no labele hamosu diskriminasaun sosiál klase iha iha ita-nia rain,” Deputada Bankada PLP ne’e informa ba jornalista sira, iha uma fukun, kinta ne’e.

Hosi hosi rejime jurídiku seguransa sosiál ema kontribui uluk tiha mak aban bainrua reklama nia direitu, maibé agora ida pensaun vitalísia ne’e ninia direitu agora nia simu hela maibé aban-bainrua nia sei simu nafatin direitu ida-ne’e.

“Nia ferik no katuas ona, nia la tama ona titulár órgaun soberanu, maibé direitu ne’e nia goza nafatin. Ne’e injustisa tuir PLP ninia politika. Maibé rejime jurídika seguransa sosiál ne’e ko’a saláriu kontribui depois aban-bainrua idade ona tinan 60 ka tama ona idade reforma, ita foti fali buat ne’ebé mak ita konstribui ona,” Vise-Prezidente Parlamentu Nasionál ne’e fundamenta.

Nia haree katak, proposta-alterasaun ne’ebé Governu aprezenta obriga ema hotu kontribui ba seguransa sosiál, nune’e ema hotu iha rai ida-ne’e kontribui hanesan.

“Talves ita ko’a hela, ita-nia seidauk hetan nia benefisiu, ita sente lakon, maibé kuandu ita tama ona idade reforma mak ita simu pensaun hosi seguransa sosiál hodi sustenta ita-nia vida. Iha-ne’ebá mak foin ita konsiente katak afinál buat ne’e fó benefisiu ba ha’u iha tempu ida agora. Ba ami justu liu no la hamosu diskriminasaun ba klase sosiál iha Timor-leste,” nia dehan.

Hatán ba preokupasaun ne’e, Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos “Boraluli”, fundamenta proposta-alterasaun ne’e la influénsia Estadu nia moris maibé ba interese grupu kiik-oan ida.

“Orden konstituisaun ita fó ka ita la fó, maibé prosesu diskusaun la’o hela. Termu pensaun vitalísia laiha ona maibé agora ne’e rejime kontributivu. Maibé presiza regra ida hosi ministériu kompetente tenke garante katak rejime ein-vigór labele prezudika ema-nia direitu. Ida-ne’e mak ita sei estuda tanba buat hotu la’ós fásil katak ita fó ka ita la fó ba rejime ne’e,” nia argumenta.

Prezidente Komisaun A ne’e afirma, labele halo lei atu kumprw de’it kompromisu eleitorál, tanba atu konduz lei ida atu ba rezolve problema ida no labele fó projuizu ba sidadaun nia direitu, problema nia hún mak ida-ne’e.

“Ha’u la halo lei atu halo kontente ema balun. Ha’u la halo  lei atu halo kontente sosiedade sivíl. Ha’u la halo lei atu halo kontente ba grupu ida-ne’ebé mak la gosta Governu. Ha’u halo lei atu rezolve problema,” Deputadu Bankada FRETILIN ne’e subliña.

Nia dehan, problema nia hún mak atu tranzita ema-nia direitu hosi lei ida ba lei foun ne’e, la’ós fasil.

“Ita tenke estuda didi’ak, rejime ida ba rejime seluk ne’e, tenke haree didi’ak transzisaun ne’e bele prezudika ka la prezudika ema-nia direitu. Tanba, ne’e orden konstitusionál,” nia fundamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here