Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 28 jullu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, promete sei la budu proposta-alterasaun ba Lei Pensaun Vitalísia (LPV) maibé desizaun ba aprovasaun depende ba plenária.

Notísia Relevante:  Proposta alterasaun ba lei pensaun vitalísia suspende maibé prosesu la’o hela

“Lei pensaun vitalísia mós iha ona Komisaun A maibé oras ne’e Komisaun A sei fó prioridade ba lei sira seluk depois mak sei trata. Iha ha’u-nia mandatu ka iha ha’u-nia prezidénsia, ha’u sei la budu ka rai hela lei iha-ne’e,” Aniceto Guterres informa ba jornalista sira, iha varanda prinsipál Parlamentu Nasionál, kuarta ne’e.

Prezidente Parlamentu Nasionál ne’e hateten, bainhira tama ona ba diskusaun no deputadu sira konkorda entaun aprova, se la konkorda reaprova.

Oras ne’e, Komisaun A ne’ebé trata asuntu Konstitusionál no Justisa diskute hela pakote lejislativa lubuk ida no Komisaun C (Finansa Públika) diskute hela proposta Lei Enkuadramentu Orsamentál.

Pakote lejizlativa lima ne’e kompostu projetu-lei númeru 19/V(3a) kona-ba Organizasaun Judisiária, proposta-lei númeru 28/V(3a) kona-ba Organizasaun no Funsionamentu Tribunál sira (aprova ona iha espesialidade), proposta-lei númeru númeru 24/V(3a) kona-ba Estatutu Ministériu Públiku no projetu-lei númeru 21/V(3a) kona-ba Estatutu Majistradu Judisiál.

Purtantu iha loron 04 maiu liubá, Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos ‘Boraluli’ suspende hela proposta-alterasaun ba lei estatutu remuneratóriu ba titulár kargu polítiku tanba atu entrega ba seguransa sosiál la’ós fásil.

Prezidente Komisaun A, Deputadu Joaquim dos Santos, esplika baibain ema bolu pensaun vitalísia maibé loloos ne’e mak estatutu remuneratóriu ba titulár kargu polítiku sira.

Notísia Relevante: PLP: alterasaun Lei Pensaun Vitalísia aposta ba rejime jurídiku seguransa sosiál

“Proposta-alterasaun ne’e mai diskute tiha ona no iha hela ajenda maibé Governu tenke aprezenta fali regra aplikasaun katak lei ne’e tama ein-vigór labele prejudika benefisiáriu sira-nia direitu. Governu tenke prepara kondisaun. Ita bele aprova proposta-alterasaun maibé Governu laiha kapasidade karik entaun ami (lejizladór) mak sala. La kusta buat ida, ita aprova maibé Governu tenke prepara kondisaun,” Prezidente Komisaun A ne’e informa ba jornalista sira.

Prezidente Komisuan A ne’e husu ona ba Governu aprezenta regra sira kona-ba aplikasaun kuandu entrada ein-vigór, maibé to’o agora Governu seidauk haruka ba uma fukun.

“Ne’ebé ami hein hela sira-nia resposta ne’e. Ami deskute tiha ona maibé ami seidauk halo relatóriu no paresér tanba hein hela resposta Governu nian,” nia dehan.

Kualkér proposta-alterasaun labele fó prejuizu ba lei ne’ebé vigora tiha ona direitu ema-nian, atu funsaun públiku ka atu kargu polítiku tanba dever ne’e regula iha lei, titulár sira regula ho lei ketak.

“Kuandu ita halo lei ida fó fali prejuizu ba direitu sidadaun ninian entaun lei ne’e serve tanba ne’e mak sei tetu didi’ak. Tanba atu halo transferénsia ne’e, la’ós fásil. Ita aprova lei ida hodi halo transferénsia ba ema-nia direitu ba sistema foun la prejudika ema-nia direitu di’ak. Se prejudika ema-nia direitu entaun lei ne’e la serve,” nia akresenta.

Nia hatutan, titulár sira-ne’e la’ós funsionáriu públiku, sira iha rejistu ba esperiénsia ne’e tanba titulár sira mai dala-ida no ba dala-ida.

“Sorte di’ak mai fali, sorte ladi’ak la mai ona. Oinsá atu integra ida-ne’e ba seguransa sosiál. Ami iha problema boot ba ida-ne’e. Se fó tenke iha regra aplikasaun tanba nia hetan konfiansa hosi povu, nia mai hosi dosente ka nia mai hosi agrikultór maibé Konstituisaun mak hakarak atribui direitu ne’e, entaun nia merese atu hetan. Se lei la fó entaun ita labele obriga,” Prezidente Komisaun A ne’e hateten.

Notísia Relevante: Komisaun A suspende proposta-alterasaun ba lei pensaun vitalísia

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here