Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Kuarta (19/02/2020). Imajen/TATOLI Egas Cristovao.

DILI, 19 fevereiru 2020 (TATOLI)–Konsellu Ministru (KM) liuhusi reuniaun kuarta ne’e, aprova ona proposta ba alterasaun dahuluk lei ba eis titulár sira, ne’ebé define kona-ba Pensaun Vitalísia.

Proposta ne’e prevee oinsá mak atu ajusta Rejime Pensaun Vitalísia ba Rejime Seguransa Sosiál, ne’ebé sei la elimina direitu ba ema ruma, liuliu ba órgaun titulár sira.

Diploma ne’e aprezenta hosi Ministru Reforma Lejizlativa no Asuntu Parlamentár, Fidelis Manuel Leite Magalhães.

“Proposta ne’ebé aprezenta no hetan ona aprovasaun maka Rejime Jurídiku Seguransa Sosiál ba eis titulár iha órgaun soberania sira ka alterasaun ba Pensaun Vitalísia. Órgaun Soberania sira iha kondisaun igualdade, valorizadu ba karreira kontributiva titulár”, informa Ministru Fidelis hafoin reuniaun ezekutivu iha Palásiu Governu.

Notísia Relevante: Governu Planeia Reforma Lei Pensaun Vitalisia

Hafoin hetan aprovasauniha KM, Governu sei lori proposta ne’e ba Parlamentu Nasionál (PN) atubele diskute.

Biban ne’e, husi Ministériu Reforma Lejizlativa no Asuntu Parlamentár (MRLAP) aprezenta mós Proposta Lei kona-ba Baze Jéral husi Organizasaun Administrasaun Públika.

“Objetivu husi intervensaun lejizlativa ne’e hanesan atu prenxe lakuna konstitusionál iha matéria organizasaun administrativa nian, nune’e bele fornese mós administrasaun públika hotu iha baze jerál no ba nia atuasaun rasik”, subliña Fidelis.

Alterasaun Dahuluk Redús Persentajen Pensaun ba eis titulár

Iha loron 25 abríl 2017, Eis-prezidente Repúblika (PR) no atuál Primeiru-Ministru (PM), Taur Matan Ruak promulga diploma alterasaun dahuluk Pensaun Vitalísia ba eis deputadu no eis titulár husi kargu públiku sira, maibé nafatin fó kontestasaun liuhosi mensajen ba lei ne’e rasik.

Iha mensajen ne’e, PR hateten katak kontinua diskorda ho ezisténsia lei ne’ebé fó benifísiu ba eis-titulár sira, no afirma katak sei la uza pensaun ne’e bainhira nia mandatu ramata nu’udar PR.

Nia subliña katak pensaun ne’e hanesan previléjiu ezesionál ne’ebé laiha justifikasaun, ba klase polítika, enkuantu sidadaun sira sei dook husi moris no ai-han di’ak, sofre mal nutrisaun no limitasaun asesu ba bee-moos.

Alterasaun Proposta Lei Pensaun Vitalísia aprovadu iha Parlamentu Nasionál iha janeiru 2017, ho votu a-favór 42, kontra 5 no abstensaun 5.

Proposta Lei ne’e konsege hamenus husi pursentu 100 ba pursentu 60 husi vensimentu ba deputadu no eis titulár sira ne’ebé ezerse kargu ho efetividade funsaun durante tinan lima tuir malu ka interpoladu.

Nune’e mós, hamenus husi pursentu 100 ba pursentu 75 husi vensimentu ba deputadu no eis-titulár sira ne’ebé ezerse kargu ho efetividade funsaun durante tinan sanulu tuir malu ka interpoladu, enkuantu hamenus pursentu 90 ba deputadu sira ezerse ona kargu durante tinan 15 tuir malu.

Pensaun sei mantein pursentu 100 ba Prezidente Repúblika, pursentu 90 ba Prezidente Parlamentu Nasionál, Primeiru-Ministru no Prezidente Tribunál Rekursu.

Pagamentu ba pensaun ne’e sei akontese bainhira deputadu no eis-titulár sira kompleta ona tinan 50 no ramata ona ninia mandatu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here