Vise Prezidente Parlamentu Nasionál, Maria Angelina Lopes Sarmento. Imajen/Tatoli Egas Cristovao

DILI, 08 setembru 2021 (TATOLI)–Prezidente Parlamentu Nasionál Ein-Ezersísiu, Deputada Maria Angelina Lopes Sarmento, informa loron 14 setembru nu’udar loron ikus resesu ba deputadu sira tanba 15 setembru sesaun lejizlativa foun.

Notísia Relevante: PN konstitui ona Komisaun Permanente durante períodu resesu

“Loron 14 setembru 2021 loron ikus ba períodu resesu deputadu sira nian. Nune’e iha loron 15 setembru sei komesa nova sesaun lejizlativa,” Deputada Maria Angelina Lopes Sarmento, informa ba jornalista sira, iha uma fukun, kuarta ne’e.

Sesaun lejizlativa foun ne’e sei realiza iha kaurta-feira maibé presiza konvokatóriu líder bankada sira atubele aprova ajendamentu ba retoma prosesu sesaun lejizlativa ne’ebé sei hahú fali iha 15 setembru.

“Kona-ba prezensa Prezidente Repúblika retoma nova sesaun lejizlativa, talves ami sei halo koordensaun hela ho Prezidente Repúblika. Ita hein to’o viajen Prezidente Parlamentu Nasionál mai mak sei haree ajendamentu ba ida-ne’e,” nia dehan.

Nia dehan, oráriu normál plenaria nian iha loron segundu no tersa, maibé tanba 15 setembru ne’e monu iha loron kuarta-feira entaun plenária extraordinária.

Iha terseira sesaun lejizlativa ne’e iha lei lubuk ida mak Parlamentu Nasionál aprova ona mak hanesan Lei Medida Prevensaun no Kombate Korrupsaun (MPCC-sigla portugés), alterasaun lei resensiamentu eleitorál, lei eleitorál ba Prezidente Repúblika no lei autorizasaun ba deklarasaun estadu emerjénsia nian, nune’e mós altera lei defeza nasionál, altera lei migrasaun no azilu, lei protesaun sivíl no lei sira seluk.

Proposta-lei balun ne’ebé seidauk aprova mak hanesan lei enkuadramentu orsamental, lei funsionamentu órgaun judisiál, lei poder lokal no eleisaun munisipál nomós lei sira seluk tán.

Tuir Konstituisaun RDTL Artigu 99 (Lejizlatura), númeru 1 hateten lejizlatura komprende sesaun lejizlativu lima no sesaun lejizlativu ida-idak iha durasaun tinan ida-nian.

Númeru 2 hosi artigu 99 ne’e hateten, períodu normál funsionamentu Parlamentu Nasionál, Rejimentu mak define.

Nune’e Rejimentu Parlamentu Nasionál artigu 45 (Sesaun lejizlativa) númeru 1 hateten, sesaun lejizlativa dura tinan ida, hahú iha 15 setembru no remata iha 14 setembru iha tinan tuir mai.

Númeru 2 hosi artigu 45 ne’e hatutan, períodu normál funsionamentu Parlamentu Nasionál nian hahú iha 15 setembru no remata iha 15 jullu, sein prejuízu ba períodu suspensaun iha Natal entre 23 dezembru no 2 janeiru tinan tuir mai, no suspensaun seluk-seluk ne’ebé Parlamentu delibera liuhosi maioria dois terços hosi Deputadu eleitu sira.

Notísia Relevante: Antes resesu, PN fó prioridade ba pakote lei eleitorál

Aban, PN hahú resesu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here