Parlamentu Nasionál. Imajen Tatoli/Antonio Goncalves

DILI, 30 jullu 2020 (TATOLI)—Reprezentante Povu iha Uma Fukun Parlamentu Nasionál (PN), aban, hahú resesu no sei termina iha 14 setembru 2020.

Notísia Relevante: PN Aprova Prorrogasaun Períodu Funsionamentu To’o 30 Jullu

Vise-Sekretáriu Meza Parlamentu Nasionál, Deputadu António Nobre Tilman, promete sei aproveita resesu ne’e hodi rekolla povu nia preokupasaun hodi hato’o ba ezekutivu sira.

“Uza tempu resesu ne’e atu hodi halo kontaktu eleitorál, ida-ne’e mak atividade prinsipál ne’ebé sei hala’o. Durante resesu ne’e mós sei ba konsolida ita-nia militante sira, rona sira-nia preokupasaun no partilla mós informasaun parlamentu nian ba sira,” Deputadu António Nobre Tilman informa ba Agência TATOLI, iha resintu Parlamentu Nasionál, kinta ne’e.

Nia dehan, bainhira tama fali serbisu iha 15 setembru sei hato’o preokupasaun ne’ebé povu enfrenta iha terrenu.

Entretantu, Deputadu Bankada CNRT, Adérito Hugo da Costa, promete sei uza tempu resesu ne’e hodi halo kontaktu eleitorál nune’e bele hatene preokupasaun povu nian.

“Iha resesu, ha’u pesoál ajenda barak hodi halo kontaktu eleitorál ho ha’u-nia eleitór sira iha baze tanba ha’u eleitu hosi povu entaun aproveita resesu ne’e hodi hamutuk ho povu,” hateten Deputadu Bankada CNRT, Adérito Hugo da Costa.

Nune’e mós Deputadu Bankada FRETILIN, David Dias Ximenes “Mandati” dehan, resesu ne’e direitu deputadu sira tanba durante tinan-rua la resesu.

“Ita hatene katak resesu ne’e atu halo kontaktu ho eleitór sira tanba durante tinan-rua la halo ida-ne’e”, dehan Mandati.

Iha loron 13 fulan jullu 2020 liubá, Parlamentu Nasionál aprova prorrogasaun períodu funsionamentu Parlamentu Nasionál nian to’o de’it 30 jullu ho rezultadu votasaun a-favór 51, kontra 0 no abstensaun 2. Entretantu Deputadu sira sei tama fali iha loron 15 setembru 2020.

Antes ne’e, Deputadu Bankada FRETILIN, Joaquim dos Santos, konsidera ajenda prorrogasaun ne’e pertinente tanba iha sesaun plenária hamutuk haat (4) tanba lei balun urjente.

“Prezidente, ha’u só autoriza to’o de’it dia 30 jullu, liu ida-ne’e ha’u lakohi tanba tinan rua (2) ita la resesu,” hateten Deputadu Joaquim dos Santos.

Iha biban hanesan, Purtantu Deputada Bankada CNRT, Carmelita Caetano Moniz, salienta deputadu sira presiza duni deskansa.

“Hanesan Prezidente Komisaun A, Deputadu Joaquim dos Santos dehan, liuhosi dia 30 ne’e fó oituan tempu deskansa,” informa Deputada Bankada CNRT ne’e.

Tuir Rejimentu Parlamentu Nasionál (RPN) artigu 45 (Sesaun Lejizlativa), alínea 2, períodu normál funsionamentu Parlamentu Nasionál nian hahú iha 15 setembru no remata iha 15 jullu, sein prejuízu ba períodu suspensun iha Natál entre 23 dezembru no 2 janeiru tinan tuir mai, no suspensaun seluk-seluk ne’ebé Parlamentu delibera liuhosi maioria dois terços hosi Deputadu eleitu sira

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here