Prezeidente Parlamentu Nasionál, Aniceto Longuinhos Guteres Lopez. Imajen TATOLI /Egas Cristóvão.

DILI, 08 juñu 2021 (TATOLI)—Prezidente Parlamentu Nasionál, Aniceto Longuinhos Guterres Lopes, hateten antes Parlamentu Nasionál resesu iha 15 jullu no termina iha 13 setembru, Parlamentu Nasionál fó prioridade ba lei kona-ba pakote reforma judisiáriu ho pakote lei eleitorál tolu (3) tanba eleisaun Prezidensiál besik ona.

Notísia Relevante: PN baixa proposta-alterasaun lei eleitorál PR ba Komisaun A

Aniceto Longuinhos Guterres Lopes hatutan, tanba eleisaun Prezidensiál besik ona mak Governu tenke iha preparasaun ba eleisaun sira-ne’ebé sei tuir mai no fó biban ba Governu atu prepara, entaun lejislasaun sira-ne’e tenke prontu uluk.

“Pakote reforma judisiáriu ho pakote lei eleitorál ne’e mak ami (PN) sei fó prioridade, nomós lei kona-ba enkuadramentu orsamentu jestaun finaseira. Ida-ne’e lei ne’ebé importante no prioritáriu. Tanba, iha Parlamentu Nasionál agora besik daudaun ona ba resesu ke normalmente 15 jullu to’o 15 setembru tinan ne’e,” Prezidente Parlamentu Nasionál ne’e hateten ba jornalista sira, hafoin hala’o enkontru ho ho Prezidente Repúblika, Francisco Guterres Lú Olo, iha Palásiu Prezidénsial Nicolau Lobato, Bairru Pite, Dili, tersa ne’e.

Atu trata lei barak klaru katak Parlamentu Nasionál labele halo milagre iha tempu badak ka fulan ida resin de’it, tanba lei barak mak tama ona iha Parlamentu Nasionál maibé seidauk trata.

Pakote lei eleitorál ne’ebé Parlamentu Nasionál fó prioridade antes tama resesu ne’e mak Proposta-lei alterasaun tolu (3) ne’ebé kompostu hosi alterasaun datoluk ba Lei númeru 5/2006, 28 dezembru kona-ba Órgaun Administrasaun Eleitorál, alterasaun dahuluk ba Lei númeru 6/2016, 25 maiu kona-ba Lei Resensiamentu Eleitorál no proposta-lei alterasaun daneen ba Lei 7/2006, 28 dezembru, kona-ba Lei Eleitorál ba Prezidente Repúblika.

Iha segunda (31 maiu 2021), Parlamentu Nasionál (PN) liuhosi Prezidente Parlamentu Nasionál baixa ona proposta-lei alterasaun tolu (3) ne’e ba Komisaun A ne’ebé trata asuntu Justisa no Konstitusionál ho durasaun durante loron 15 hodi halo apresiasaun inisiál.

Notísia Relevante: PN prioritiza proposta no projetu-lei hitu hakbesik justisa ba povu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here