Prezidente Parlamentu Nasionál, Aniceto Guterres. Imajen Tatoli /Egas Cristóvão.

DILI, 13 jullu 2021 (TATOLI)—Parlamentu Nasionál (PN), tersa ne’e konstitui ona Komisaun Permanente (KP) hodi hala’o serbisu parlamentár durante períodu resesu tanba aban loron ikus plenária funsionamentu normál nian.

Notísia Relevante: Antes resesu, PN fó prioridade ba pakote lei eleitorál

Diskusaun no votasaun ba projetu-deliberasaun Parlamentu Nasionál númeru 1/V(3a), ne’ebé aprova segunda alterasaun deliberasaun Parlamentu Nasionál númeru 3/2018, 27 juñu, kona-ba konstituisaun Komisaun Permanente. Projetu-deliberasaun ne’e aprovadu ho rezultadu votasaun a-favór 51, kontra 0 no abstensaun 8.

“Nune’e deliberasaun konstitui Komisaun Permanente pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Reprezentante bankada parlamentár sira-ne’ebé hola-parte iha Komisaun Permanente ne’e kompostu hosi deputadu Bankada FRETILIN na’in-10, CNRT na’in-10, PLP na’in-lima (5), PD na’in-rua no KHUNTO na’in-rua, Bankada UDT ida (1) no Frente-Mudança ida(1)

“Reuniaun dahuluk Komisaun Permanente bele halo iha loron 20 jullu (tersa-feira) hodi hili Sekretária Meza ba komisaun permanente ne’e, ho asuntu seluk komisaun permanente sei trata,” Prezidente Parlamentu Nasionál haktuir.

Nia dehan, komisaun permanente mak sei deside plenária kada semana dala-ida ka semana rua dala-ida.

Entretantu, Deputadu Bankada FRETILIN, Antoninho Bianco konsidera prosesu deliberasaun deputadu hosi bankada parlamentár sira balansu tebes tanba reprezentante bankada aprlamentár iha Komisaun Permanente ne’e hotu.

“Bom traballu ba deputadu sira-ne’ebé atu serbisu iha períodu resesu ne’e,” Deputadu Bankada FRETILIN, Antoninho Bianco hateten.

Tuir Konstituisaun RDTL artigu 102 (Komisaun Permanente) hateten, Komisaun Permanente halo la’o serbisu nafatin iha períodu ne’ebé Parlamentu Nasionál para hela, iha intervalu sesaun no mós iha kazu selu-seluk previstu iha Konstituisaun.

Komisaun Permanente nia ulun-boot mak Prezidente Parlamentu Nasionál nian hamriik hosi Vise-Prezidente sira no partidu sira-nia Deputadu, tuir fahe-baluk reprezentasaun nian iha Parlamentu.

Kompete ba Komisaun Permanente mak hanesan akompaña serbisu sira Governu nian no mós administrasaun nian, koordena serbisu sira Komisaun Nasionál nian, promove konvokasaun Parlamentu Nasionál nian, prepara no organiza Parlamentu Nasionál nia sesaun sira.

Nune’e mós bele autoriza dezlokasaun Prezidente-Repúblika iha rai-laran, dirije Parlamentu Nasionál nia relasaun ho parlamentu no instituisaun análoga sira iha rai seluk no bele autoriza deklarasaun estadu serku nian no estadu emerjénsia nian.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here