Primeiru-Ministru, Taur Matan Ruak ho membru Governu relevante debate kona-ba pedidu estensaun Estadu Emerjénsia hosi Prezidente Repúblika, iha sala plenária Parlamentu Nasionál, tersa (24/08). Imajen TATOLI/Egas Cristóvão.

DILI, 24 agostu 2021 (TATOLI)—Parlamentu Nasionál (PN) tersa ne’e autoriza Prezidente Repúblika, Francisco Guterres Lú Olo, dekreta estadu emerjénsia ba dala-XVII iha territóriu nasionál tanba sei iha subsisténsia situasaun kalamidade públika.

Notísia Relevante: Prezidente Repúblika dekreta estadu emerjénsia ba dala-XVI

Durasaun hosi renovasaun deklarasaun estadu emerjénsia ba loron 30 ne’e, hahú hosi 00:00 iha loron 31 agostu 2021 (tersa-feira) no termina iha oras 23:59 iha loron 29 setembru 2021 (kinta-feira).

Renovasaun deklarasaun estadu emerjénsia ba dala-XVII ne’e autorizada hosi Parlamentu Nasionál ho rezultadu votasaun nominál a-favór 38, kontra 0 no abstensaun 16.

“Projetu-lei 32/2021 pasa. Nune’e, Parlamentu Nasionál autoriza renovasaun deklarasaun estadu emerjénsia. Signifika apoiu no kolaborasaun hosi Parlamentu Nasionál nian ba Governu nia esforsu luta hasoru COVID-19 no variante sira hotu inklui esforsu asegura no kombate krime organizadu iha área fronteira,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Razaun Prezidente Repúblika husu autorizasaun ba Parlamentu Nasionál tanba situasaun COVID-19 iha Timor Osidentál (NTT-sila indonézia) iha konfirmadu kazu infesaun 49.527 no ema na’in 1056 mak mate.

Iha Timor-Leste kazu konfirmadu hamutuk 3.264 no rejista ona ema na’in 48 mak mate ho COVID-19.

Mensajen Prezidente Repúblika Francisco Guterres ‘Lú Olo nian, propoin ba Parlamentu Nasionál atuhalo estensaun estadu emerjénsia ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun realizasaun selebrasaun relijioza.

Nune’e mós direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.

Purtantu direitu rezisténsia sira sei impede hosi autoridade públika bainhira sidadaun sira la kumpre medida ezekusaun.

To’o iha segunda (23 agostu), Timor-Leste (TL) rejista ona ema na’in-48 mak mate ho COVID-19 inklui ema na’in-17 ne’ebé mate iha semana kotuk.

Adultu na’in-14 ne’ebé mak mate durante semana kotuk, ne’e la simu vasina kompletu (ema na’in-ida simu doze vasina ida de’it) no iha TL ema-ne’ebé mak simu ona vasina kompletu laiha ida mak mate ho COVID-19.

Infensaun COVID-19 iha ema sira ne’ebé simu ona vasina no ema sira ne’ebé seidauk simu vasina Iha semana liubá, detekta kazu COVID-19 hamutuk 1,651/310 ka 19% mak simu vasina kompletu (liu tiha semana rua, depois de sira nia vasina doze segundu).

Notísia Relevante: KE-KSDS rekomenda ba PR husu PN estende tan EE

Totál ema ne’ebé la simu vasina hamutuk 1,651/ 556 ka 34%, no ema ne’ebé vasina ona hamutuk 1,651/ 287 ka 17%. Ema ne’ebé la hatene estatus vasinasaun no provavelmente  maioria ema sira ne’e seidauk simu vasina hamutuk 1,651/ 498 30%.

Iha semana kotuk, ema ne’ebé baixa iha ospitál tanba COVID-19 hamutuk 54/41 76% mak seidauk simu vasina kompara ho ema na’in 54/11 ne’ebé mak simu ona vasina kompletu.

COVID-19 nia variante Delta iha Timor-Leste Teste adisionál ba sekuénsia genome kompletu (Whole genome sequencing-WGS) ne’e realiza ona husi Institutu Doherty iha Australia, ba amostra resente hamutuk 45 hosi TL.

Teste ida-ne’e konfirma ona katak COVID-19 nia variante Delta (B.1.617.2) sai hanesan sepa/strain ne’ebé sirkula dominante iha Dili. COVID-19 nia variante Delta ne’e la identifikadu iha kazu sira hosi surtu Prizaun Gleno, maibé identifika ona hosi kazu sira seluk 88% husi Ermera.

COVID-19 nia variante Delta ne’e identifika ona iha 925 hosi kazu sira hosi Dili. COVID-19 nia sepa/strain diferente (B.1.466.2) ne’e identifika ona iha kazu rua ne’ebé teste hosi Viqueque. COVID-19 nia variante Delta ne’e mais infeksiozu liu duké variante sira seluk. Variante ne’e bele kauza moras todan no ema mate, liuliu ba ema sira ne’ebé seidauk simu vasina kompletu.

Taxa notifikasaun diária nia média (average) iha Timor-Leste, durante loron hitu liu bá (husi 16 Agostu – 22 Agostu, 2021) ne’e mak kazu 17.9 /100,000, populasaun iha kada loron, kompara ho kazu 11.2 por 100,000 populasaun ba kada loron, iha períodu relatóriu anteriór nian.

Taxa ba teste nia pozitividade durante semana kotuk, teste iha Laboratoriu HNGV no Laboratoriu Nasionál Saúde hamutuk 5,441/1,345 ka 24.7% mak pozitivu (kompara ho 17.7% iha períodu relatóriu anteriór).

Atualizasaun ba vasinasaun maizumenus vasina COVID-19 nia doze hamutuk 60.000 mak administra ona iha semana anteriór.

To’o iha 22 agostu 2021, vasina COVID-19 nia doze primeiru hamutuk 364,314 mak administra ona, iha Timor-Leste, reprezenta 48.3% hosi populasaun ne’ebé elejivel ho idade husi tinan 18 ba leten. To’o iha loron 22 fulan agostu 2021, ema hamutuk 163,933 mak simu ona sira nia doze segundu ba vasina COVID-19 nian, iha Timor-Leste, reprezenta 21.7% hosi populasaun sira ne’ebé mak elejivel ho idade tinan 18 ba leten.

Maizumenus 54% hosi ema sira ho idade tinan 18 ba leten ne’ebé hela iha Dili, simu ona sira-nia doze segundu ba vasina COVID-19 nian.

Notísia Relevante: COVID-19: óbitu ida, pozitivu 187 no ativu 3.383

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here