Pesoál aviasaun iha Aeroportu Internasionál Nicolau Lobato, Comoro tula hela aimoruk vasina AstraZeneca ne’ebé Governu Austrália oferese ho Aviaun Quantas ba karreta cool box, kinta (28/07/21). Imajen Tatoli/António Gonçalves.

DILI, 23 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 187, rekoperadu 67 no kazu ativu 3.383.

Óbitu ne’ebé relata ohin, mane ida ho idade 68, timoroan, hela iha Gleno Ermera, no iha 16 agostu  2021, diagnóstikadu Covid-19 (PCR pozitivu, CT Egene 22, N2gene 24,7), iha Gleno, Ermera, ne’ebé hahú hala’o izolamentu iha  17 agostu 2021.

Notisia relevante:COVID-19: óbitu rua, pozitivu 235 no ativu 3.264

Matebian iha mós problema hipertensaun. Hahú 17 agostu, pasiente ninia saturasaun oksijéniu la normál, no hahú hatudu sinál Sindroma Insufisiénsia Respiratória Aguda (SIRA), maibé matebian ho familia lakohi atu transfere mai halo tratamentu iha Dili.

Ohin madrugada matebian isin manas, saturasaun oksijéniu tu’un-maka’as no matebian i’is-kotu 11:20 dader.

“Familia la aseita hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Kazu foun ohin 187 hosi Dili 77, Covalima 63 no munisípiu seluk hamutuk 47 ne’ebé kompostu hosi mane 106 no  feto 81.

Hosi totál kazu detetadu foun ohin, ho idade 20-62 (23,8) ho idade entre tinan 12-59 na’in 119 (63,6%), idade 60 mai karaik  na’in-neen. Hosi kazu detetadu foun ohin 125 kazu ka 66,8% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 23 agostu 2021 hamutuk 14.403. Hosi horisehik mai ohin, teste ne’ebé Laboratóriu Nasionál Saúde halo hamutuk 238 PCR, ho detallu hanesan tuir-mai, Vijilánsia sentinela na’in-ida, rastreiu ba kontaktu ka Contact tracing 106,  Rastreiu Aleatóriu  ka Random Screening nain 23, viájen sai-hosi serka sanitária hosi Dili 99,  Viájen internasionál haat, Follow up iha kuarentena na’in-lima.

Totál testes PCR ne’ebé halo horisehik 22 agostu iha munisípiu-sira seluk, RAEOA no HNGV hamutuk 354, ho detalla hanesan tuir-mai, Maubisse 34, Maliana 30, Viqueque 11, Suai 84, Baucau 56, Ermera la iha RAEOA 28, HNGV 104 no Lospalos hitu.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 23 agostu tuir sistema informasaun Saúde iha Ministériu Saúde ho totál  kumulativu 1ª doze iha Dili (72,4%) no  totál  kumulativu 2ª doze  iha Dili (53,6%).

Ema ne’ebé simu ona vasina doze dahuluk iha Timor-Leste  (48,3%) no simu ona doze daruak  (21,7%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 18,7/100 mil abitante, enkuantu ba deit munisípiu Dili,47,3/100 mil abitante.

Ohin, insidénsia munisípiu Manufahi 23,2/100 mil abitante, tuir kedan ho munisípiu Covalima ho insidénsia 20,6/100 mil abitante, RAEOA ho insidénsia 9,1/100 mil abitante, munisípiu Baucau ho insidénsia 8,2/100 mil abitante, munisípiu Manatuto ho insidénsia 8,1/100 mil abitante, hafoin munisípiu Ainaro ho insidénsai 8,3/100 mil abitante.

Dadus iha leten hatudu katak, insidénsia munisípiu Dili, munisípiu Manufahi ho Covalima tu-tuir malu a’as-liu iha Timor-Leste laran tomak RAEOA ho Munisipiu  tolu  seluk – Baucau, Manatuto, Ainaro – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 23 agostu 2021, izolamentu Vera Cruz halo tratamentu ba kazu detetadu na’in 60. Iha área obstetrisia na’in-sia, no iha medisina interna na’in 40, iha sirurjia na’in-haat,  pediatria na’in-lima, perinatolojia nain-rua. Iha obstetrisia  na’in-sia kategoria kaman hotu. Iha área medisina interna na’in 40. Na’in 20 kategoria grave (tolu uza ventiladór). Nain-ida  ho CPAP-Continuous Positive Airway Pressure, 16 ho oksijéniu). Na’in 16 uza okjijeniu, na’in 13 kategoria  moderadu, hitu  kategoria kaman. Sira na’in-haat iha sirurjia kategoria kaman hotu, na’in-lima  pediatria kategoria kaman, no nain-rua iha perinatolojia kategoria kaman.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Informa mós ba públiku katak Iha semana kotuk (16-22 Agostu), ema ne’ebé baixa iha Vera Cruz no Lahane tanba COVID-19, hamutuk hotu 41/54 (76%) mak seidauk simu vasina, kompara ho ema na’in 11/54 (20,3%) ne’ebé mak simu ona vasina kompletu.

Ema ne’ebé seidauk simu vasina iha probabilidade bo’ot liu dala-rua, atu baixa iha ospitál, kompara ho ema ne’ebé mak simu ona vasina.

Informa mós katak, ema adultu na’in 14 ne’ebé mate iha semana kotuk (16-22 Agostu), la simu vasina kompletu (iha ema ida de’it mak simu doze vasina ida). Ida ne’e hatudu katak iha Timor-Leste ema ne’ebé mak simu ona vasina kompletu, seidauk iha ida mak mate tanba COVID-19.

Ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here