Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 29 jullu 2021 (TATOLI)—Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 56/2021, 27 jullu, dekreta Estadu Emerjénsia ba dala-XVI ba loron 30 tan, hahú husi tuku 00.00 iha domingu (01/08) no termina tuku 23.59 iha segunda (30/08).

Notísia Relevante: PN autoriza Prezidente Repúblika dekreta estadu emerjénsia dala-XVI

“Deklarasaun estadu emerjénsia ne’e sei abranje territóriu nasionál tomak ho fundamentu iha subsisténsia ba situasaun kalamidade públika. Estadu emerjénsia parsialmente suspende direitu ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasaun sira, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada,” Prezidente Repúblika, Francisco Guterres Lú Olo, hateten liuhosi komunikadu imprensa ne’ebé Agência Tatoli asesu, kuarta ne’e.

Timor-Leste presiza fó atensaun liután tanba iha ona ema na’in-haat (4) ne’ebé tama mai territóriu nasionál iha fulan juñu nia rohan no inísiu jullu 2021, ne’ebé kontajiozu ho variante foun Delta hosi SARS-Cov-2.

Variante foun Delta kontajiozu liu, to’o ona nasaun viziñu Repúblika Indonézia, ne’ebé Timor-Leste fahe nia fronteira terrestre hamutuk. Xefe Estadu hatutan iha Indonézia, rejista kazu foun diariamente barakliu fali kompara ho India. Tuir previzaun hateten katak posibilidade iha loron ida nia-laran COVID-19 sei bele hada’et ba sidadaun rihun 200 ka liután.

“Adosaun medida importante sira ba prevensaun no kontrolu importasaun variante foun hosi SARS-CoV-2 atu la tama no hada’et ba populasaun liuhosi impoin mak taka fronteira, sidadaun estranjeiru sei tama territóriu nasionál bainhira autoriza hosi Sentru Integradu Jestaun Krize (SIJK), estabelesimentu regra ba distansiamentu sosiál, impozisaun ba teste atu hatene infesaun, izolamentu ema moras, infetadu no suspeitu infesaun, konfinamentu domisiliáriu no determinasaun serka sanitaria,” Xefe Estadu hateten.

Tuir Ministériu Saúde, iha 28 jullu, iha nível nasionál kazu konfirmadu COVID-19 ho númeru akumuladu hamutuk 10.535 desde marsu 2020, kazu ativu 736 no rejista mate na’in-26.  Estadu kontinua foti medida prevensaun no kombate kontájiu virus SAR-CoV-2.

Dezde fulan-marsu 2020, hafoin rejista kazu konfirmadu ida ho SARS CoV-2 Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hasees sidadaun hotu-hotu hosi kalamidade públika ne’ebé bele mosu hosi moras COVID-19.

Tuir dadus hosi Sala Situasaun Sentru Integradu Jestaun Krize (SIJK), kuarta (28/07) ne’e iha Timor-Leste rejista kazu pozitivu 148, rekoperadu 66 no kazu ativu 736. 

Kumulativu kazu konfirmadu sura hosi 21 marsu 2020 to’o 28 jullu 2021 hamutuk 10.535. Hosi horisehik mai ohin, teste ne’ebé Laboratóriu Nasionál Saúde halo hamutuk 961 PCR, ho detallu hanesan tuir-mai, Vijilánsia sentinela 56, rastreiu ba kontaktu ka Contact tracing 458, Rastreiu Aleatóriu ka Random Screening nain na’in-rua, viájen sai-hosi serka sanitária hosi Dili 387, viájen internasionál  28, Follow up iha kuarentena na’in 30.

Totál testes PCR ne’ebé halo horisehik 27 jullu iha Munisípiu-sira seluk, RAEOA no HNGV hamutuk 276 ho detalla hanesan tuir-mai, Maubisse 89, Maliana 13 Viqueque hitu, Suai lima, Baucau 102, Ermera haat RAEOA hitu no HNGV 49.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 28 jullu tuir sistema informasaun Sáude iha Ministériu Saúde, totál  kumulativu 1ª doze iha Dili 133.016 (62,2%) no  totál  kumulativu 2ª doze  iha Dili 75.889 (35,50%).

Ema ne’ebé simu ona vasina doze dahuluk iha Timor Leste 277.953 (36,8%) no simu ona doze daruak 89.286 (11,83%).

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here