Prezidente Repúblika, Francisco Guterres Lú Olo, prezide reuniaun Konsellu Estadu liuhosi virtual iha Palásiu Prezidente Nicolau Lobato, Bairru Pite, Dili, segunda, (23/08). Imajen Tatoli/Egas Cristovão

DILI, 23 agostu 2021 (TATOLI)—Hafoin reuniuan Konsellu Estadu (KE) ho Konsellu Superiór Defeza no Seguransa (KSDS), konsellu rua ne’e deside no rekomenda ba Prezidente Repúblika, Francisco Guterres Lú Olo atu haruka karta ba Parlamentu Nasionál hodi halo estensaun ba Estadu Emerjénsia (EE).

Notísia Relevante: Prezidente Repúblika dekreta estadu emerjénsia ba dala-XVI

“Ohin, Konsellu rua ne’e halo reuniaun liuhosi Zoom ne’ebé sira rekomenda ba Prezidente Repúblika atu hato’o pedidu ba Parlamentu Nasionál atu autoriza no la autoriza estensaun Estadu Emerjénsia tanba ita haree kazu COVID-19 iha ita-nia rain,” Xefe Kaza Sívil, Francisco Vasconcelos, hatete ba jorbalista sira iha Palásiu Prezidensiál, Nicolau Lobato, Dili, segunda ne’e.

Xefe Kaza Sívil hatete, se posivél orsida bele haruka ona ba Parlamentu Nasionál no karik aban, nune’e nuen’e bele diskute no deside estadu emerjénsia tuir mai ne’e.

Membru Konsellu Superiór Defeza no Seguransa ne’ebé partisipa iha reuniaun ne’e mak hanesan Prezidente Repúblika (PR), Francisco Guterres Lú Olo, Primeiru-Ministru (PM) Taur Matan Ruak, Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, Ministru Defeza Filomeno Paixão de Jesus, Ministru Justisa (MJ) Manuel Carceres.

Hosi Parlamentu Nasionál, David Dias Ximenes, Abel Pires da Silva, Xefe Estadu Maiór Jenerál FALINTIL Forsa Defeza Timor Leste (F- FDTL), Tenente Jenerál Lere Anan Timur, Komandante Jerál Polisia Nasionál Timor-Leste Komisáriu Faustino da Costa, no Diretór Ezekutivu Forum Organizasaun Naun Governamentál (FONGTIL) Daniel Santos do Carmo.

Entretantu, membru Konsellu Estadu ne’ebé partisipa iha reuniaun ne’e mak atuál Xefe Estadu) Francisco Guterres Lú Olo, Primeiru- Ministru (PM) Taur Matan Ruak, Prezidente Parlamentu Nasionál Aniceto Longuinhos Guterres Lopes, membru ne’ebé nomea hosi Prezidente Repúblika mak hanesan Prezidente Kámara Komérsiu Indústria (CCI- TL-sigla portugés) Oscar Lima, Prezidente Komisaun Nasionál Eleisaun (CNE- sigla portugés) José Belo, no nomea hosi Parlamentu Nasionál mak hanesan Aurora Ximenes, José Cornelio Guterres, Arcánjelo de Jesus Gouveia Leite.

Tuir dadus hosi Sala Situasaun, Sentru Integradu Jestaun Krize (SIJK), domingu ne’e rejista kazu óbitu rua, pozitivu 235, rekoperadu 57 no kazu ativu 3.264. Totál óbitu ne’ebé relata domingu ne’e, na’in-ida ho idade 76, timor-oan, hela iha Dili, no iha 21 agostu 2021, diagnóstikadu ho Sindroma Insufisiénsia Respiratória Aguda (SIRA) tanba COVID-19.

Kazu foun domingu ne’e iha 235 mai hosi Dili 183, Covalima 31, Manufahi 13 no munisípiu seluk  na’in-ualu ne’ebé kompostu hosi mane 111 no feto 124.

Hosi totál kazu detetadu foun ohin, ho idade 20-59 (23,8) entre tinan 12-59 na’in 170 (72,3%), idade 60 mai karaik na’in-neen. Hosi kazu detetadu foun ohin 89 kazu ka 33,3% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 22 agostu 2021 hamutuk 14.216. Hosi horisehik mai ohin, teste ne’ebé Laboratóriu Nasionál Saúde halo hamutuk 431 PCR, ho detallu hanesan tuir-mai, Vijilánsia sentinela na’in 22, rastreiu ba kontaktu ka Contact tracing 210, Rastreiu Aleatóriu ka Random Screening nain 25, viájen sai-hosi serka sanitária hosi Dili 150, Viájen internasionál 16, Follow up iha kuarentena na’in-ualu.

Tuir dadus, kazu COVID-19 iha Indonézia iha 22 agostu 2021 hatudu katak kazu foun hamutuk 12.408, iha loron hitu nia laran kuaze 17.872, no totál ema rihun 126 ne’ebé mate tanba COVID-19.

Notísia Relevante: COVID-19: óbitu rua, pozitivu 235 no ativu 3.264

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here