Labarik ida dudu hela nia karosa hodi ba sosa modo iha fatin entrada Tasitolu, Tersa 9/6/2021.Imajen Tatoli/antonio Goncalves.

DILI, 26 jullu 2021 (TATOLI)—Komisaun F ne’ebé trata asuntu Saúde, Seguransa Sosiál no Igualdade Jéneru, sei inklui paresér hosi entidade relevante sira iha projetu-lei protesaun labarik no joven iha perigu.

Notísia Relevante: Plan International rekomenda espesífika kada artigu projetu-lei protesaun labarik ba PN

Prezidente Komisaun F Parlamentu Nasionál, Noé da Silva Ximenes “Buka Tuir”. Imajen Tatoli/Francisco Sony.

“Ohin, ami la konsege halo aprovasaun ba relatóriu no paresér tanba konteúdu hosi projetu-lei protesaun labarik no joven iha perigu ne’e sei inklui mós paresér sira hosi entidade relevante sira. Entaun, fó tempu ba deputadu sira estuda tán lai no 12 agostu mak ami sei aprova relatóriu ida-ne’e,” Prezidente Komisaun F, Deputadu Noé da Silva Ximenes ‘Buka-Tuir’ informa ba jornalista sira, iha resintu Parlamentu Nasionál, segunda ne’e.

Intituisaun sira-ne’ebé hato’o submisaun ba Komisaun F mak hanesan Plan International, JSMP, UNICEF, Organizasaun Internasionál ba Traballu (OIT) no Parlamentu Foinsa’e.

Projetu-lei ne’e deputadu sira tenke estuda ho kle’an, nune’e sai ba lei karik defende duni labarik no joven sira iha Timor-Leste nia direitu.

“Insituisaun sira-ne’ebé ita atu fó fiar implementa lei ne’e mak hanesan Ministériu Solidariedade Sosiál no Inkluzaun (MSSI), Ministériu Interior (MI) no Sekretaria Estadu ba Igualdade no Inkluzaun (SEII),” nia dehan.

Nia esplika, sentidu hosi títulu projetu-lei protesaun ba labarik no joven iha perigu ne’e atu proteje labarik sira nune’e evita inan-aman obriga oan sira ba servisu iha luron.

Tanba, tuir nia, loloos ne’e labarik sira-nia direitu mak eskola maibé dalabarak liu inan-aman sira  obriga labarik halo serbisu iha luron.

“Entaun Estadu iha dever morál atu oinsá mak atu halo lei ida hodi proteje ita-nia oan sira-ne’e hodi labele husik ita-nia oan sira ba servisu iha luron ka servisu obrigatoriamente. Ita haree iha ema balu utiliza ita-nia oan sira halo serbisu ida-ne’ebé mak la merese ba labarik sira,” nia dehan.

Projetu-lei ne’e la engloba ema ho defisiénsia sira, entaun tenke altera kapítulu balun atubele engloba mós ema sira ho kondisaun defisiente iha laran.

Projetu-lei protesaun labarik no joven iha perigu ne’e iha artigu hamutuk 103 maibé posibilidade sei aumenta.

Komisaun F rona ona opiniaun sira hosi Ministériu Solidariedade Sosiál (MSSI), JSMP, UNICEF, Organizasaun Internasionál ba Traballu (OIT), Plan International no Parlamentu Foinsa’e, kona-ba projetu-lei refere.

Notísia Relevante: UNICEF apresia PN inisia projetu-lei protesaun labarik-joven iha perigu

Komisaun A aprova relatóriu-paresér setoriál ba projetu-lei protesaun ba labarik

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here