Diretora Plan Internasionál iha Timor-Leste, Dillyana Ximenes. Imajen Tatoli/Francisco Sony.

DILI, 16 jullu 2021 (TATOLI)—Organizasaun Plan International hato’o rekomendasaun ho espesífika kada artigu iha projetu-lei protesaun ba labarik no joven sira iha perigu.

Plan International liderada Diretora Dillyana Ximenes rekomenda ho pontu espesífika hamutuk 18 ba Parlamentu Nasionál liuhosi Komisaun F ne’ebé trata asuntu saúde, seguransa sosiál no igualdade jéneru, kona-ba prosesu diskusaun lei protesaun labarik no joven iha perigu.

Plan International nia submisaun ho pontu 18 ba reprezentante Povu sira atu konsidera:

  1. Títulu hosi projetu-lei “Lei Protesaun ba Labarik no Foinsa’e iha perigu,”. Plan International fiar katak títulu ne’e sei la halo diskriminasaun ba labarik sira iha Timor-Leste ba sira-nia estatutu, sexu, rasa inklui problema ne’ebé labarik sira hasoru iha sira-nia família no sosiadade.

“Maibe tuir mai ami-nia prespetiva maka títulu ne’e sé bele armoniza hanesan tuir mai “Lei Protesaun ba Labarik iha Timor-Leste” atu-bele kobre protesaun labarik sira hotu iha situasan normál no emerjénsia (labarik iha sirkutansia hotu),” submisaun Plan International ba Parlamentu Nasionál ne’ebé Agência TATOLI, asesu liuhosi Pontu Fokál ba Polítika no Salva Guarda Labarik no Foinsa’e, Delsio Guimarães, sesta ne’e.

  1. Definisaun labarik, Plan International fiar katak atu defini labarik sira-nia idade iha Timor-Leste presiza haree ba sira-nia kondisaun fíziku, saúde no mentál, bele haree mós lejizlasaun sira-ne’ebé durante ne’e iha ona tanba Konstituisaun RDTL nu’udar baze hodi hamosu lejizlasaun sira seluk, nune’e Timor-Leste bele iha estrutura lei ne’ebé klaru iha RDTL.

Nune’e Plan International sujere bainhira koalia kona-ba labarik signifika labarik feto, labarik mane ho diversidade. Diversidade signifika inklui labarik feto ho mane portadór difisiénsia no LGBTI.

Tuir ezbosu lei ne’e deskreve iha artigu 3 hateten, labarik mak ema ho idade ne’ebé seidauk liu tinan 17 tuir artigu 118 Lei Kódigu Sivil.

“Ami hanoin katak sé iha Lei ida-ne’e ko’alia de’it kona-ba labarik entaun la presiza uza foinsa’e tanba iha kategoria labarik, adolosente no foinsa’e ne’ebé presiza haketak sira-nia idade, tanba ne’e ami prefere la uza foinsa’e tanba iha lei Kodigu Sivil la mensiona kona ba foinsa’e sira.  Ami Remokenda se bainhira inklui ka temi foinsa’e núdar mos objetu ba futuru Lei ida-ne’e maka presiza halo definisaun ketak ida kona-ba sé mak foinsa’e sira ho maneira sira oinsá proteze foinsa’e sira, tanba iha Lei ida ne’e ko’alia de’it maka labarik sira,” Plan International rekomenda.

  1. Artigu 3 kona-ba definisaun sira iha alínea 2 konsidera katak labarik ka foinsa’e ne’ebé hasoru perigu, liuliu, bainhira nia tama iha situasaun ida hosi hirak tuir mai ne’e.

“Ami interpreta katak ida-ne’e ko’alia ona kona ba tipu-tipu ousi abuzu ka violénsia hasoru labarik no foinsa’e sira, maibé laiha definisaun ida klaru koba ba abuzu ka violénsia ne’ebé ema halo hasoru labarik sira. Ami rekomenda atu-bele aumenta artigu ketak kona-ba abuzu ka perigu iha kontestu jerál ho nia impaktu sira no artigu ketak mós kona ba definisaun kona ba abuzu fíziku, seksuál, emosionál, abandonadu, abuzu online no intimidasaun sira hasoru labarik no fóinsa’e sira,” Plan Internasionál fó hanoin ba Komisaun F.

  1. Refere ba Konstituisaun RDTL Artigu 18 (1) Labarik sira iha direitu ba protesaun espesiál hosi família, komunidade no mós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no esplorasaun.

Nune’e, Plan International hanoin katak presiza dezemvolve ona mekanismu sira protesaun labarik nian to’o iha nível komunidade, iha nivel Suku, atu-bele tau artigu ketak ida kona-ba kna’ar no responsabilidade ba Konsellu Suku iha lei ida-ne’ e, liuliu kompeténsia Xefe Suku nian iha ámbitu halo regra lokál sira hodi proteje labarik sira iha nível suku no kooperasaun iha mekanismu referál kazu.

  1. Artigu 5, alínea B kona ba Privasidade, Plan International hanoin katak privasidade labarik no foinsa’e sira iha asuntu prosesu justisa no ligasaun ba publisidade ida-ne’e presiza konjuga ho konsentimentu ba privasidade iha dadus sira, oinsá asegura labarik no foinsa’e sira-ne’ebé sai ona vítima no suspeitu iha sira-nia privasidade, identidade, naran di’ak iha kontestu konfidensialdade, liuliu evita ba órgaun komunikasaun sosiál nia publikasaun sira.

Plan International rekomenda atu inklui protesaun ba dadus privasidade sira labarik no fóinsa’e sira espesialmente feto iha privasidade seguru atu asesu ba internet, mídia sira TV no Rádiu inklui plataforma mídia sosial online sira, liuhosi kria mekanismu kontrolu ba orgaun fornesedór informasaun no telekomunikasaun iha Timor-Leste.

Purtantu Iha alínea L presiza akresenta bandu diskriminasaun ba labarik ho nesesidade oinoin ka labarik no foinsa’e sira ho sira-nia diversidade.

  1. Artigu 7 kona-ba intervensaun hosi Rede Protesaun Labarik no Foinsa’e, iha parte atuasaun tuir planu no independente, Plan International hanoin katak Rede Protesaun Labairk la’ós Independente maibe nia orgaun ida-ne’e reprezenta Estadu no iha responsabilidade másimu hodi halo protesaun ba labarik no foinsa’e sira.

“Ami rekomenda atu kria artigu separadu kona-ba definisaun klaru konaba “Rede Protesaun ba Labarik” (ami-nia definisaun sira bele sai referensia),” Plan International esplika iha sira-nia submisaun.

  1. Iha artigu 8 hakerek kona-ba intervensaun hosi entidade lokál ho kompeténsia iha área infánsia no Juventude, Plan International hanoin katak títulu hosi artigu ne’e komplexu tanba liafuan entidade lokal refere ba se? Tanba ne’e Plan rekomenda atu tau de’it kompetensia hosi entidade serbisu protesaun labarik no foinsa’e sira (hasai tiha infánsia no juventude).

Nune’e mós rekomenda atu aumenta alínea 1 ba 3 katak entidade oinoin iha kámada sosiedade Timor-Leste nian ne’ebé iha responsabilidade síviku atu koordena, koopera no relata kazu hotu-hotu ba orgaun kompetente mak Rede Protesaun Labarik ne’ebé eziste ona iha munisípiu sira.

  1. Artigu 10 kona-ba konsentimentu, Plan International hanoin katak konsentimentu ba labarik hotu-hotu ne’ebé partisipa iha atividade enkontru ba julgamentu, partisipasaun ba atividade dezenvolvimentu labarik no foinsae sira nian talentu ka kualkér aktividade ruma ne’ebé envolve labarik no fóinsa’e sira, organizasaun sira presiza konsidera sira-nia ideia ba konsentimentu.

Aseitasaunka hakarak hosi labarik sira rasik atu envolve no laiha obrigasaun ruma, tanba ne’e Plan rekomenda atu-bele konsidera aumenta alínea 1 ba 9, katak orgaun kompetente sira-ne’ebé organiza labarik ba atividade sira, presiza introdús kona-ba objetivu hosi partisipasaun labarik nian, iha aseitasaun no hakarak rasik ho konsiénsia (la obriga) ne’ebé asina iha formatu konsentimentu ba nia paritisipasaun la ho ameasa no forsa.

  1. Artigu 13 kona-ba objetivu hosi serbisu protesaun labarik nian maka Plan hanoin katak presiza aumenta fraze sira hanesan “serbisu protesaun labarik no foinsa’e sira, buka atu promove labarik no foinsa’e sira-nia direitu fundamentál sira, prevene hodi halakon situasaun hotu ne’ebé bele afeta ba sira-nia kondisaun fíziku, formasaun, seguransa, saúde, emosionál no dezenvolvimentu integral”.

Nune’e Plan International nota katak iha artigu 14 dupla iha númeru artigu maibé títulu la hanesan.

  1. Artigu 15 kona-ba finalidade, Plan International hanoin katak finalidade hosi lei protesaun labarik no foinsa’e sira hanesan parte ida importante, signifika rezultadu hosi serbisu entidade oinoin ne’ebé mensiona ona iha lei ida ne’e, nune’e rekomenda atu alínea B bele kontinua kompleta ho liafuan “tuir nesesidade ba labarik” nomoos rekomenda aumenta alínea 1 ba D “Labarik, liu-liu labarik feto sira ho sira-nia diversidade bele goza ona sira direitu fundamentál iha setor hotu-hotu”.
  1. Artigu 16 kona ba medida, alínea A, Plan International hanoin katak medida protesaun labarik tenke halo atu asegura interese di’ak labarik sira nian, rekomenda atu inklui responsável orfonatu hodi sai hanesan ne’e ‘fó apoiu ba inan-aman, reprezentante legál, orfonatu sira akreditadu sira ka ema ne’ebé iha guarda de faktu ba labarik no fóinsa’e sira’.
  1. Iha artigu 23 kona-ba medida konfiansa hosi labarik ba família akollamentu, Plan International preokupa kona-ba artigu ne’e nia relevánsia ho medida adosaun ba labarik, tanba termu ba akollamentu ba adosaun ba labarik ne’e bele akontese de’it ba labarik, nune’e rekomenda hasai liafuan foinsa’e.
  1. Artigu 25 kona-ba modalidade ba akollamentu familiár, Plan International hanoin katak artigu ne’e ko’alia kona-ba tempu ka sirkuntánsia sira, tanba ne’e rekomenda muda títulu hosi artigu ne’e ba “Durasaun ba Akollimentu familiár”.
  1. Artigu 26 kona-ba medida akollimentu ba labarik no foinsa’e iha Instituisaun, Plan International observa no ppreokupa katak ba Instituisaun ka ajénsia sira-ne’ebé harii iha Timor-Leste hodi halibur labarik sira presiza kria kondisaun ida protetivu, hetan monitorizasaun no avaliasaun hosi órgaun estadu nian hanesan Ministériu Justisa, PDHJ, Komisaun Direitu Labarik.

Nune’e rekomenda atu aumenta fraze “Instituisaun ezistente ne’ebé hetan legalidade no monitoriamentu no avaliasaun regulár hosi Estadu”.

  1. Artigu 28 kona-ba Natureza, Plan International hanoin katak iha lei ne’e presiza konsidera agensia sira-ne’ebé halo serbisu umanitária iha asuntu dezastre naturál, nune’e rekomenda aumenta nia redasaun ne’e ba mós ajénsia sira-ne’ebé fornese apoiu serbisu umanitária nia konsiderasaun ba protesaun labarik iha situasaun emerjénsia.
  1. Artigu 63 kona-ba ezame, Plan International preokupa kona-ba ezame médiku sira ba vítima labarik no foinsa’e sira, faimília barak mak seidauk iha konsiénsia kona-ba ezame médiku, dala barak kazu abuzu seksuál no fíziku akontese ne’ebé rezulta kanek no raan, vítima nia família deside ba hasai fali objetu sira-ne’ebé loloos bele uza ba prova iha prosesu Tribunál.

Ida-ne’e afeta ba labarik no foinsa’e vítima sira-nia kazu barak mak arkiva de’it, nune’e iha artigu ida-ne’e presiza define sé mak tenke apoiu ba halo prosesu ezame médiku no oinsá família nia papél iha asuntu ida-ne’e.

Plan International observa no lamenta iha rezultadu médiku balun ne’ebé tenke sai segredu ba justisa maibé sai ona konsumu públiku (liga ba artigu 66 kona ba Komunikasaun Sosiál) molok desizaun tribunal fó-sai, entaun lei ida-ne’e oinsá vítima, sasin no investigadór sira obrigatoriamente tenke rai evidénsia sira ho kuidadu nu’udar segredu no respeita ba vítima nia privasidade.

  1. Kuaze iha lei ne’e ko’alia kona ba instituisaun akollimentu, Plan International preokupa tanba temi institusaun akollamentu maibé la define saida no sé mak Instituisaun sira-ne’e? tanba ne’e Plan International rekomenda hamosu artigu ketak ida kona ba “Instituisaun Akolliemntu nia Definisaun”.
  1. Iha artigu sira hahú hosi Kapítulu IX kona-ba prosesu judisiál, Plan International hanoin katak prosesu normativu iha tribunál tenke bazea nafatin ba serbisu tribunál ne’ebé tuir Lei Kódigu Prosesu Penál (KPP) ho independente, tranparánsia no laiha diskriminasaun ba labarik sira iha sira-nia kazu, desizaun hotu-hotu ne’ebé foti tenke bazea ba interese di’ak labarik sira-nian hodi fó justisa ba labarik no foinsa’e sira, liuliu labarik feto no feto foinsa’e sira.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here