Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão.

DILI, 01 jullu 2021 (TATOLI)—Komisaun A ne’ebé trata asuntu Konstitusionál no Justisa, kinta ne’e aprova ona relatóriu no paresér setoriál ba projetu-lei protesaun ba labarik sira no joven iha perigu.

Notísia Relevante: PN baixa projetu-lei protesaun labarik ba Komisaun A-F

“Ohin, ami diskute no aprova relatóriu no paresér setoriál kona-ba lei protesaun ba labarik no joven iha perigu. Ami haree tiha ona projetu-lei ne’e la viola konstituisaun, maibé atu kria kondisaun hodi fó protesaun ba ita-nia oan sira-ne’ebé abandonadu no joven sira-ne’ebé hetan perigu ba sira-nia moris,” Prezidente Komisaun A, Deputadu Joaquim dos Santos ‘Boraluli’ informa ba jornalista sira, iha Parlamentu Nasionál, kinta ne’e.

Parlamentu mós sei haree hodi halo ajustamentu ba konvensaun internasionál sira kona-ba protesaun ba labarik sira, tanba ne’e mak ohin Komisaun A finaliza ona relatóriu no paresér setoriál, atu haruka ba Parlamentu Nasionál hodi konsidera iha diskusaun no aprovasaun iha jeneralidade kona-ba projetu-lei protesaun ba labarik no joven iha perigu ne’e.

Prezidente Komisaun A ne’e rekomenda ba Komisaun F ne’ebé trata asuntu Saúde, Seguransa Sosiál no Igualdade Jéneru, atu konsidera atu konsidera kestaun sira-ne’ebé sensitivu ba labarik sira-nia direitu, tanba atu prepara lei ida Governu tenke kria kondisaun atubele tau matan ba labarik sira-ne’ebé abandona ne’e.

“Ema sira-ne’ebé iha interese boot uza labarik sira ba sira-nia interese karik, entaun lei tenke regula,” Prezidente Komisaun A ne’e argumenta.

Nia fó ezemplu, serbisu impulsivu hanesan obriga labarik sira tenke halo serbisu, pedofilia karik, violasaun ba labarik feto karik, ne’e tenke diskute ho didi’ak.

“Problema lubuk ida ami rekomenda, nune’e orsida iha definisaun ne’e Komisaun F labele haluha trata buat rua. Ida kona-ba família nia responsabilidade relasiona ho Governu nia obrigasaun polítika no ida seluk kona-ba Konstituisaun RDTL artigu 39 no artigu 18,” nia dehan.

Tuir Konstituisaun RDTL artigu 39 (Família, kazamentu no maternidade), númeru 1 mensiona, Estadu proteje uma-kain nu’udar baze selulár iha sosiedade no nu’udar kondisaun ne’ebé di’ak ba ema ida-idak hodi dezenvolve-aan.

Númeru 2 hosi artigu ne’e, subliña, ema hotu-hotu iha direitu atu harii no moris iha uma-kain no númeru 3 hateten, kazamentu hatuur iha ema feto no mane sira-nia hakarak rasik no iha sira na’in-rua nia direitu hanesan, tuir lei haruka.

Númeru 4 hosi artigu 39 akresenta, soin di’ak no tau matan duni ba maternidade, fiar metin katak feto hotu-hotu hetan protesaun espesiál wainhira hetan isin-rua no wainhira hahoris liutiha, no ba feto traballadora hotu-hotu iha direitu ba feriadu iha tempu adekuadu ida-nia laran, molok hahoris eh hahoris liutiha, hodi la lakon retribuisaun no regalia ruma tuir lei haruka.

“Labarik ne’e importante. Tuir ita-nia konstituisaun artigu 39 ne’ebé iha direitu harii família maibé família ne’ebé ho responsabilidade. Labele harii tiha família depois hahoris labarik mai abandona tiha. Kuandu sente-aan seidauk bele forma família, hein lai, mundu ne’e la’ós atu nabeen aban,” Prezidente Komisaun A ne’e fó hanoin.

Nia hatutan, konstituisaun RDTL artigu 18 mak obriga tenke hamosu lei protesaun ba labarik sira.

Tuir Konstituisaun RDTL artigu 18 (Protesaun ba labarik-oan sira), númeru 1 hateten labarik sira iha direitu ba protesaun espesiál hosi família, komunidade, nomós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.

Númeru 2 hosi artigu ne’e hatutan, labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila.

Nune’e mós númeru 3 hosi artigu 18 ne’e subliña, labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Entretantu oras ne’e Komisaun F ne’ebé trata asuntu Saúde, Seguransa Sosiál no Igualdade Jéneru, diskute hela projetu-lei protesaun ba labarik sira.

“Efeitu hosi inan-aman la konsege kontrola sira-nia oan entaun Estadu tenke asume responsabilidade. Responsabilizasaun ne’ebé atu atribui direitu ba Governu no Estadu ne’e mak tenke regula iha lei ne’e,” Prezidente Komisaun A ne’e fundamenta.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here