Kondisaun lagoa Tasi-Tolu halo labarik na'in-tolu sa'e ai-kabelak hodi halimar iha sira-nia uma oin, kinta (22 abril 2021). Imajen Tatoli/Antonio Gonçalves.

DILI, 22 jullu 2021 (TATOLI)—Jestór Protesaun Labarik The United Nation Children Fund (UNICEF) Timor-Leste, Domingos Sousa, hateten UNICEF apresia Parlamentu Nasionál (PN) ne’ebé inisia projetu-lei ba protesaun labarik no joven iha perigu, iha Timor-Leste.

Notísia Relevante: MSSI rekomenda espesífika artigu haat hosi projetu-lei protesaun labarik ba PN

“UNICEF apresia tebes ho Parlamentu Nasionál nia kompromisu, liu-liu hosi Komisaun F hodi inisia halo projetu-lei no halo konsulta públika ba entidade sira kona-ba projetu-lei protesaun labarik no joven iha perigu,” Jestór UNICEF ne’e hateten ba Agência TATOLI, liuhosi karta eletrónika (e-mail), kinta ne’e.

Jestór UNICEF esplika, UNICEF la’ós fornese de’it apoiu análiza téknika maibé fornese apoiu tékniku ba Komisaun F kona-ba prosesu projetu-lei ne’e tomak, hanesan apoiu ba konsultasaun públika, hakerek relatóriu ba rezultadu konsultasaun, hakerek informasaun diretamente ba testu hosi esbosu lei ne’e no seluk tán.

Iha dokumentu rua mak UNICEF entrega hosi reprezentative UNICEF ba Prezidente Komisaun F Parlamentu Nasionál durante iha prosesu konsultasaun iha 8 jullu iha Hotel Timor.

“Dokumentu rua ne’e mak hanesan opiniaun legál no informasaun direta sira ba testu kona-ba esbosu lei ne’e,” nia dehan.

Nia hateten, lei ne’e tenke inkluzivu duni hodi proteje labarik inklui labarik sira ho difisiénsia iha Timor-Leste.

UNICEF mós iha pontu rekomendasaun tolu ba iha paresér hanesan pontu ida kona-bá definisaun labarik, tanba tenke aliña ho Konvensaun Direitu Labarik (KDL) mak Governu Timor-Leste ratifika ona iha tinan 2003 inklui observasaun finál hosi Komité KDL iha relatóriu KDL.

Pontu rua, modelu Protesaun Labarik tanba lei ne’e foka liu ba prevensaun no bem estar ba labarik sira. Tanba ne’e, UNICEF rekomenda atu adapta ho kontestu Timor-nian, refleta Timor-oan nia kontestu, kultura no mós rekursu disponível sira atu implementa bainhira lei ne’e aprova ona hosi Parlamentu Nasionál.

Pontu tolu mak sentralidade ba família no ba komunidade. Família mak sai nukleu ba sistema protesaun mak hetan apoiu hosi komunidade tanba definisaun família tenke bazea ba kontestu timor-nian mak aliña ho konstituisaun RDTL artigu 39.

Artigu 39 (Família, kazamentu no maternidade) iha alinea 1 hateten, Estadu proteje uma-kain nu’udar baze selulár iha sosiedade no nu’udar kondisaun ne’ebé di’ak ba ema idaidak hodi dezenvolve an no alinea 2 haktuir katak ema hotu-hotu iha direitu atu harii no moris iha uma-kain.

Alinea 3 hosi artigu ne’e hateten, kazamentu hatuur iha ema feto no mane sira-nia hakarak rasik no iha sira na’in rua nia direitu hanesan, tuir lei haruka.

Alinea 4 ne’e haktuir, soin di’ak no tau matan duni ba maternidade, fiar metin katak feto hotu-hotu hetan protesaun espesiál bainhira hetan isin-rua no hahoris liutiha, no ba feto traballadora hotu-hotu iha direitu ba feriadu iha tempu adekuadu ida nia laran, molok hahoris eh hahoris liutiha, hodi la lakon retribuisaun no regalia, ruma tuir lei haruka.

Notísia Relevante: Komisaun F realiza audiénsia públika kona-ba projetu-lei protesaun labarik-joven iha perigu

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here