Imajen/Media PR.

DILI, 13 jullu 2021 (TATOLI)—Parlamentu Nasionál (PN), tersa ne’e aprova ona projetu-lei eleitorál munisipál iha artigu 135, projetu-lei podér lokál no desentralizasaun administrativa iha artigu hamutuk 183 iha jeneralidade, no deputadu sira sei diskute kle’an kada artigu iha espesialidade.

Projetu-lei eleitorál munisipál aprovadu iha jeneralidade ho rezultadu votasaun a-favór 61, kontra 0 no abstensaun 0, no projetu-lei podér lokál no desentralizasaun administrativa aprovadu iha jeneralidade ho rezultadu votasaun a-favór 61, kontra 0 no abstensaun 0.

Notísia Relevante: PN sei debate projetu-lei eleitorál munisipál-podér lokál iha semana oin

“Inisiativa rua ne’e aprovadu tiha ona iha jeneralidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Hafoin votasaun, plenária fó autorizasaun ba Komisaun A ne’ebé trata asuntu Konstitusionál no Justisa liuhosi rezultadu votasaun a-favór 60, kontra 0 no abstensaun 0, nune’e votu autorizasaun haruka ba Komisaun A atu debate iha espesialidade.

Projetu-lei eleitorál munisipál ne’e tanba ejizensia hosi Konstituisaun RDTL artigu 65 númeru 1, ne’ebé define órgaun eleitu ho soberania no eskolla liuhosi eleisaun, mediante sufrájiu universal, livre, diretu, sekretu, pesoál no periódiku.

Nune’e mós projetu-lei podér lokál no desentralizasaun administrativa ne’e konstitui ho pesoa koletiva iha territóriu nasionál ba órgaun reprezentativu sira-ne’ebé define organizasaun, kompeténsia, funsionamentu no kompozisaun define iha lei.

Ministru Administrasaun Estatál, Miguel Pereira de Carvalho, louva ho inisiativa hosi Parlamentu Nasionál kona-ba projetu-lei hirak ne’e.

Notísia Relevante: Komisaun A aprova relatóriu-paresér ba projetu-lei eleitorál munisipál

Governante ne’e fundamenta, projetu-lei eleitorál ne’e ko’alia refere liu bá órgaun podér lokál ne’ebé povu mak hili tantu asembleia munisipál no prezidente autoridade munisípiu sira.

Entretantu projetu-lei podér lokál ne’e atu hakbesik serbisu públiku sira hosi Estadu ba kraik ka fó podér ho kompeténsia tomak ba munisípiu sira halo planu, programa no orsamentu rasik.

Purtantu projetu-lei desentralizasaun administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balun ne’ebé durante ne’e seidauk fó ba Governu munisipál.

“Tanba atu estabelese podér lokál ne’e mandatu konstitusionál ne’ebé temi iha artigu 72 Konstituisaun RDTL katak tenke iha podér lokál atu nune’e hakbesik serbisu públiku ne’e ba ita-nia populasaun sira ho forma mais efisiente no efikásia,” nia informa.

Nia subliña, bainhira munisípiu sira iha ona podér lokál entaun sei promove dezenvolvimentu rurál, promove partisipasaun demokrátika ba populasaun sira iha área rurál.

Ministru Administrasaun Estatal ne’e apresia ho inisiativa Parlamentu Nasionál nian tanba hakbesik serbisu públiku ba munisípiu sira importante no espera Parlamentu Nasionál bele aselera projetu-lei hirak ne’e.

Maibé, nia dehan, to’o iha debate espesialidade Governu sei propoin atu halo alterasaun artigu balun iha projetu-lei hirak ne’e, nune’e implementasaun iha futuru labele hamosu problema.

Projetu-lei rua ne’e inisia dezde 18 setembru 2018 hosi deputadu Patrocínio Fernandes dos Reis, Noé da Silva Ximenes ‘Buka-Tuir’, António Verdiál de Sousa, Abel Pires da Silva, Isabel Ximenes, Carmelita Caetano Moniz, Maria Rosa da Câmara ‘Bisoi’, Virgínia Ana Belo, Regina Freitas no Gabriel Soares.

Notísia Relevante: CNE identifika frakeza balun iha projetu-lei eleitorál munisipál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here