Plenaria Parlamentu Nasional. Imajen Tatoli Antonio Goncalves.

DILI, 09 jullu 2021 (TATOLI)—Reprezentante Povu iha uma fukun Parlamentu Nasional sei debate faze jeneralidade kona-ba projetu-lei eleitorál munisipál, podér lokál no desentralizasaun administrativa iha semana oin.

Notísia Relevante: Komisaun A aprova relatóriu-paresér ba projetu-lei eleitorál munisipál

“Iha 13 jullu sei halo diskusaun no votasaun iha faze jeneralidade ba projetu-lei projetu-lei eleitorál munisipál, projetu-lei podér lokál no desentralizasaun administrativa,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha uma fukun, sesta ne’e.

Nia dehan, Komisaun A ne’ebé trata asuntu Konstitusionál no Justisa sei aprezenta uluk relatóriu no paresér hafoin halo debate ba projetu-lei hirak-ne’e.

Entretantu, Ministru Administrasaun Estatál, Miguel Pereira de Carvalho, fó-sai ona katak projetu-lei hirak ne’e inísia hosi Parlamentu Nasionál.

Projetu-lei eleitorál ne’e ko’alia kona-ba órgaun podér lokál ne’ebé povu mak hili tantu asembleia munisipál no prezidente autoridade munisípiu sira.

Nune’e mós projetu-lei podér lokál ne’e atu hakbesik serbisu públiku sira hosi Estadu ba kraik ka fó podér ho kompeténsia tomak ba munisípiu sira halo planu, programa no orsamentu rasik.

Purtantu projetu-lei desentralizasaun administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balun ne’ebé durante ne’e seidauk fó ba Governu munisipál.

“Atu estabelese podér lokál ne’e mandatu konstitusionál ne’ebé temi iha artigu 72 Konstituisaun RDTL katak tenke iha podér lokál atu nune’e hakbesik serbisu públiku ne’e ba ita-nia populasaun sira ho forma mais efisiente no efikásia,” nia informa.

Nia subliña, bainhira munisípiu sira iha ona podér lokál entaun sei promove dezenvolvimentu rurál, promove partisipasaun demokrátika ba populasaun sira iha área rurál.

Ministru Administrasaun Estatal ne’e apresia ho inisiativa Parlamentu Nasionál nian tanba hakbesik serbisu públiku ba munisípiu sira importante no espera Parlamentu Nasionál bele aselera projetu-lei hirak ne’e.

Maibé, nia dehan, to’o iha debate espesialidade Governu sei propoin atu halo alterasaun artigu balun iha projetu-lei hirak ne’e, nune’e implementasaun iha futuru labele hamosu problema.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here