Prezidente Komisaun A PN, Joaquim dos Santos, Imajen Tatoli/António Gonçalves

DILI, 10 juñu 2021 (TATOLI)—Komisaun A ne’ebé trata asuntu Justisa no Konstitusionál aprova ona relatóriu no paresér kona-ba projetu-lei eleitorál munisipál, projetu-lei podér lokál no desentralizasaun administrativa.

Prezidente Komisaun A, Deputadu Joaquim dos Santos ‘Boraluli’, hateten Komisaun A finaliza konsultasaun públiku iha munisípiu Covalima, Bobonaro, Dili, Ermera, Liquiçá no Aileu molok aplikasaun deklarasaun estadu emerjénsia.

Notísia Relevante: CNE identifika frakeza balun iha projetu-lei eleitorál munisipál

Komisaun A rona ona matenek na’in hosi munisípiu hirak ne’e no tetu ba deklarasaun kuaze hanesan, entaun deside audiénsia públiku hala’o de’it iha Dili no semana kotuk, Komisaun A finaliza ona audiénsia públiku hafoin durante tempu naruk rona opiniaun hosi matenek na’in sira no instituisaun relevante sira.

“Nune’e, ohin Komisaun A aprova ona relatóriu no paresér ba projetu-lei importante rua hanesan lei eleitorál munisipál, podér lokál no desentralizasaun administrativa. Inisiativa hirak-ne’e uluk ho forma proposta-lei maibé tanba Prezidente Repúblika veta entaun iha mandatu ida-ne’e deputadu na’in-10 mak hatama fila-fali hanesan projetu-lei,” Prezidente Komisaun A ne’e informa ba jornalista sira, iha uma fukun, kinta ne’e.

Komisaun A aprova relatóriu no paresér rua ba projetu-lei eleitorál munisipál, podér lokál no desentralizasaun administrativa.

“Orsida ami asina no aban sei haruka ba Prezidente Parlamentu Nasionál hodi ajenda no ami husu aprovasaun iha faze jeneralidade,” nia dehan.

Lei eleitorál munisipál ne’e ko’alia kona-ba eleisaun ba munisípiu sira, ne’ebé halo asimilasaun ba lei eleitorál nasionál nian tanba lei rua ne’e iha relasaun. Ezemplu, eleisaun ba prezidente kámara munisipál sira laiha diferénsia ho eleisaun ba prezidente repúblika.

“Eleisaun ba Prezidente Repúblika ne’e 50+1, agora prezidente kámara munisípiu sira mós ita halo hanesan ne’e, ne’ebé laiha diferensa dook ida. Depois deputadu sira atu ba kompoin iha-ne’ebá, ne’ebé sistema proporsionál partidu polítiku sira mak ba kandidata-aan sai deputadu munisipál, prezidente kámara bele kandidata hosi grupu sidadaun balun maibé em prinsípiu partidu polítiku sira mak promove sira-nia ema,” nia akresenta.

Bainhira projetu-lei ne’e sai ba lei, nia dehan, la’ós automatikamente munisípiu hotu-hotu tenke sai kámara munisipál maibé ho fazeadamente.

Nune’e mós projetu-lei podér lokál no desentralizasaun administrativa ne’e bazea ba Konstituisaun RDTL ne’ebé fó podér ba lejizladór sira halo lei hodi desentraliza podér ne’e ba munisípiu sira ho kompeténsia administrativa no kompeténsia polítiku governativu nian.

“Ita diskusaun jeneraliade no espesialidade, ita sei haree buat barak iha projetu-lei rua ne’e,” nia fundamenta.

Tuir Rejimentu Parlamentu Nasionál hateten, bainhira Komisaun A finaliza ona relatóriu no paresér sei enkamiña ba Prezidente Parlamentu Nasionál.

Hafoin simu tiha relatóru ne’e, Prezidente Parlamentu Nasionál mak iha kompeténsia halo ajendamentu hodi rona opiniaun sira liuhosi reuniaun líder bankada parlamentár sira.

Bainhira líder bankada parlamentár sira halo apresiasaun no aprovasaun, Prezidente Parlamentu Nasionál sei deside data ba diskusaun iha plenária iha faze jeneralidade (haree ba sistema lei, prinsípiu lei no estrutura lei), faze jeneralidade (debate kada artigu ba proposta ka projetu lei ne’e).

Hafoin projetu-lei ne’e aprova ona jeneralidade tenke tama kedas ba votasaun finál globál no hafoin halo votasaun finál globál, projetu-lei ne’e sei fila-fali ba Komisaun A hodi halo redasaun finál.

Hafoin redasaun finál, Komisaun A sei entrega hikas ba meza prezidénsia nune’e Prezidente Parlamentu Nasionál sei asina no enkamiña kedas ba Prezidente Repúblika hodi deside promulga ka veta.

Bainhira Prezidente Repúblika promulga ona projetu-lei Parlamentu Nasionál ne’e, entaun ida-ne’’e sai ba Lei ona. Medida aplikasaun sira Governu mak sei pronúnsia. Se veta entaun inisiativa lejizlativa ne’e kaduka.

Notísia Relevante: Komisaun A-MAE deskute projetu-lei eleitorál munisipál-desentralizasaun administrativa

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here