Primeiru-Ministru, Taur Matan Ruak. Imajen TATOLI/Egas Cristóvão

DILI, 08 jullu 2021 (TATOLI)—Primeiru-Ministru, Taur Matan Ruak, hateten Xefe Estadu preokupa ho virus variante Delta COVID-19 tanba evolusaun virus ne’e iha Indonézia influénsia ba situasaun iha Timor-Leste, tanba ne’e PR husu Governu foti medida atu tau atensaun ba fronteira.

Notísia Relevante: Prevene variante Delta COVID-19, F-FDTL sei reforsa seguransa iha fronteira

“Prezidente Repúblika Francisco Guterres Lú Olo mós preokupa tebes ho variante foun Delta ne’ebé iha Indonézia sa’e maka’as. Entaun Prezidente Repúblika husu para tau atensaun ba ita-nia fronteira no avansa ho vasina tanba variante Delta iha ona ita-nia odamatan oin,” Primeiru-Ministru hateten ba jornalista sira, hafoin hasoru malu ho Prezidente Repúblika iha Palásiu Prezidensiál Nicolau Lobato, Bairru Pite, Dili, kinta ne’e.

Xefe Governu apela ba sidadaun sira tenke prepara-an ba senáriu ne’ebé pior tanba maske vasinasaun la’o di’ak no rezultadu COVID-19 iha Dili no fatin seluk komesa tún, maibé Governu sei haree ba medida oinsá atu tau matan ba fronteira.

“Agora iha Indonézia lockdown maka’as loos. Entaun, ita mós tenke prevene katak maske ita taka oinsá, nia bele tama. Karik kuandu tama, saida mak ita halo. Ita tenke preparadu,” Primeiru-Ministru hateten.

Notísia Relevante: Prevene variante Delta COVID-19, PN husu Governu rigorozu kontrola pontu entrada

Aleinde ne’e, Xefe Governu mós informa ba Prezidente Repúblika rezultadu orsamentu jornada orsamentál no nia konkluzaun tetu orsamentu ne’ebé foin daudaun hasai biliaun $1.5 ba tinan 2022.

Orsamentu Jerál Estadu halo avaliasaun daudaun ne’e iha rezultadu la’ós de’it ba nível orsamentál maibé nível orsamentál mós diskute maka’as loos to’o agora nível globál ho nia ezekusaun 32.8%.

Xefe Governu fiar katak, ba oin kada fulan nível ezekusaun sa’e maibé labele garante katak to’o tinan ida-ne’e nia rohan ne’e ezekuta hotu.

”Ne’e normál. Naturalmente ida-ne’ebé la ezekuta hotu orsamentu sira-ne’e tenke ba fali kofre Estadu. Atu ejize ne’e la loos, tanba kada ministériu kuandu husu osan nia hatene nia kbiit atu ezekuta ne’e oinsá. Kuandu nia la ezekuta hotu, fó fila-fali ba konfre Estadu,” nia dehan.

Notísia Relevante: Governu fó prioridade programa neen iha OJE 2022

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here