Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

DILI, 01 jullu 2021 (TATOLI)—Reprezentante Povu iha uma fukun Parlamentu Nasionál (PN) husu Governu rigorozu kontrola pontu entrada sira iha territóriu nasionál hodi prevene variante Delta COVID-19.

Notísia Relevante: CIGC rekomenda suspende pontu entrada fronteira durante loron 14

“Sujere ba Governu ho rigorozu hodi bele kontrola entrada sira, hosi pasajeiru sira hosi nasaun sira-ne’ebé konsidera tama iha kategoria lista mean kona-ba variante (foun) Delta COVID-19. Ezemplu hanesan Índia no Indonézia, ita-nia viziñu ne’ebé mak tama ona iha lista nasaun mean,” Xefe Bankada Frente-Mudança (FM), Isabel Freitas Ximenes, ko’alia iha Parlamentu Nasionál, iha ámbitu revonasaun estadu emerjénsia ba dala-XV.

Nia sujere ba Governu ho rigorozu kontrola fronteira entrada sira hanesan terrestre no aéreu tanba ho dalan ida-ne’e mak Timor-Leste bele asegura entrada hosi variante Delta COVID-19 iha territóriu Timor-Leste,” Xefe Bankada Frente-Mudança ne’e fó hanoin.

Entretantu, Vise-Xefe Bankada Congresso Nacional de Reconstrução de Timorense (CNRT), Deputadu Patrocínio Fernandes dos Reis, ezije Governu taka provizíoriu pontu entranda sira iha fronteira.

“Bankada CNRT rekomenda no ezije ba Governu atu kontinua taka fronteira aéreu, marítima no terrestre ho nasaun viziñu, atu nune’e evita variante Delta COVID-19 tama mai iha Timor-Leste,” nia rekomenda.

Maibé, nia husu tenke tau matan ba pesoál sira iha fronteira, fornese fasilidade hanesan fatin hela ho dignu, hahan, subsídiu frontline no ekipamentu protesaun.

Tanba Bankada CNRT lakohi atu ikus mai Governu uza tán razaun variante Delta COVID-19 hodi estende Estadu Emerjénsia no aplika serka sanitária no konfinamentu obrigatóriu.

Notísia Relevante: Parlamentu Nasionál autoriza Prezidente Repúblika dekreta Estadu Emerjénsia ba dala-XV

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here