Tanente Jenerál Lere Anan Timur. Imajen TATOLI/Egas Cristovão

DILI, 07 jullu 2021 (TATOLI)--Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Lere Anan Timur, hateten atu prevene virus variante Delta COVID-19 ne’ebé agora espalla iha Indonézia, FALINTIL-Forsa Defeza Timor-Leste (F-FDTL) sei reforsa seguransa iha fronteira.

“Atu Timor-Leste labele lori todan ba virus variante COVID-19 ne’e, entaun ita tenke reforsa seguransa iha fronteira. Tanba, ita-nia própriu komunidade ne’ebé iha fronteira mak fasilita sira tama-sai, entaun bainhira reforsa ona seguransa mak tenke reforsa medida,” Tenente Jenerál Lere Anan Timur hateten ba jornalista sira, hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, ohin.

Tenente Jenerál hatutan, medida ne’e tenke aplika ba sira-ne’ebé tama-sai iha fronteira ne’e tenke kumpre kuarentena depois ba hatán iha Tribunál.

Tuir nia, medida hanesan mós tenke aplika ba ema sira-ne’ebé mak fasilita ema seluk tama-sai fronteira, nune’e ema sira-ne’e bele tauk.

“Ha’u hanoin buat hotu-hotu presiza konsiénsia tanba moras (variante Delta COVID-19) ne’e mai, família ida bele mate hotu. Tanba ne’e, ita sei reforsa tan seguransa maibé dahuluk ami mós presiza kria kondisaun liuliu alojamentu ba sira inklui sasán ba prevensaun COVID-19 nian,” nia dehan.

Iha enkontru ne’e, nia dehan, Xefe Estadu hateten haree di’ak forsa sira no ninia apoiu tomak ba PNTL tanba sira-nia misaun mak lutu nasaun no la’o tuir regra no orden iha rai-laran.

Sala Situasaun, Sentru Integradu Jestaun Krize (SIJK), tersa (06.07) rejista kazu pozitivu 46, rekoperadu 29 no kazu ativu 942. Hosi kazu foun 46 ne’e maihosi Dili 31 no munisípiu-sira iha na’in-15 ne’ebé kompostu hosi mane 29 no feto 17.

Kumulativu kazu konfirmadu sura hosi 21 marsu 2020 to’o 06 jullu 2021 hamutuk 9.558. Iha 06 jullu 2021, izolamentu Vera Cruz halo tratamentu ba kazu detetadu na’in-19, iha área obstetrisia na’in-ualu (8) no iha medisina interna na’in-ualu (8) no sirurjia nain-tolu (3), ia obstetrisia na’in-ualu (8) kategoria leve (mild) hotu, iha área medisina interna na’in-ualu (8), ida (1) grave, uza oksijéniu na’in-rua (2), moderadu na’in-lima 95) leve (mild).

Entretantu iha Indonézia deteta kazu COVID-19 iha tokon 2,31, rekoperadu tokon 1,9 no mate hamutuk 61.140.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here