Koordenadora UPMA, Brígida Soares. TATOLI/António Gonçalves

DILI, 02 jullu 2021 (TATOLI)–Governu liuhosi Semináriu Nasionál Jornada Orsamentál foin lalais hahú define ona tetu ba Orsamentu Jerál Estadu (OJE) tinan 2022 ne’ebé posibilidade fixa ho biliaun $1,5, ho programa prioridade neen.

Tuir Koordenadora Unidade Planeamentu, Monotorizasaun no Avaliasaun (UPMA), Brígida Soares, durante enkontru ho Primeiru-Ministru, Taur Matan Ruak, relata preparasaun orsamentu 2022, ne’ebé daudaun tama ona iha rasionalizasaun programa ne’ebé daudaun deside ona iha Jornada Orsamentál.

“Ezersísiu sira la’o hela no hosi tetu ne’e, iha programa prioridade neen hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira hanesan agrikultura, turizmu, ambiente no konetividade, dezenvolvimentu setór privadu no kooperativa, dezenvolvimentu no governasaun,” Koordenadora UPMA informa hafoin hasoru ho Xefe Governu, iha Rezidénsia, Farol, sesta ne’e.

Notísia relevante: Governu realiza retiru ba preparasaun jornada orsamentál 2021

Tuir Koordenadora ne’e, UPMA la serbisu mesak halo planu annuál tinan 2022, maibé serbisu hamutuk ho Ministériu Finansa (MF) hodi asegura implementasaun estrutura bazeia ba programa tinan oin no kontinua la’o tuir prioridade no tetu ne’ebé deside ona.

“Biban ne’e, ami relata ba Primeiru-Ministru kona-ba rezultadu ezekusaun OJE 2021 hosi Governu tomak, daudaun ne’e atinje ona 32%,” nia akresenta.

Koordenadora nota mós katak públiku kestiona ezekusaun tinan ne’e la’o neneik kompara ho tinan kotuk, maibé tinan ne’e Governu tomak utiliza orsamentu bazeia ba programa ne’ebé bainhira atu gasta tenke bazeia ba programa ne’ebé trasa ona.

“Entaun gasta sira uluk halo mudansa oinoin ne’e la aplika ona, ne’ebé gasta bele kiik maibé rezultadu mak importante no di’ak, ne’e maka hotu-hotu hakarak,” nia hatutan.

Nia mós konsidera, ezekusaun menus tanba situasaun COVID-19 ne’ebé impoin Estadu emerjénsia, Serka Sanitária no Konfinamentu Domisiliáriu, afeta ba meta sira ne’ebé tenke atinje iha trimestre dahuluk no la konsege tanba situasaun.

Senáriu sustentabilidade haat

Durante Jornada Orsamentál ne’ebé realiza iha loron hirak liubá, MF hamosu senáriu sustentabilidade haat ba elaborasaun OJE 2022.

Senáriu dahuluk hanaran sustentável no laiha levantamentu esesu hosi Fundu Petrolíferu, ho despeza totál biliaun $1,08, ne’ebé défise ajustadu ho Rendimentu Sustentável Estimadu (RSE) 0, nune’e mai ho previzaun Fundu Petrolíferu sei la ramata.

Senáriu daruak, hanesan segmentasaun Fundu Petrolíferu, ho despeza totál biliaun $1,52, ne’ebé défise ajustadu ho RSE millaun $437,60, nune’e previzaun Fundu Petrolíferu sei ramata iha tinan 2051.

Senáriu datoluk, olístiku ho despeza totál biliaun $1,60, ne’ebé défise ajustadu ho RSE millaun $513,82, nune’e previzaun Fundu Petrolíferu sei ramata iha tinan 2038.

Senáriu dahaat, ne’ebé tui tendénsia OJE 2021 ho despeza totál biliaun $2,11, ne’ebé défise ajustadu ho RSE biliaun $1,019, nune’e previzaun Fundu Petrolíferu sei ramata iha tinan 2033.

Tuir kalendáriu preprasaun OJE 2022, hahú semináriu Jornada Orsamentál iha loron 29 juñu, aprezentasaun planu makro—fiskál no GOP iha Konsellu Ministru (KM) realiza iha loron 07 jullu.

Aprezentasaun no aprovasaun tetu fiskál dezagregadu realiza iha loron 14 jullu no submisaun proposta orsamentál liña ministériu sira iha loron 13 agostu.

Analiza proposta orsamentál liña ministériu sira no preparasaun pasta verde ne’ebé prepara hosi MF sei realiza iha loron 20 agostu, enkuantu Komisaun Revizaun Orsamentu Polítika (CROP, sigla portugés) halo apresiasaun finál iha loron 10 serembru.

Nune’e, reuniaun KM no aprova Proposta Lei OJE 2022 iha loron 17  setembru, no entrega proposta OJE 2022 ba PN iha loron 01 outubru.

Halo audiénsia entre Governu no PN, no fulan-dezembru 2021 debate proposta OJE 2022 iha loron 30 novembru.

Jornalista : Antónia Gusmão

Editora     : Julia Chatarina  

HAKEREK NO HATÁN

Please enter your comment!
Please enter your name here