Ilustrasaun ba violénsia.

DILI, 02 jullu 2021 (TATOLI)—Diretora Nasionál Polítika Jéneru no Inkluzaun, Sekretária Estadu Igualdade Inkluzaun (SEII), Maria Filomena Babo Martins, hateten SEII hamutuk ho sosiedade sivíl, liuhosi programa inisiativa spotlight kontinua halo formasaun kona-ba Lei Kontra Violénsia Doméstika (LKVD) no Violénsia Bazea ba Jéneru (VBJ) ba estudante sira iha territóriu nasionál.

Notísia Rerlevante: Janeiru-juñu, SEII simu kazu violénsia doméstika 576

“Relasaun ho númeru kazu violénsia doméstika ne’ebé kontinua aas, SEII hamutuk ho rede referál (sosiedade sívil) halo advokásia no fó formasaun nafatin ba estduante sira kona-ba violénsia doméstika no violénsia bazea ba jéneru. Tanba, liuhosi formasaun ne’e bele hasa’e estduante sira-nia koñesimentu, nune’e bele prevene violénsia doméstika no violénsia bazea ba jéneru iha Timor-Leste,” Maria Filomena Babo Martins hateten ba Agência TATOLI, liuhusi telefónika, sesta ne’e.

Nia hatutan, objetivu formasaun ne’e atu hasa’e estudante sira-nia nia koñesimentu kona-ba igualdade jéneru, Lei Kontra Violénsia Domestika (LKVD) no Violénsia Bazea ba Jeneru (VBJ), atu estudante sira bele halo prevensaun ba kazu violénsia kontra feto no labarik-feto iha eskola, família no iha sosiedade.

Tuir nia, sosiedade sivíl kuaze halo sensibilizasaun ba violénsia hirak ne’e tanba hetan suporta no apoiu hosi programa inisiativa Spotlight, ne’ebé daudaun ne’e SEEI no rede referál sira hala’o sensibilizasaun no formasaun iha munisípiu Bobonaro, Ermera no Viqueque.

“Ida-ne’e ami atu prevene no hapara violénsia doméstika no violénsia bazea ba jéneru kontra feto, labaik-feto, no grupu vulnerável sira, ne’ebé serbisu hamutuk ho UN Women Timor-Leste liuhosi programa inisiativa spotlight, hodi fó formasaun kona-ba LKVD no VBJ ba estudante sira hosi eskola sekundária,” nia dehan.

Notísia Rerlevante: Kombate Violénsia Bazea ba Jéneru presiza involve organizasaun sosiedade sivíl

Diretora ne’e afirma, dezenvolvimentu Timor-Leste komesa la’o ba oin no presiza ema hotu nia involvimentu atu kontribui ba dezenvolvimentu iha área hotu-hotu liu-liu atu promove igualdade jéneru, halakon diskriminasaun no violénsia oioin hasoru feto, labarik feto no grupu vulnerável sira.

“Presiza fó hanoin ba ita atu hatene, balansu entre feto no mane nomós violénsia barak mak sei akontese iha ita-nia rai ne’ebé loron ba loron tuir estatístika sempre sa’e. Tanba ne’e, Governu trasa polítika liuhosi estratéjia oioin hodi bele hasa’e sidadaun nia konsiénsia atu prevene violénsia iha Timor-Leste,” nia dehan.

Dadus violénsia doméstika-violénsia bazea jéneru 576

Aleinde ne’e, diretora ne’e informa, dadus kazu violénsia doméstika no violénsia bazea ba jéneru ne’ebé SEII simu hosi rede referál sira hanesan Alfela, FOKUPERS, Organizasaun Naun Govermentál (ONG), Pradet no PNTL Dirasaun Vulnerável Person Unit (VPU) ne’e hamutuk 576.

Tuir nia, hosi númeru ne’e prosesu kazu tenke emidiatu tanba bainhira rejista ona mak hein Ministériu Públiku labainhira mak atu halo julgamentu. Prosesu kazu hanesan violénsia doméstika ne’e krime públiku entaun Alfela mak akompaña to’o ramata.

Tanba, diretora ne’e esplika, lei kontra violénsia doméstika iha artigu 24 ne’e regula kona-ba knaar Polísia Nasionál Timor-Leste (PNTL) Ka VPU nian, entaun bainhira akontese sira halo kedas intervensaun.

Notísia Relevante: PNTL-ALFELA-PNUD luta elimina violénsia kontra feto-labarik feto

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here