Komandante Jerál PNTL, Komisariu Polísia Faustino da Costa, hala’o ekontru ho reprezentante Asisténsia Legál ba Feto no Labarik (ALFELA) no Programa Nasaun Unida ba Dezenvolvimentu (PNUD). Imajen/PNTL.

DILI, 28 abríl 2021 (TATOLI)—Komandu Jerál Polísia Nasionál Timor-Leste (PNTL) hamutuk ho parseiru dezenvolvimentu hanesan Asisténsia Legál ba Feto no Labarik (ALFELA) ho Programa Nasaun Unida ba Dezenvolvimentu (PNUD), sei implementa programa “Spotlight” ka elimina violénsia kontra feto no labarik feto iha Timor-Leste (TL).

Komandante Jerál PNTL, Komisáriu Polísia, Faustino da Costa konsidera serbisu hamutuk ne’e importante atu bele proteje direitu feto no labarik feto-sira.

Notísia relevante:ALFELA Rejista Kazu Violasaun 452 Hasoru Feto ho Labarik

Iha tinan 2019, parte jéneru Komandu PNTL aprova ona Planu Estratéjiku ba tinan lima, ne’ebé koloka programa ida hanaran Spotlight.

“Iha atividade implementasaun programa, kada tinan PNTL liu hosi Planu Asaun Anuál, sempre koloka asuntu igualdade jéneru, violénsia bazeia ba jéneru no mós fasilita parte balun hanesan testamuña ba kazu violénsia doméstika, nune’e bele hetan tratamentu justu,” Komandante PNTL informa liu hosi komunikadu, iha kuarta ne’e.

Autoridade másima instituisaun seguransa ne’e rekoñese, implementasaun polítika atu proteje direitu feto no labarik, hasoru dezafiu tanba ameasa hosi peste letál COVID-19.

Maski hasoru dezafiu, maibé PNTL kontinua hala’o misaun hodi fó asisténsia ba ema hotu-hotu.

PNUD ho ALFELA promete mós katak, sei apoia Komandu PNTL liu hosi formasaun ba membru Polisiamentu Komunitária, hodi hala’o atendimentu di’ak ba kazu violénsia doméstika no violénsia bazeia ba jéneru.

Programa ne’e sei implementa iha munisípiu tolu hanesan Ermera, Maliana ho Viqueque no PNTL mak sai na’in ba programa ne’e.

PNUD no ALFELA liu hosi fundu spotlight sei fornese mós komunikasaun ba maluk membru Vulneravel Person Unit (VPU), ne’ebé iha Munisípiu tolu no sei apoia mós direitu membru VPU-sira.

Kona-bá ne’e, Komandu PNTL, realiza ona reuniaun hamutuk ho ALFELA no PNUD ne’ebé marka prezensa mós hosi Xefe Serbisu Investigasaun Kriminál Nasionál (SIKN), Xefe Gabinete Relasaun Internasionál, Sub Xefe Gabinete Jéneru PNTL, Xefe VPU Nasionál no Sub Xefe Departamentu Polisiamentu Komunitária Nasionál.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here