Sekretária Estadu Igualdade no Inklusaun, Maria Jose da Fonseca Monteiro de Jesus. Imajen Tatoli/ Egas Cristovão

DILI, 28 juñu 2021 (TATOLI)—Sekretária Estadu Igualdade Inkluzaun (SEII), Maria José Fonseca Monteiro de Jesus, informa hosi fulan janeiru to’o juñu tinan ne’e SEII simu kazu violénsia doméstika hamutuk 576 no violénsia bazea jéneru hamutuk 49 hosi polísia VPU nasionál.

Notísia Relevante: 2019, SEII rejistu kazu violénsia doméstika-asédiu seksuál hamutuk 1.338

“Dadus sira-ne’e fornese hosi Polísia-VPU Nasionál no iha vítima na’in-rua ka tolu mak direta mai SEII. Maibé, entrega fali ba parseiru sira-ne’ebé iha ligasaun ho violénsia doméstika, nune’e parseiru sira akompaña prosesu kazu ne’e,” Maria José Fonseca Monteiro de Jesus hateten ba Ajénsia TATOLI, segunda ne’e.

Nia dehan, servisu rede referál nian mós sai hanesan responsabilidade ida ba SEII atu haree no asegura katak parseiru sira iha rede referál halo nia serbisu no tenke hetan apoiu hosi pozisaun Governu nian.

Parseiru sira-ne’e bele fó asisténsia hodi guia, nune’e parte hotu ne’ebé iha rede referál bele halo serbisu sira ho di’ak atu bele fó apoiu no protesaun di’ak liu ba maluk sobrevivente sira.

Governante ne’e hatutan, atu prevene no hapara violénsia doméstika no violénsia bazea ba jéneru kontra feto, labaik-feto, no grupu vulnerável sira, SEII serbisu hamutuk ho UN Women Timor-Leste liuhosi programa inisiativa Spotlight fó formasaun kona-ba Lei Kontra Violénsia Doméstika (LKVD) no Violénsia Bazea ba Jéneru (VBJ) ba estudante sira iha munisípiu sira.

Objetivu hosi formasaun ne’e, nia dehan, atu hasa’e koñesimentu estudante sira nian kona-ba igualdade jéneru, LKVD no VBJ hodi nune’e estudante sira bele halo prevensaun ba kazu violénsia kontra feto no labarik-feto iha eskola, família no iha sosiedade.

Entretantu Diretora Nasionál ba Politika Jéneru no Inkluzaun, Maria Filomena Babo Martins hateten dezenvolvimentu Timor-Leste komesa la’o ba oin no presiza ema hotu nia envolvimentu atu kontribui ba dezenvolvimentu iha área hotu-hotu, tanba ne’e SEII nia papél atu promove igualdade jéneru, halakon diskriminasaun no violénsia oioin hasoru feto no grupu vulnerável seluk.

Kazu violénsia doméstika ba tinan 2020 hamutuk 1.082 no violénsia bazea ba jéneru iha 237 no kazu hirak ne’e sei ba aprezenta iha Parlamentu Nasionál.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here