Embaixadór Uniaun Europeia iha Timor-Leste, Andrew Jacobs. Imajen TATOLI/António Gonçalves

DILI, 18 fevereiru 2021 (TATOLI)–Embaixadór Uniaun Europeia iha Timor-Leste, Andrew Jacobs, hateten atu kombate Violénsia Bazea ba Jéneru (VBJ) presiza involve Organizasaun Sosiedade Sivíl (OSS) sira.

Notísia Relevante: Rede Feto-World Vision estabelese forum nasionál hapara violénsia hasoru feto

“Ami iha komítmentu makaas atu hapara krime violénsia hasoru feto no labarik feto sira, ne’ebé sai ona hanesan konflitu ne’ebé aas tebes iha ita-nia sosiedade tomak. Ida-ne’e sei imposível atu kombate violénsia bazea ba jéneru ho susesu, sein iha involvimentu hosi sosiedade sivíl,” Andrew Jacobs hateten iha  Fórum Nasionál Hapara Violénsia Kontra Feto no Labarik Feto Sira iha  salaun Katedral Vila Verde, Dili, kinta ne’e.

Nia hateten, organizasaun sosiedade sívil sira dala barak mak sai hanesan autór primeiru atu deteta no responde ba problema sira. Tanba, sira to’o iha komunidade no família sira, Governu no instituisaun sira hodi provoka mudansa no buka solusaun ba kestaun refere.

Tanba ne’e, nia dehan, liuhosi fórum ne’e sai nu’udar oportunidade di’ak ida ba Organizasaun Sosiedade Sivíl sira (OSS) sira atu oinsá deside no kolabora hamutuk ho forsa sira hodi prevene violénsia seksuál, proteje vítima sira, hapara imunidade ba arguidu sira, no atu asegura asesu ba saúde no justisa ba vítima sira.

Entretantu, Koordenadór Rezidente Organizasaun Nasaun Unida (ONU), Roy Trivedy, hateten violénsia hasoru feto no labarik feto nu’udar moras-peste ida-ne’ebé tenke elimina iha sosiedade hotu-hotu iha Timor-Leste, karik bele responde ba violénsia bazea ba jéneru iha tinan 5-10 oin mai.

“Ita bele hatene katak ita-nia oportunidade sira atu alkansa Objetivu Dezenvolvimentu Sustentável to’o tinan 2030 sei aumenta makaas. Mak Fórum Nasionál Hapara Violénsia Kontra Feto no Labarik Feto loke espasu ba kolaborasaun entre OSS ho ONU no parseiru xave sira seluk, atu servisu hamutuk ho povu Timor-Leste hodi elimina dala ida no ba ema hotu ho forma violénsia hotu-hotu hasoru feto no labarik-feto sira,” nia hateten. 

Nia hateten, ONU prontu atu suporta fórum hapara violénsia hasoru feto no labarik feto sira ida-ne’e, no atu asegura katak feto no labarik feto sira bele goza sira-nia moris livre hosi violénsia.

Tanba, tuir nia, investimentu tinan tolu hosi programa EU ne’ebé hetan apoiu iha Timor-Leste ho montante millaun $15, ho nia objetivu mak atu hametin kuadru legál no instituisaun sira nasaun nian.

Nia dehan, promove norma sosiál pozitivu sira hodi hasa’e asesu ba servisu apoiu nian sira ba sobrevivente sira hosi violénsia hadi’a rekolla no utilizasaun dadus sira hodi halo polítika ida ne’ebé di’ak liu no hametin parséria ho organizasaun sosiedade sívil sira.

Notísia Relevante: UE kontinua apoia kombate violénsia bazea ba jéneru iha TL

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here