STAE no CNE ofisialmente halo lansasamentu ba resensiamentu eleitorál no atualizasaun baze dadus ba preparasaun Eleisaun Prezidensiál 2022. Imajen TATOLI/Egas Cristóvão.

DILI, 01 jullu 2021 (TATOLI)—Sekretariadu Tékniku Administrasaun Estatál (STAE, sigla portugés) no Komisaun Nasionál Eeleisaun (CNE, sigla portugés), kinta ne’e lansa ofisialmente resensiamentu eleitorál no atualizasaun baze dadus iha nível territóriu nasionál ba preparasaun Eleisaun Prezidensiál 2022.

Notísia Relevante: PN altera ona pakote lei eleitorál tolu iha finál globál

Diretór Jerál Sekretariadu Tékniku Administrasaun Estatál (STAE), Acilino Manuel Branco, hateten maske pandemia COVID-19 maibé lahamate espíritu órgaun eleitorál rua nian hodi kontinua halo preparasaun ba eleisaun prezidensiál 2022 iha territóriu nasionál, hanesan preparasaun enkuadramentu legál no tékniku ne’ebé órgaun eleitorál rua prezide no promove iha terrenu.

Diretór Jerál Sekretariadu Tékniku Administrasaun Estatál (STAE), Acilino Manuel Branco. Imajen TATOLI/Egas Cristóvão.

“Ohin, ita lansa resensiamentu eleitorál no atualizasaun baze dadus ba nível territóriu nasionál. Iha tempu badak, karik situasaun la’o di’ak mak ita sei halo prosesu hanesan iha rai-li’ur. Ohin, ita halo lansamentu ba nível nasionál no ohin mós munisípiu 11 inklui Rejiaun Administrativa Espesiál Óe-Cusse Ambeno (RAEOA) halo prosesu ne’ebé hanesan, nune’e ita transmite informasaun ba ema hotu katak hahú ohin ita halo resensiamentu eleitorál,” Diretór STAE ne’e hateten ba jornalista sira, iha salaun Laline-Larigutu, Colmera, Dili, kinta ne’e.

Hanesan órgaun eleitorál, nia hateten, iha kompeténsia tomak ne’ebé atribui katak partidu politíku sira mós hahú hetan akreditasaun halo fiskalizasaun no sei hato’o kartaun fiskál nian, nune’e mós prosesu sensibiliizasaun ba komunidade la’o iha baze para oinsá hola parte inklui prosesu terrenu no lojístika ninian.

Prosesu resensiamentu eleitorál ne’e sei hahú ohin ho durasaun fulan neen (6), ne’ebé sei hahú segunda (05/07) semana oin ba territóriu nasionál to’o postu administrativu sira no sei atualiza sidadaun sira-nia kartaun eleitorál.

“Agora mós ita sei lansa eleitorál potensiál sira-ne’ebé atinje ona tinan 16 no sidadaun sira-ne’ebé sei labele vota tuir sira-nia unidade jeografika tanba durante fulan neen sira mós iha oportunidade útil bele halo atualizasaun ba sira-nia kartaun eleitorál. Tanba ne’e, ita hotu nia hamutuk hodi kontribui garante ba susesu ba festa demokrásia no sei hetan taxa partisipasaun maka’as,” nia dehan.

Notísia Relevante: CNE-STAE halo levantamentu ba empreza gráfika atu emprime bulletin votu

Relasiona ho lansamentu ba resensiamentu eleitorál no atualizasaun baze dadus, Ministru Administrasaun Estatál (MAE), Miguel Perreira de Carvalho agradese ba STAE ho CNE ne’ebé realiza ona prosesu resensiamentu eleitorál no atualizasaun baze dadus ba eleisaun prezidensiál.

“Nune’e, ha’u konvida parte hotu-hotu atu presta atensaun ba prosesu resensiamentu eleitorál no atualizasaun baze dadus ba eleisaun prezidensiál 2022,” nia dehan.

Tanba ne’e, Governu konvida autoridade lokál sira-ne’ebé fasilita komunidade atu halo kartaun eleitorál ba tinan 16 ne’ebé seidauk rejistu iha baze dadus atu hakat ba fatin resensiamentu eleitorál ne’ebé STAE iha atu resensia inklui sira-ne’ebé iha kartaun eleitorál.

Partisipante ne’ebé partisipa iha lansamentu ne’e mak hanesan Ministruu Administrasaun Eestatál (MAE), Miguel Perreira de Carvalho, Prezidente Komisaun Nasionál Eeleisaun (CNE), Alcino Barris, Diretór Jerál Sekretariadu Tekniku Administrasaun Estatál (STAE), Acilino Manuel Branco, PNTL, partidu polítiku, ONG, autoridade postu administrativu no xefe suku sira inklui entidade relevante sira seluk.

Notísia Relevante: Governu prevee orsamentu akizisaun materiál eleitorál besik millaun $2

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here