Diretór STAE, Acilino Manuel Branco. Foto Tatoli/Egas Cristovão

DILI, 18 juñu 2021 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa Governu prevee orasamentu akizisaun ba materiál eleitorál besik millaun $2.

Notísia Relevante: MAE-STAE halo preparasaun téknika Eleisaun Prezidensiál marsu 2022

“Ita-nia osan ne’ebé mak Governu prevee ba akizisaun ba materiál eleitorál ninian mak besik millaun $2,” Acilino Manuel Branco hateten ba Agéncia TATOLI, iha Novu Turizmu, Lecidere, Dili, sesta ne’e.

Akizasaun ba materiál eleitorál nian ne’e, tarde liu mak iha fulan-setembru ka fulan-outubru tinan ne’e.

“Ita-nia planu akizasaun ba materiál eleitorál ne’ebé sosa iha rai-li’ur to’o tarde iha fulan-setembru ka outubru, tanba ita-nia eleisaun prezidensiál ba 2022 ne’e sei akontese iha marsu. Tanba ne’e, ami garante katak materiál eleitorál hirak ne’e sei to’o iha setembru nia-laran,” nia dehan.

Nia informa, iha tinan ne’e Governu prevee orsamentu ba STAE millaun $3 maibé ne’e inklui ona ho saláriu vensimentu ba funsionáriu sira, no pesoál sira-ne’ebé halo knaar iha postu administrativu ba resensiamentu sira-nian nomós lori halo ba akizisaun ba materiál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here