Imajen/Media PR.

DILI, 28 juñu 2021 (TATOLI)—Parlamentu Nasionál (PN) segunda ne’e altera ona pakote lei eleitorál tolu kompostu hosi lei órgaun administrasaun eleitorál, lei resensiamentu eleitorál no lei eleitorál ba Prezidente Repúblika iha finál globál.

Parlamentu Nasionál altera ona artigu sira mak hanesan 8, 12, 14 no 15 iha lei órgaun administrasaun eleitorál iha finál globál ho rezultadu votasaun a-favór 62 kontra 0 no abstensaun 0.

Notísia Relevante: Komisaun A altera ona lei eleitorál ba Prezidente Repúblika iha espesialidade

Reprezentante povu sira mós altera ona artigu hamutuk 13 hosi lei resensiamentu eleitorál mak hanesan artigu 12, 13, 15, 16, 17, 22, 23, 26, 29, 30, 34, 36 no 51 iha lei resensiamentu eleitorál iha finál globál ho rezultadu a-favór 62, kontra 0 no abstensaun 0.

Nune’e mós altera artigu hamutuk 11 mak hanesan 19, 31, 32, 36, 38, 39, 40, 41, 44, 45 no 68 iha lei eleitorál ba Prezidente Repúblika ho rezultadu votasaun a-favór 62, kontra 0 no abstensaun 0. 

“Nune’e alterasaun ba pakote lei eleitorál tolu aprovadu iha finál globál,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária.

Notísia Relevante: Komisaun A altera lei resensiamentu eleitorál iha espesialidade

Prezidente Parlamentu Nasionál apresia ho membru Komisaun A ne’ebé konsege diskute ho kle’an ba pakote lei eleitorál tolu ne’e tanba konsege aprova iha finál globál.

Nune’e mós Membru Parlamentu Nasionál, Deputadu Abel Pires da Silva, fó apresiasaun ba komisaun A ne’ebé trata asuntu konstitusionál no justtisa tanba altera ona lei importante hirak ne’e.

Maske nune’e, Deputada hosi Bankada Partidu Demokrátiku (PD) Elvina Sousa, kestiona membru komisaun sira tanba hatama proposta hodi elimina votu “Braille” ba ema ho defisiénsia sira.

Hatán ba preokupasaun ne’e, Membru Komisaun A, Deputada Carmelita Carmelita Caetano Moniz, fundamenta, razaun elimina proposta Governu nian tanba Timor-Leste seidauk iha kondisaun atu aplika.

Entretantu Ministru Administrasaun Estatal, Miguel Pereira de Carvalho, esplika proposta Governu nian atu ajuda defisiente matan atu vota iha fatin segredu ne’e.

“Depois ami halo diskusaun iha komisaun A katak bele introdús votu “Braille” iha eleisaun tuir mai,” Ministru Miguel argumenta.

Hakarak informa ba públiku katak alterasaun hosi lei eleitorál tolu ne’e la’ós substansiál maibé halo de’it emendasaun. Purtantu introdusaun foun iha lei eleitorál ba Prezidente Repúblika mak estabelese sentru votasaun paralelu tanba ho razaun propagasaun surtu COVID-19.

Notísia Relevante: Komisaun A altera lei órgaun administrasaun eleitorál iha espesialidade

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here