Prezidenti Komisaun Nasionál Eleisaun (CNE-Sigla Portugués), Alcino de Araújo Barris, no Diretór Jerál STAE, Acilino Manuel Branco hamutuk ho tékniku sira halo levantamentu ba kompaña impresór buletin votu ba eleisaun prezidensiál iha Taibesi, Kuarta (16/06). Imajen Tatoli/Francisco Sony.

DILI, 16 juñu 2021 (TATOLI)—Prezidente Komisaun Nasionál Eleisaun (CNE-sigla portugés), Alcino Barris hateten, ohin Sekretáriu Tékniku Administrasaun Eleitorál (STAE) ho CNE halo levantamentu ba empreza gráfika tolu (3) iha Dili atu garante kapasidade no kualidade emprime ba buletin votu.

“Agora tempu sei naruk hela maibé ami antesipa no agora ita halo levantamentu ba empreza tolu hanesan Sentru Produsaun Alola Esperansa, Gráfika Nasionál no Empreza Nasionál. Ami haree no ida-ne’ebé mak merese atu emprime buletin votu ne’e. Empreza tolu ne’e mesak Timor-oan nian. Maibé depois haree mak ita haree empreza nia kondisaun ne’e prenxe duni rekezitu ka lae,” Prezidente CNE hatete ba jornalista sira iha salaun STAE, Vera Crúz, Dili, kuarta ne’e.

Levantamentu ne’e akontese tanba esperiénsia ne’ebé liubá sempre motiva nafatin órgaun eleitorál rua, CNE no STAE, tanba emprime buletin votu ne’e matérial sensitivu entaun iha kada periódu eleisaun sempre iha avaliasaun ba empreza, nune’e bainhira emprime buletin votu tenke garante transparante no kualidade di’ak.

CNE ho STAE nia objetivu ida mak eleisaun saida de’it tenke kualidade, atu ema hotu-hotu garante kualidade atendementu, garante satisfasaun no verasidade maibé vitória povu determina.

Tanba esperiénsia hatudu iha 2009 ne’e, buletin votu tinta fakar iha leten no konsege halo isu barak iha públiku, entaun ekipa STAE hamutuk ho CNE ba haree empreza hodi deside empreza ne’ebé mak iha nia kondisaun di’ak no asegura materia sensitivu ne’e.

Entretantu, Prezidente Konsellu Diretivu Grafika Nasionál, Jaime Correia hateten ekipa hosi STAE ho CNE mai vizita no haree ekipamentu Grafika Nasionál nian no halo avaliasaun ba preparasaun ba emprime buletin votu ba eleisaun 2022 nian.

“Ami prontu tanba ami-nia ekipamentu di’ak tebes no ho kualidade, nomós ami-nia funsionáriu sira iha ne’e prepara ona atu emprime. Karik, Governu fó fiar mai ami, ami sei asegura no fó seguransa ba emprime buletin votu no ami sei konklui emprime tuir kalendáriu ne’ebé STAE ho CNE fó ba ami,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here