Primeiru Ministru (PM), Taur Matan Ruak, simu audiénsia hosi Ministru Edukasaun Juventude no Desportu (MEJD), Armindo Maia. Imajen/Média GPM.

DILI, 28 juñu 2021 (TATOLI) -Estudante no profesór-sira iha territóriu nasionál seidauk sente no seidauk hetan benefísiu hosi Ministériu Edukasaun, Juventude no Desportu  (MEJD) iha programa eskola online ho ferramentu teknolojia sofistikadu durante períodu implementasaun Estadu emerjénsia, serka sanitária no konfinamentu obrigatóriu.

Liuhosi proposta Orsamentu Retifikativu (OR) 2021, MEJD propoin montante orsamentu millaun  $3.2 atu fó subsídiu pulsa internet ba estudante iha territóriu Timor-Leste hosi ensinu báziku to’o ensinu sekundáriu purvolta estudante 21.551  (dadus MEJD nian).

Notísia relevante : MEJD sei apoiu pulsa internet ba estudante ensinu báziku no sekundáriu-sira

Maske proposta orsamentu ne’e, Prezidente Repúblika (PR),  Francisco Guterres “Lú-Olo” promulga tiha ona  iha loron, 03 maiu 2021, maibé to’o ohin loron, subsídiu ne’e seidauk implementa.

Governu liuhosi MEJD “mehi boot” iha nia kompromisu ba konseitu programa eskola online,  maibé pratikamente  to’o agora estudante-sira seidauk hetan nia benefísiu.

Notísia Relevante : PR Lú Olo promulga ona Orsamentu Retifikativu

Ministru Edukasaun Juventude no Desportu, Armindo Maia. Imajen/Antonio Goncalves

Responde ba ida-ne’e, Ministru Edukasaun, Juventude no Desportu (MEJD), Armindo Maia, hateten, prosesu subsídiu pulsa online ne’e sei  iha faze komunikasaun no negosiasaun entre MEJD ho operadór telekomunikasaun tolu ne’ebé eziste iha Timor-Leste; Timor Telecom (TT), Telkomcel ho Telemor .

“Ami sei ko’alia ho kompañia operadór telekomunikasaun-sira, sé mak bele asesu tanba estudante-sira tenke iha númeru telefone,” Ministru Edukasaun Juventude no Desportu  (MEJD), Armindo Maia, haktuir hodi responde jornalista Agência Tatoli iha Covalima iha loron 19 juñu 2021.

Atu asegura no konfirma katak programa eskola online ne’e implementa   loloos tuir MEJD  nia iha kompromisu hodi benefisia ba grupu alvu (target group), Agência Tatoli dada-lia ho estudante balun iha Dili laran rasik no balun iha Munisípiu Viqueque ho Covalima.

Estudante balun Dili laran deklara katak,  sira rona duni kompromisu Ministru Edukasaun, Juventude no Desportu (MEJD), Armindo Maia, liuhosi meiu komunikasaun sosiál ka mídia-sira, katak Governu sei fó subsídiu pulsa internet ba estudante-sira, mas realidade to’o agora sira rona de’it hanesan lia-anin ka laiha realidade.

Natalino Verdiál Carvalho, estudante Ensinu Sekundáriu Jerál (ESJ) 4 setembru, Balide, ho  Zacarias Andrade, estudante Ensinu Báziku Sentrál (EBC) 30 de Agostu, Comoro, hateten, mezmu sira laiha kbiit atu sosa rasik smartphone hodi partisipa ensinu aprendizajen online, maibé ho esforsu inan-aman nian ajuda ona sira sosa telefone ka smartphone. Problema maka loron-loron enxe hela de’it pulsa to’o osan laiha ona.

Natalino Verdiál Carvalho ho Zacarias, nu’udar estudante sira iha obrigasaun boot atu buka referénsia no konsulta proativu ho profesór-sira to’o iha fulan maiu, liuhosi ba eskola direita hodi simu matéria ho rezumu no balun asesu hosi mensajen grupu WhatsApp.

Zacarias rasik buka esforsu atu enxe pulsa internet no ativa pakote loron-loron, maibé dala ruma mós rede internet ne’ebé monu beibeik kontribui tebes atu asesu ensinu aprendizajen online la efetivu.

Estudante Ensinu Sekundáriu Jerál Suai, Covalima. Imajen Tatoli/Celestina Teles

Situasaun ne’ebé enfrenta hosi estudante-sira iha kapitál Dili, lases mós ho estudante-sira iha munisípiu. Mezmu sira iha telefone, maibé difisil atu enfrenta aula aprendizajen online tanba laiha osan atu loron-loron sosa pulsa internet no ironia liután rede internet iha munisípiu maonu beibeik. Seidauk tan eletrisidade ne’ebé kontinua mate-lakan.

Estudante Eskola Sekundáriu Jerál (ESJ) 01 Uatulari, Sabika Besi Kulit, Isabel Freitas ho Celestina Freitas,  iha Munisípiu Viqueque, mós hateten to’o agora nia ho nia maluk sira seidauk hetan subsídiu pulsa internet no sira la bele aprende buat ruma hosi aula online.

Estudante hosi eskola Sekundária Katólika Ave Maria, Suai, Covalima, Avelina Sandra Silva Barros, ho estudante Eskola Sekundáriu Jerál (ESJ) 01 Suai, Francisco Hilário Tarcísio, informa mós katak to’o agora sira seidauk simu subsídiu pulsa internet ne’e.

“Ami rona informasaun Governu atu fahe pulsa ba estudante  sira durante implementa serka sanitária, maibé to’o agora ami seidauk simu pulsa,” estudante hirak ne’e hateten liuhosi entrevista ho Agência Tatoli iha ida-idak nia munisípiu, foin lalais.

Ba estudante-sira Sekundária Katólika Ave Maria, Suai, profesór-sira organiza aula online durante tempu serka sanitária ho maneira profesór-sira fahe rezumu matéria no bainhira estudante-sira duvida bele kontaktu ba profesór-sira liuhosi grupu WhatsApp.

Eskola Tékniku Vokasionál ida  iha Postu Administrativu Uatulari, Munisípiu Viqueque, labele fasilita ensinu aprendizajen online ba nia estudante-sira tanba laiha duni meiu no kapasidade.

Diretór Eskola Tékniku Vokasionál Kalo-Heda Uatulari, Samuel da Costa Soares da Silva, hateten, ba eskola-sira iha kapitál Dili kala haree ba eskola online ne’e fasil, maibé estudante-sira iha foho difisil tebe-tebes. Tanba ne’e, meiu ne’ebé eskola foti maka fahe de’it rezumu materia ba estudante-sira estuda iha uma.

Governu sei halo negosiasaun

Ministru Edukasaun Juventude no Desportu, Armindo Maia.Imajen/Antonio Goncalves

Ko’alia ba Agência Tatoli iha tempu halo vizita Eskola Sekundáriu Jerál 01 Suai, Covalima,  19 juñu 2021, Ministru Edukasaun Juventude no Desportu (MEJD), Armindo Maia, afirma katak Governu sei halo negosiasaun kona-bá subsídiu pulsa internet ba estudante-sira.

“Ami sei ko’alia ho kompañia operadór telekomunikasaun-sira, sé mak bele asesu tanba estudante-sira tenke iha númeru telefone,” Ministru  Armindo Maia hateten hodi subliña tan, prosesu ne’e sei lori tempu tanba MEJD sei haree ninia mekanizmu.

“Ita hatene, ita nia operadór tolu; Timor Telecom, Telemor ho Telkomcel. Laiha tan seluk. Ami  sei haree hela mekanizmu,” Armindo Maia informa

Governante mós esplika, polítika Governu implementa eskola ba uma ne’e programa ne’ebé di’ak.

“Iha difikuldade. Ita hatene balun asesu ba televizaun, laiha rede internet no  inan-aman nia nivel Edukasaun la sufisiente atu ajuda oan sira. Ita hatene katak programa eskola ba uma estudante 20% ka 30% mak akompaña, maibé ita la’o nafatin di’ak liu duke laiha rezultadu, nune’e Ministério sei halo esforsu hodi kontinua hadi’a,” Armindo Maia hateten.

Enkuantu aprovasaun Orsamentu Retifikativu ba Ministériu Edukasaun Juventude no Desportu aloka millaun $3.2 atu apoiu pulsa internet ba estudante ensinu báziku no sekundáriu sira.

TLCE apresia ho esforsu MEJD

Koordenadór nasionál TLCE, José Monteiro. Imajen Tatoli/Tomé Amado

Timor-Leste Coalition for Education (TLCE) hanesan koligasaun no rede ba Organizasaun Sosiedade sivíl sira, servisu ba Dezenvolvimentu Edukasaun Timor-Leste  ho nia vizaun “Edukasaun Kualidade  no  Asesivel ba Ema Hotu”, konkorda absolutamente no konsidera esforsu MEJD nian hodi aloka orsamentu millaun $3.2  apoiu pulsa internet ba estudante-sira ensinu báziku to’o ensinu sekundáriu di’ak tebes.

“MEJD nia kompromisu ne’e signifikativu no ajuda tebes estudante ho inan-aman sira atu sira-nia oan kontinua aprende hosi uma kona-bá matéria eskola nian,” koordenadór TLCE, José Monteiro, hateten ba Agência Tatoli iha nia serbisu fatin, Dili, foin lalais ne’e.

Iha tinan kotuk, TLCE mós halo peskiza ki’ik ida hatudu katak estudante balun iha telefone ka smartphone, maibé laiha pulsa. Tanba ne’e TLCE haree polítika MEJD nian ne’e bele ajuda sira eskola hosi uma.

Peskiza TLCE nian ne’e prova mós katak eskola ba uma ka eskola online ne’e nia efisiénsia tebes tanba estudante-sira partisipa ensinu aprendizajen hosi uma de’it. Maibé hamosu  problema uitoan tanba estudante balu de’it maka akompaña, maibé balu mós lae.

TLCE nia peskiza iha tinan kotuk hatudu sira ne’ebé la akompaña ho razaun barak dehan, balu telefone smartphone laiha, televizaun, rádiu no eletrisidade laiha.

TLCE nia perspetiva kona-bá efetividade ne’e profesór-sira ko’alia matéria saida iha programa eskola ba uma ne’e estudante-sira tenke akompaña hodi hatene, tanba Timor-Leste prosesu aprendizajen ne’e sentrál liubá profesór-sira, mezmu aplika ona métodu aprendizajen maibé bainhira inan-aman la akompaña oan-sira tuir programa refere no  husik oan-sira mesak mak tuir, ne’e estudante pasiva (halimar de’it) tanba ne’e presiza akompaña.

Ho menus liu efetividade iha programa Eskola ba Uma online ne’e, TLCE  rekomenda atu ukun-na’in-sira tenke hanoin ona halo revizaun atu estudante sira-nia partisipasaun bele sai efetividade, maibé TLCE mós komprometidu atu halo peskiza foun ida hafoin Timor-Leste tama iha situasaun normal, hakotu ona konfinamentu obrigatóriu no serka sanitária.  Maske nune’e, TLCE nia relatóriu hatudu katak durante serka sanitária no konfinamentu domisiliáriu,  estudante-sira 23% de’it maka partisipa iha programa Eskola Online ka Eskola ba Uma.  Ida-ne’e hatudu tendénsia partisipasaun menus.

Rekomendasaun ne’ebé TLCE hato’o ba Governu mak programa eskola ba uma ne’e tenke ba oin maske serka sanitária ne’e ramata ka la ramata presiza orsamentu nafatin atu finansia.

Inan-aman la sente benefísiu

Estudante-sira simu rezumu matéria iha eskola. Imajen Tatoli/Egas Cristóvão

Hosi dada-lia Agência Tatoli nian ho estudante-sira nia inan-aman balun iha Dili laran, maioria hato’o sira-nia preokupasaun ba programa eskola online ne’e, tanba tuir sira katak eskola online ne’e la benefísiu sira-nia oan hanesan estudante iha ensinu aprendizajen online.

Aguida da Silva dos Santos, ne’ebé nia oan feto eskola iha Eskola Bázika Sentrál (EBC) Faról, Dili, fó sasin katak, programa eskola online laiha benefísiu ba labarik estudante-sira iha edukasaun báziku siklu 1,2 tanba sira lahatene atu halo saida. Programa online ne’e merese implementa bá estudante ensinu sekundáriu no ensinu superiór-sira.

“To’o agora ha’u la haree hetan partisipasaun ativu oan-sira nian iha programa ensinu aprendizajen online. Sira haree programa ne’e foun loos,” Aguida da Silva hateten.

Domingas Oliveira, nu’udar  inan hosi estudante iha eskola Ensinu Báziku Filiál Doque de Caxias Bemori ho Carlito Noronha dos Santos, nu’udar aman hosi estudante  terseiru siklu iha EBC, Sergio Viera de Melo, Becora, Dili, fó hanoin katak, konseitu hosi eskola online ne’e kapás tebes. pratika maka la efisiénsia tanba sira-nia oan enfrenta difikuldade ba fasilidade smartphone no laiha pulsa atu ativu internet loron-loron tuir oráriu eskola ba online nian.

“Ami inan-aman rekomenda ba Governu liu-liu Ministériu Edukasaun, di’ak liu reativa ona atividade ensinu aprendizajen prejensiál iha eskola,” Domingas ho Carlito nia mensajen.

Liafuan no preokupasaun hanesan mós hato’o hosi  Martinho Mendonça nu’udar aman hosi estudante ida iha Eskola Sekundáriu Jerál  01 Suai. Nia  hateten, nia oan-sira difisil tebes pratika eskola online tanba rede internet ladi’ak no osan laiha atu sosa pulsa fó oan-sira.

Aderita da Conceição ho Maria da Cruz, nu’udar mós inan ba estudante balun iha Covalima, konfesa momoos katak sira lahatene saida maka ensinu aprendizajen online tanba sira-rasik la komprende saida mak eskola online no eskola online ida oinsá ho uza saida.

“Se ami rasik la komprende internet, oinsá maka ami atu akompaña ami nia oan sira atu partisipa ativu iha eskola online. Ami hakarak maka ami nia oan sira ba fali eskola hanesan baibain,”  Aderita da Conceição ho Maria da Cruz hateten ba Agência Tatoli iha Covalima.

Profesór-sira mós konsidera laiha benefísiu

“Mehi” kona-bá programa eskola online ne’e di’ak tebes, maibé Dirijente EBC, Sergio Viera de Melo, Dili, diretór Ensinu Sekundáriu Jerál (ESJ) 01 Uatulari, Sabika Besi Kulit, Adileno da Cruz, ho Diretór  Eskola Sekundáriu Jerál 01 Suai, Francelino Freitas, konsidera programa ne’e laiha benefísiu tanba estudante-sira seidauk iha koñesimentu oinsá atu utiliza plataforma online iha ensinu aprendizajen ho di’ak.

Diretór interinu EBC Sergio Viera de Melo, Afonso Soares ho nia belun profesór na’in-rua; Adileno da Cruz  no  Francelino Freitas, hetan ona informasaun katak MEJD prevee ona orsamentu ho montante milaun $3.2 atu apoiu pulsa internet ba estudante sira. Mas,  realidade to’o oras ne’e estudante-sira seidauk hetan pulsa atu asesu ba programa ensinu aprendizajen online.

Manorin na’in-tolu hosi diferente eskola, ida hosi  Dili, iha seluk hosi  Viqueque no hosi Covalima ne’e, mós fiar katak  taxa partisipasaun estudante-sira iha prosesu ensinu aprendizajen online ne’e la másimu, tanba estudante-sira seidauk habituado (toman) no maioria estudante laiha smartphone ka inan-aman sira laiha kbiit finanseiru atu loron-loron sosa pulsa internet ba oan-sira.

UNICEF konsidera fó impaktu ladi’ak

Reprezentante UNICEF iha Timor-Leste, Bilal Aurang Zeb. Imajen TATOLI/Egas Cristóvão.

United Nation International Children Fund (UNICEF) iha Timor-Leste, hanesan parseiru importante no estratéjiku MEJD nian ba  programa “Eskola ba Uma” ka eskola online haree katak programa ne’e ajuda tebes estudante sira durante pandemia.

“Hanesan ita hotu hatene katak eskola sira taka dezde tinan kotuk to’o ohin loron, ida-ne’e fó impaktu ladi’ak ba ita-nia labarik sira. Hafoin fulan neen, ita estabelese programa “Tele-Eskola” (Eskola ba Uma) hodi apoiu labarik sira estuda iha uma maibé sei hasoru dezafiu barak,” Reprezentante UNICEF iha Timor-Leste ne’e hateten ba jornalista sira, hafoin hala’o ninia enkontru dahuluk ho Prezidente Repúblika, Franicisco Guterres Lú Olo, iha Palásiu Prezidensiál Nicolau Lobato, Bairru Pite, foin lalais ne’e.

UNICEF hamutuk Ministériu Edukasaun Juventude no Desportu (MEJD) prodús ona epizódiu 83, atu nune’e fasilita estudante sira hodi estuda iha uma liuhosi YouTube no televizaun, maibé sei hasoru dezafiu oin-oin. Liuliu konetividade internet nian la’o la di’ak, eletrisidade mate-laka, no uma-kain balun laiha televizaun.

Notísia Relevante : UNICEF: programa “Eskola ba Uma”, estudante sira hasoru dezafiu barak

Komisaun G PN mós konsidera laiha benefísiu 

Governu ho Parlamentu Nasional debate orsamentu ratifikativu iha faze Espesialidade, iha sala plenáriu PN, kuarta (21/04). Imajen Tatoli/Egas Cristovão

Komisaun G Parlamentu Nasionál ne’ebé trata ba asuntu Edukasaun Sidadania, konkorda ho opiniaun públiku ne’ebé  konsidera katak ensinu aprendizajen online laiha benefísiu ba estudante-sira.

Membru Komisaun G PN, Deputadu Gabriel Soares konsidera MEJD apoiu subsídiu pulsa internet bá estudante iha territóriu nasionál atu partisipa iha programa ensinu aprendizajen online ne’e konsidera planu atu halo kontente-an de’it tanba laiha benefísiu hosi programa ne’e rasik.

“Iha difikuldade barak mak ita nia oan sira hasoru, liu-liu estudante sira ne’ebé moris hosi ekonomia família fraku tanba sira sei labele asesu ba programa refere tanba laiha telefone ho kualidade di’ak. Ami observa programa ne’e la efetivu no laiha aproveitamentu di’ak ba estudante sira,” Gabriel Soares, haktuir hodi responde Agência Tatoli iha Parlamentu Nasionál, segunda (21/06/2021).

Komisaun G nia observasaun katak inan-aman sira ho mós estudante-sira seidauk hatoman-an iha kostume eskola virtuál ne’e. tanba turi sira-nia koñesimentu, ensinu aprendizajen ne’e halo iha aula eskola ne’ebé lidera hosi profesór-sira. Ho nune’e, komisaun G rekomendasaun ba Governu buka solusaun atu kria eskola dia sim dia não ka semana sim semana não naran katak Governu orienta, profesór sira kumpre regra MS no OMS nian hodi husu estudante sira atu uza máskara no fase-liman beibeik ho sabaun ka uza dezinfetante.

Hein maka hein

Atu hakle’an liután esforsu  MEJD nian iha faze negosiasaun ho operadór telekomunikasaun tolu-ne’e nian to’o iha ne’ebé no oinsá ona?  Agência Tatoli ba halo konfirmasaun direita ho jestór prinsipál sira Timor-Telecom, Telkomcel ho Telemor iha ida-idak nia servisu fatin iha Timor Plaza, Dili. Infelizmente,  jestór-sira  seidauk bele ko’alia ba mídia tanba konsidera sei iha faze negosiasaun.

Iha loron dahuluk, 15 juñu 2021, Agência Tatoli ba marka audiénsia atu halo entrevista  ho jestór prinsipál iha Timor Telecom, Telkomcel ho Telemor. Resposta ne’ebé funsionáriu sekretariadu katak xefe-sira okupadu hotu. Ho nune’e, kontinua ba tenta fali iha parte meiudia depois oras almosu. Resposta hanesan nafatin.

Iha fali tuir mai, 16 juñu 2021, kontinua ba tuku jestór-sira operadór telekomunikasaun tolu ne’e nia “odamatan” atu bele halo entrevista. Ba dala ida-ne’e Telemor ho Telkomcel kontinua fó resposta labele ko’alia buat ruma tanba seidauk hetan orientasaun hosi superiór-sira.

Loron sira tuir-mai, hosi loron 17 to’o fali loron 23 juñu, Agência Tatoli kontinua ba follow-up atu iha edifísiu operadór telekomunikasaun atu bele halo entrevista, maibé la hetan resposta pozitivu no serteza.

Operadór Timor Telecom, promete  atu fó  resposta maibé husu atu entrevista ne’e atu halo iha meiudia de’it. Infelizmente, to’o oras meiudia nian haruka hein de’it to’o laiha resposta fali hodi dehan de’it katak sira-nia xefe seidauk prontu no husu atu fó hela kopia pergunta-sira.

Fotokópia tiha pergunta jerál hodi submete tuir proposta Timor-Telecom nian, maibé resposta ikus dehan hein de’it maka sira telefone fali no to’o notísia ne’e la telefone no laiha informasaun.

Operadór Telkomcel liuhosi sira-nia funsionáriu administrasaun ida tatoli de’it katak to’o agora sira seidauk iha kontratu ho MEJD atu fasilita pulsa internet ba estudante ensinu báziku to’o ensinu sekundáriu-sira.

Broxura kooperasaun MEJD, UNICEF ho Telemor, kona-bá apoiu programa Eskola ba Uma no Eskola Online. Imajen/Telemor

Operadór telekomunikasaun Telemor liuhosi sira-nia publikasaun Pájina Facebook Telemor fó iha fulan marsu 2020, kona-bá Telemor nia kooperasaun ho MEJD no Unicef hodi fasilita estudante-sira eskola online.

Iha Telemor nia publikasaun, 20 marsu 2020, hateten labarik barak labele atende eskola diretamente tanba restrisaun hirak relasiona ho pandemia COVID-19, inklui estabelesimentu serka sanitária no konfinamentu iha munisípiu balun.  Maibé, aprendizajen labele para ba labarik sira. Tan ne’e, Ministériu Edukasaun, Juventude no Desportu, apoiu hosi UNICEF, kontinua apoia programa Eskola ba Uma no Tele Eskola ne’ebé bele asesu liuhosi kanál oi-oin; televizaun, rádiu no internet.

Baze ba kooperasaun entre parte MEJD, Unicef ho Telemor, Agência Tatoli, buka halo entrevista ho Telemor atu bele hatene estátika tasa partisipasaun estudante sira ne’ebé hetan fasilitasaun hosi Telemor, maibé esforsu hotu Tatoli halo hela deit ho esforsu, tanba tentativa ba edifísiu sentrál Telemor nian iha Timor Plaza, Dili, atu halo entrevista ho jestór prinsipál, maibé  responde ba Agência Tatoli katak  seidauk hetan autorizasaun hosi superiór Telemor nian atu bele ko’alia ba mídia.

Jornalista : Celestina Teles/Arminda Fonseca/Tomé Amado/Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here