Reprezentante UNICEF iha Timor-Leste, Bilal Aurang Zeb. Imajen TATOLI/Egas Cristóvão.

DILI, 07 juñu 2021 (TATOLI)—Reprezentante United Nation International Children Fund (UNICEF) iha Timor-Leste, Bilal Aurang Zeb Durrani, hateten Governu liuhosi Ministériu Edukasaun Juventude no Desportu (MEJD) halo kooperasaun ho UNICEF establese programa “Eskola Ba Uma” hodi ajuda labarik sira durante pandemia, maibé estudante sira hasoru dezafiu barak.

Notísia Relevante: MEJD lansa programa eskola ba uma no tele-eskola

“Hanesan ita hotu hatene katak eskola sira taka dezde tinan kotuk to’o ohin loron, ida-ne’e fó impaktu ladi’ak ba ita-nia labarik sira. Hafoin fulan neen, ita estabelese programa “Tele-Eskola” (Eskola ba Uma) hodi apoiu labarik sira estuda iha uma maibé sei hasoru dezafiu barak,” Reprezentante UNICEF iha Timor-Leste ne’e hateten ba jornalista sira, hafoin hala’o ninia enkontru dahuluk ho Prezidente Repúblika, Franicisco Guterres Lú Olo, iha Palásiu Prezidensiál Nicolau Lobato, Bairru Pite, Dili, segunda ne’e.

Matéria ba programa “Eskola ba Uma” ka “’Tele-Eskola” ne’e, UNICEF hamutuk Ministériu Edukasaun Juventude no Desportu (MEJD) prodús ona espizodiu 83, atu nune’e fasilita estudante sira hodi estuda iha uma liuhosi Youtube no televizaun maibé sei hasoru dezafiu oinoin.

“Programa estuda ba uma ne’e sei hasoru dezafiu barak hanesan konetividade internet nian la’’o ladi’ak, família barak mak eletrisidade mate-lakan no balun televizaun laiha ne’e, oinsá mak estudante sira bele tuir prosesu aprendizajen ne’e ho di’ak,” nia dehan.  

Atu ultrapasa dezafiu ida-ne’e, profesór tenke emprime materiá sira-ne’e atu ajuda labarik sira estuda iha uma. MEJD tenke dezenvolve matadalan ida hodi ajuda profesór sira atu hanorin labarik sira iha uma no mós dezenvolve pakote ida atu ajuda inan-aman sira haree nia oan sira iha uma.

“Ba ida-ne’e, ha’u sei bele ajuda MEJD halo despaixu ida ba INFORDEPE no ba Edukasaun Munisipál para ajuda promove programa eskola ba uma ne’e. Hein katak materiá aprendizajen ne’ebé emprime ona ne’e bainhira liu tiha pandemia COVID-19, labarik sira kontinua uza materia ‘Eskola ba Uma’ ne’e ba nafatin,” nia hateten

UNICEF apoiu vasina AstraZeneca 100.800

Aleinde ne’e, Reprezentante UNICEF iha Timor-Leste ne’e informa katak iha semana ida-ne’e nia laran, UNICEF sei fó apoiu vasina AstraZeneca dozes 100.800 ba Governu Timor-Leste.

“Kona-ba COVID-19 nian, ita hatene katak iha semana ne’e nia-laran ita sei fó tan vasina doze 100.800. Ida-ne’e mak vasina ho doze barak ne’ebé durante ne’e ita fó apoiu ba Governu Timor-Leste,” nia informa.

Durante iha tinan ida-ne’e nia-laran, UNICEF fó ona apoiu vasina AstraZeneca hamutuk dozes 500.000 ba Ministériu Saúde (MS) liuhosi SAMES para oinsá prezerva vasina AstraZeneca no fasilita transporta ba fatin sira-ne’ebé mak dook hosi Dili.

“Ita mós ajuda ona SAMES kona-ba sala ne’ebé malirin no móvel, para oinsá mak transporta vasina sira-ne’e to’o iha munisípiu sira,” nia dehan.

Liuhosi enkontru ida-ne’e, UNICEF mós relata ba Prezidente Rep’ublika kona-ba oinsá kampaña mobilizasaun sosiál no kampaña komunikasaun ninian atu oinsá bele atrai ema hodi bele simu vasina.

“Kampaña ne’e mós ita uza kanál rádiu, televizaun no mós tama no hosi uma ba uma,” nia hateten.

Jornalista  : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here