Ministru Edukasaun Juventude no Desportu, Armindo Maia. Imajen Tatoli/Egas Cristovão

DILI, 07 maiu 2021 (TATOLI) – Ministru Edukasaun Juventude no Desportu (MEJD), Armindo Maia, katak Orsamentu Retifikativu ho montante millaun $3,2 ne’ebé aloka ba MEJD sei ezekuta ho didi’ak atu apoiu pulsa internet ba estudante ensinu báziku no sekundáriu-sira.

Notísia Relevante : MEJD distribui materiál limpeza ba Eskola Báziku tolu

Ministru Armindo Maia hateten, dadus estudante ne’ebé sei simu apoiu pulsa internet ne’e purvolta na’in-21,551 hodi bele akompaña programa eskola ba uma ho modelu aula distánsia ka aula online.

“Ita espera orsamentu ne’e sei bele ezekuta iha tempu besik, tanba orsamentu ne’e hetan ona promulgasaun hosi Prezidente Repúblika,”  Ministru Armindo Maia hateten ba jornalista sira iha Salaun Ian Martin, INFORDEPE, Dili, sesta ne’e.

Ministru Armindo Maia hateten, maske orsamentu atu apoiu pulsa internet ba estudante sira foin mak hetan promulgasaun hosi PR, maibé programa eskola ba uma ne’e lao tiha ona. Agora daudaun Ministériu Edukasaun prodús ona matéria aula distánsia hamutuk episode 200-resin ona.

Programa eskola ba uma ne’ebé lao ona durante tinan ida ne’e, tuir Armindo Maia, maske la másimu, maibé maneira ida-ne’e mak MEJD bele implementa  atu apoiu estudante-sira bele akompaña iha ida-idak ninia uma durante situasaun pandemia COVID-19.

Jornalista       : Tomé Amado

Editór             : Francisco Simões      

HAKEREK NO HATÁN

Please enter your comment!
Please enter your name here