Diretora Programa Nasionál Dezenvolvimentu Suku (PNDS), Claudina Soares Pinto. Imajen TATOLI/Osória Marques.

DILI, 23 juñu 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten ekipa PNDS sei dezloka no halo sensibilizaun programa “Uma Kbiit Laek” ba komunidade iha RAEOA hafoin ekipa simu vasina AstraZeneca doze daruak

Notísia Relevante: MAE seidauk identifika benefisiáriu “Uma Kbiit Laek” iha RAEOA

Claudina Soares Pinto hateten, durante ne’e Governu liuhosi ekipa PNDS halo ona sensibilizasaun programa “Uma Kbiit Laek” ba komunidade iha territóriu nasionál no halo ona lansamentu primeira pedra ba konstrusaun “Uma Kbiit Laek” iha munisípiu Liquiça no munisípiu seluk, maibé RAEOA mak seidauk bele halo sensibilizaun tanba serka sanitaria no konfinamentu obrigatóriu.

“Loos duni! Konfinamentu obrigatóriu iha Dili hakotu ona maibé RAEOA iha regra ketak ne’ebé antes ne’e ita konfirma no informasaun ne’ebé ami hetan hosi Prezidente Autoridade RAEOA katak bainhira vasina kompleta ona mak halo viajen ba iha ne’ebá para livre halo movimentasaun. Maibé, bainhira ita hakarak ba mak tama kuarentena mak ami sei la atinje ami-nia objetivu, nune’e ami hein vasina AstraZeneca doze daruak nian ramata ona ma kami dezloka ba RAEOA hodi halo sensibilizasaun,” Diretora PNDS ne’e hateten ba Agénsia TATOLI liuhusi telefónika, kuarta ne’e.

Tuir nia, iha fulan oin (jullu) ekipa PNDS bele kompleta ona vasina doze daruak no sei halo kedas movimentasaun ba RAEOA hodi realiza atividade no programa PNDS nian liu-liu kona-ba konstrusaun “Uma Kbiit Laek”.

Notísia Relevante: Semana oin, Governu sensibiliza programa konstrusaun “Uma Kbiit Laek” ba komunidade

“Ekipa PNDS sei aranka dala ida. Tanba, iha RAEOA ne’e kompostu hosi suku 18 de’it, entaun ha’u hanoin semana ida nia-laran ami bele konklui no bele hetan benefisiáriu ba Uma Kbiit Laek,” nia dehan

Nia informa, benefisiáriu ba “Uma Kbiit Laek” iha RAEOA ne’e hamutuk 36 tanba iha RAEOA ne’e aldeia ida sei foti benefisiáriu rua (2) de’it.

“Razaun, tanba programa ne’e hanesan fundamentál ida-ne’ebé inísiu la’ós PNDS mak deside maibé parte ministériu relevante avansa ho ‘Uma Kbiit Laek’ rua ba Rejiaun Administrativa Espesiál Oé-Cusse Ambeno (RAEOA),” nia dehan.

Notísia Relevante: Governu lansa primeira pedra ba konstrusaun “Uma Kbiit Laek” iha Liquiça

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here