Uma Kbiit-Laek. Imajen/Espesiál

DILI, 05 juñu 2021 (TATOLI)—VIII Governu Konstitusionál liuhosi Ministériu Administrasaun Estatál (MAE), sesta ne’e lansa ona primeira pedra ba servisu konstrusaun “Uma Kbiit Laek” ba benefisiáriu tolu (3) iha Suku Maubara Lisa, Munisípiu Liquiça.

Notísia Relevante: Implementasaun konstrusaun “Uma Kbiit Laek” ho pakote millaun $34

Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres, hateten lansamentu primeira pedra ne’e hanesan loke dalan ona ba konstrusaun Uma Kbiit Laek iha territóriu nasionál no aban bainrua munisípiu seluk bele halo konstrusaun tanba osan transfere nanis ona ba munisípiu ida-idak.

“Primeira pedra ne’e signifika ita loke dalan ona ba konstrusaun Uma Kbiit Laek iha territóriu nasionál hotu-hotu, tanba ita uza ita-nia Orsamentu Jerál Estadu (OJE) 2021 no osan hirak ne’e alokadu hotu ona, hein ezekuta no konstrui de’it ona Uma Kbiit Laek ne’e iha kada munisípiu,” Rosito Guterres hateten ba Agência Tatoli liuhosi WhatsApp, sesta ne’e.

Tuir nia, programa Uma Kbiit Laek ne’e tama ona faze preparasaun ba konstrusaun entaun ho lansamentu primeira pedra ne’e mak munisípiu ida-idak sei hahú ona halo konstrusaun tanba iha kada munisípiu iha nia ekipa tékniku rasik.

“Konstrusaun tuir ami-nia estimativa ne’e totalmente iha territóriu Timor-Leste atu book fíziku ne’e iha fulan jullu maibé fazeadamente. Maibé, ida-ne’ebé mak hahú ne’e la’o daudun ona tanba dezenvolvimentu labele hein malu no osan iha ona ida-idak nia konta bankária ona,” nia esklarese.

Iha Munisípiu Liquiça ne’e, ba programa harii Uma Kbiit Laek ba tinan 2021 ne’e hetan alokasaun orsamentu hamutuk tokon $1.2 no hosi totál ne’e atu finansia ba atividade fíziku hamutuk tokon $1.2 ba suku 23 no operasionál $69,000.

Públiku persiza hatene katak prinsípiu no obejtivu orientadu hosi prosesu implementasaun kontrusaun Uma Kbiit Laek ba ema kbiit laek ne’e mak redusaun probreza, sustentabilidade, bazea ba proposta komunidade liuhosi diskusaun komunidade sira para deside no orientadu ba igualidade jéneru no inkluzaun.

“Iha programa VIII Governu nia komitmentu katak atu garante moris di’ak, seguru no dignu ba ema hotu nia moris no ema hotu iha oportunidade atu hetan rai no uma ne’ebé seguru no dignu,” nia dehan.

Iha atividade lansamentu primeira pedra ba konstrusaun Uma Kbiit Laek ne’e realiza hamutuk ho atividade konstrusaun sistema drainajen, reabilitasaun no extensaun sede suku kompleta ho prototipu elementu asebilidade ba ema ho defisiénsia sira hosi programa fundu reziliénsia ne’ebé implementa liuhosi programa nasionál deenvolvimentu suku ba tinan 2021.

Notísia Relevante: Fasilitadór “Uma Kbiit Laek” 198 sei tuir formasaun iha munisípiu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here