Ministru Administrasaun Estatal, Miguel Perreira de Carvalho. Imajen/Mídia PR.

DILI, 12 maiu 2021 (TATOLI)—Ministériu Administrasaun Estatál (MAE) seidauk bele ba Rejiaun Administrativa Espesiál Oé-Cusse Ambeno (RAEOA) hodi identifika benefisáriu ba Uma Kbiit Laek (UKL) tanba serka sanitária no konfinamentu obrigatóriu la permite ekipa téknika sira atu halo servisu, maibé munisípiu 12 seluk finaliza ona.

Notísia Relevante: COVID-19 impede prosesu konstrusaun “Uma Kbiit Laek”

“Agora RAEOA seidauk bele ba identifika lista benefisiáriu ba Uma Kbiit Laek sira tanba situasaun serka sanitária, estadu emerjénsia la permite ekipa téknika sira atu halo servisu,” Ministru Administrasaun Estatal, Miguel Perreira de Carvalho, hateten ba jornalista sira hafoin hala’o enkontru ho Prezidente Repúblika, Francisco Guterres Lú Olo, iha rezidénsia Prezidente Repúblika, Faról, Dili, kuarta.

Totál benefisiáriu ba Uma Kbiit Laek ne’e liu 1000-resin no osan ne’ebé aloka ba Uma Kbiit Laek ne’e millaun $25. Hosi osan ne’e, kada uma ho kustu kuaze rihun $15 ba kuartu rua no kuartu tolu ho kustu kuaze rihun $17.

Tinan ida-ne’e, Ministériu Administrasaun Estatál (MAE) liuhosi Sekretáriadu Tékniku Programa Nasionál Dezenvolvimentu Suku (PNDS) sei konstrui uma 1.272 ba ema kbiit laek sira iha territóriu Nasionál.

“Benefisiáriu hosi munisípiu hotu-hotu ami identifika ona. Só falta de’it mak RAEOA maibé munisípiu 12 seluk benefisiáriu sira ami hetan hotu ona,” nia hateten.

Akordu implementasaun Uma Kbiit Laek ba ema kbiit laek sira ne’e, Xefe Suku sira ko’alia ona ho benefisiáriu sira. Agora, falta de’it PNDS iha fulan-juñu nia laran, to’o agora osan mós transfere ba iha konta suku sira, tantu iha jullu ne’e nia-laran bele hahú ona prosesu atu halo konstrusaun ba Uma Kbiit Laek.

Antes ne’e, Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto hatete atu konstrui Uma Kbiit Laek ne’e PNDS mós simu lista sobrevivente sira hosi Centro Nacional Chega (CNC) hamutuk ema na’in-70.

“Atu konstrui uma kbiit laek ba ema kbiit laek sira iha teritóriu laran tomak. Programa Nasionál Dezenvolvimentu Suku (PNDS) mós simu lista hosi Centro Nacional Chega (CNC) besik ema na’in-70, ne’ebé tama iha kbiit laek nian ne’ebé identifika hetan violasaun iha tempu pasadu nian,” Claudina Soares Pinto hateten.

Notísia Relevante: Trimestre dahuluk, MAE konstrui “Uma Kbiit Laek” ba ema kbiit laek

jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here