Diretór Sentru Nasionál Formasaun Profesionál Becora, Lourenço da Silva Gusmão.Imajen/Tome Amado.

DILI, 11 juñu 2021 (TATOLI)—Sentru Nasionál Formasaun Profissional (CNFP, sigla portugés) Becora durante tinan 2021 ne’e sei fó prioridade ba ba formasaun téknika profisionál, boa governasaun ne’ebé konsentra ba asuntu abordajen integradu jéneru no programa kolleta reseita.

Notísia Relevante: 2021, formandu 393 tuir formasaun iha CNFP Becora

“Ami fó prioridade ba programa kona-ba Formasaun Téknika Profesionál ba sertifikadu nível I, II no III, iha Sentru Nasionál Formasaun Profissional Becora no Sentru Formasaun Beaço ho totál formandu na’in-384, programa boa governasaun konaba asuntu abordajen integradu jéneru, implementa atividade diseminasaun igualidade jéneru ba funsionáriu no formandu sira ho totál partisipantes na’in-200,” Diretór Sentru Nasionál Formasaun Profissional (CNFP, sigla portugés) Becora, Lourenço da Silva Gusmão, hateten ba Agência Tatoli, liuhosi telefónika, sesta ne’e.

Nia hatutan, aleinde bosi programa rua ne’e, iha programa ikus mak kolleta reseita hosi bens sira-ne’ebé prodús hosi rezultadu prátika formasaun nian, hodi kontribui ba kofre Estadu ho montante $10.000

Hosi programa kolleta reseita kontribui ba kofre Estadu ne’e halibur hosi área formasaun sira hanesan área soldadura, refrigerasaun, pedreiru, panifikasaun (halo dose), mekanika motos, informátika (IT), eletrisidade, kustura, karpintaria no kanalizasaun.

Iha tinan 2021 ne’e formandu joventude sira-ne’ebé tuir formasaun iha CNFP Becora hamutuk 393 ne’ebé kompostu hosi feto na’in-133 no mane na’in-260, maibé atividade ba formasaun durante ne’e la la’o tanba pandemia COVID-19 no serka sanitaria.

Rekursu umanu menus

Entretantu, Diretór Sentru Nasionál Formasaun Profisionál Becora ne’e hateten durante formasaun ne’e hala’o to’o agora difikuldade ne’ebé mak sentru ne’e hasoru mak menus rekursu hamunu liuliu iha formadór sira tanbá formadór sira maioria mai ho esperênsia téknika ka akaba ensinu sekundária de’it.

“Ami hasoru difikuldade mak rekursu umanu, tanbá formadór sira-ne’ebé agora hanorin formandu sira-ne’e maioria hosi esperiénsia téknika de’it. Iha ne’e, maestradu na’in-ida de’it, lisensiadu na’in-10-resin no sira seluk edukasaun sekundária ho esperiénsia téknika de’it,” Lourenço da Silva Gusmão hateten.

Notísia relevante: OJE 2021, CNFP Becora ezekuta ona 28%

Maske nune’e, formandu sira-ne’ebé mak mai tuir formasaun iha sentru formasaun ida-ne’e balun lisensiatura (S1), maestradu (S2), entaun formadór ho edukasaun sekundária ho esperiénsia de’it bele hanorin fali ema sira-ne’e, entaun ida-ne’e mós sai hanesan difukuldade ne’ebé sentru foramasaun ne’e hasoru.

Nia haktuir, iha tinan 2006 ne’e iha juventude ida ho nível maestradu (S2) iha área Informátika Teknóloji (IT) no 2018-2019 maestradu (S2) ida hosi universidade balun iha Dili ne’e mai tuir formasaun ba kursu panifikasaun (halo dose nian).

Planu ba oin, nia parte presiza atu aumenta tan rekursu umanu ka halo tan kapasitasaun ba formadór sira hodi bele sai formadór ne’ebé profisionál, liuhosi haruka sira ba tuir formasaun no hatutan estudu iha universidade hodi sira bele aumenta tan sira-nia kuñesimentu no abilidade.

“Ha’u mai iha ne’e, haruka kolega balun ba tuir estudu iha universidade, agora daudaun ramata ona estudu (S1). Iha área téknika nian na’in-haat (4) no ida (1) foin daudaun iha tinan rua liubá ha’u haruka ba foti tan S2. Sira seluk ha’u fó oportunidade ba sira atu kontinua estudu, maibé depende ba ema ida-idak nia vontade atu aprende,” nia afirma.

Tuir nia, fasilidade sira iha Sentru Nasionál Formasaun Profisionál Becora seidauk kompletu maibé sufisiente atu utiliza hodi fasilita fó formasaun ba joven sira, kompara ho sentru formasaun sira seluk.

“Iha Sentru Formasaun Becora ne’e, iha fasilidade ne’ebé sufisiente para bele fasilita joven sira atu utiliza ba hasae sirania kapasidade ba abilidade nian,” nia dehan.

Iha Sentru Nasionál Formasaun Profisionál (CNFP, sigla portugés) Becora ne’e iha funsionáriu hamutuk 62, ne’ebé kompostu hosi funsionáriu kontratadu no permanente, inklui funsionáriu iha Sentru Formasaun Profisionál Beaço-Viqueque.

Suspende formasaun iha Beaço

Iha ámbitu pandemia COVID-19 no implementasaun serka sanitária no konfinamentu obrigatóriu ne’e, Sentru Nasionál Formasaun Profisionál (CNFP, sigla portugés) Becora suspende hela formasaun ba juventude sira-ne’ebé sei tuir formasaun iha Sentru Formasaun Profisionál Beaço, Viqueque.

“Sentru formasaun ida-ne’e nia ramu ida Beaço-Viqueque. Tanba pandemia COVID-19, ami suspende formasaun ba formandu sira. Bainhira serka sanitária ramata no munisípiu sira bele la’o ba malu, ami loke fali formasaun,” nia dehan.

Sentru formasaun Beaço, Viqueque, estabelese iha tinan 2017 no formandu ne’ebé tuir formasaun hosi tinan 2017 hamutuk na’in-22 kompostu hosi feto na’in-neen (6) no mane na’in-16, no iha tinan 2019, formandu hamutuk 49 kompostu hosi feto na’in-13 no mane na’in-36.

Formandu sira tuir formasaun iha área karpintaria, soldadura, eletrisidade, hidraulika no pedreiru. Totál funsionáriu kontratadu na’in-ualu (8) mak daudaun ne’e servisu iha Sentru Formasaun Beaço, Viqueque ni’an.

Notísia relevante: CNFP kansela projetu kontrusaun dormitóriu Sentru Formasaun iha Beaço

Jornalista: Nelia Fernandes

Editór: Cancio Ximenes

 

HAKEREK NO HATÁN

Please enter your comment!
Please enter your name here