Diretór Sentru Nasionál Formasaun Profesionál Becora, Lourenço da Silva Gusmão.Imajen/Tome Amado.

DILI, 14 novembru 2020 (TATOLI)—Diretór Sentru Nasionál Formasaun Profisionál (CNFP-sigla Portugeza), Lourenço da Silva Gusmão, informa ninia parte kansela ona planu konstrusaun dormitóriu no moru Sentru Formasaun Beaço, munisípiu Viqueque tanba proposta orsamentu ba obra ne’e la hetan aprovasaun husi Komisaun Revizaun Orsametu Polítika (KROP).

CNFP propoin millaun $1 ba  Orsamentu Jerál Estadu 2021, maibé KROP la aprova hodi redúz ba rihun $75.

“Iha ita-nia proposta ne’e ami propoin orsamentu ba konstrusaun Sentru Beaço purvolta millaun $1 atu harii dormitóriu ida inklui moru iha Sentru Formasaun Beaço.  Orsamamentu ne’e ami kálkula purvolta rihun $500 maibé kuandu aprezenta ba Komisaun Revizaun Orsamentu Polítika  ko’a hotu kedas, hela de’it rihun $75, entaun ami tenke kansela projetu ne’e,” nia dehan ba Tatoli, iha ninia servisu fatin, sesta (13/11).

Sentru Formasaun Beaço harii ona iha loron 17 fulan-agostu 2017 ho kursu lima mak karpintária, eletrisidade, kanalizasaun, pedreiru no soldadura, no daudaun ne’e iha estudante hamutuk 75.

Nia hateten husi kursu lima ne’e soldadura no kanalizasaun iha formadór na’in rua, enkuantu eletrisidade, pedreiru no karpitária iha formadór na’in ida.

“CNFP planeia harii dormitóriu  para bele faslita estudante sira ne’ebé maihusi Uatulari, Uatucarabau, Dilór no Viqueque Vila inklui Ossu atubele hela hodi hala’o sira-nia formasaun iha sentru ne’e, maibé tanba osan la to’o 2021 CNFP labele halo buat ida,” nia tenik tan.

Tuir nia, Sentru Formasaun Beaço hanesan patrimóniu Estadu nian tanba ne’e, persiza kria kondisaun ba estudante no formadór sira.

Ba tinan oin sei halo de’it reabilitasaun ki’ik sira hanesan hadi’a odamatan, janela no zingu ka kalén sira ne’ebé maka ko’ak ona.

Jornalista : Tomé Amado   

Editór:Agapito dos Santos

HAKEREK NO HATÁN

Please enter your comment!
Please enter your name here