Edifísiu Sentru Nasionál Formasaun Profisionál (CNFP, sigla portugés) Becora. Imajen TATOLI/Nelia Fernandes.

DILI, 10 juñu 2021 (TATOLI)–Diretór Sentru Nasionál Formasaun Profisionál (CNFP, sigla portugés) Becora, Lourenço da Silva Gusmão, informa iha tinan 2021 ne’e formandu joven sira-ne’ebé tuir formasaun iha CNFP hamutuk 393 ne’ebé kompostu hosi feto 133 no mane 260.

Notísia Relevante: CNFP Becora ezekuta OJE 2021 atinje 25%

“Iha tinan 2021 ne’e, formandu joven sira-ne’ebé tuir formasaun iha sentru formasaun ida-ne’e totál hamutuk 393, ne’ebé kompostu hosi feto na’in-133 no mane na’in-260,” Lourenço da Silva Gusmão hateten ba Agência Tatoli, iha nia knaar fatin, Becora, Díli, kinta ne’e.

Hosi totál formandu hamutuk 393 ne’e, nia dehan, atividade formasaun durante ne’e paradu hela tanbá pandemia COVID-19 ne’ebé Governu implementa serka sanitária no konfinamentu obrigatóriu.  

Formandu hirak ne’e, tuir formasaun iha área 10 mak hanesan kanalizasaun, karpintaria, kustura, eletrisidade, informátika, mekanika motos, panifikasaun (halo dose), pedreiru, refrigerasaun no soldadura.

Aleinde ne’e, nia informa, formandu sira-ne’ebé tuir formasaun iha CNFP ne’e mai hosi komunidade jerál, Fanlintil-Forsa Defesa De Timor-Leste (F-FDTL), Polísia Nasionál Timor-Leste (PNTL), universitáriu sira inklui Funsionáriu Públiku.

Tuir nia, formandu sira-ne’ebé hahú tuir formasaun hosi faze emerjénsia 2001 to’o mai iha 2019 ne’e hamutuk 4.115 (feto 1.997 no mane 2.118), to’o oras ne’e 60% mak hetan ona servisu iha rai-laran no rai-li’ur.

Diretór Sentru Nasionál Formasaun Profisionál (CNFP, sigla portugés) Becora, Lourenço da Silva Gusmão. Imajen TATOLI/Nelia Fernandes.

“Servisu iha rai laran hanesan, servisu iha Alfaiate, Kompañia, Seguransa Sivíl, Formadór, Loja, Profesora, Banco, Hospital Nasionál Guido Valadares (HNGV), funsionáriu iha ONG, funsionáriu iha Sentru Nasionál Formasaun Profisionál (CNFP) Becora, FanlintilForsa Defeza  Timor-Leste (F-FDTL), Polísia Nasionál Timor-Leste (PNTL). No, balun servisu iha rai-li’ur ne’e hanesan servisu iha Korea, England no Austrália,” nia informa.

Sentru Nasionál Formasaun Profisionál Becora estabelese iha 2001 iha faze emerjênsia ne’e totál formandu ne’ebé tuir formasaun hamutuk 55 mesak mane de’it. Hafoin, hahú fali siklu dahuluk iha 2002, iha tempu Restaurasaun Independênsia TimorLeste, iha momentu ne’ebá sentru ne’e hahú ninia programa fó formasaun ba joven sira.

Iha siklu dahuluk hahú iha 2002, hanesan foin hahú, entaun partisipante ladun barak, hamutuk na’in-75 (feto 26 no mane 49), no iha siklu daruak husi 2003 to’o 2004, formandu sira hahú aumenta barak ona ho totál hamutuk 226 (mane 77 no feto 149).

Iha siklu datoluk iha 2004, formandu sira aumenta ba 235 (mane 105 no feto 130) no iha siklu dahaat tinan 2004-2005 ne’e formandu sira-ne’ebé tuir formasaun hamutuk 199 (mane 103 no feto), no iha siklu dalimak hosi 2005-2006, formandu sira-ne’ebé tuir formasaun hamutuk 211 (feto 98 no mane 113).

Iha siklu daneen hosi 2006-2007, formandu sira-ne’ebé tuir formasaun ne’e hamutuk 148 (feto 75 no mane 73) no iha siklu dahitu hosi 2007 ne’e formandu sira hamutuk 134 (feto 63 no mane 71).

Iha siklu ualu tinan 2008, formandu sira komesa aumenta ba 136 (feto 71 no mane 65) no iha siklu dasiak iha 2008-2009, formandu sira hamutuk 108 (feto 67 no mane 41). Iha siklu 10 tinan 2009, formandu sira hamutuk 111 (feto 59 no mane 52) no siklu 11 iha tinan 2010, formandu sira hamutuk 186, (mane 100 no feto 86).

Iha siklu 12 tinan 2010, formandu sira hamutuk 147 (feto 77 no mane 70) no siklu 13 iha 2011 ne’e formandu sira hamutuk 162 (feto 88 no mane 74). Iha siklu 14 tinan 2011, formandu sira hamutuk 112 (feto 66 no mane 46) no siklu 15 tinan 2012 ne’e formandu sira hamutuk 181 (feto 99 no mane 82).

Iha siklu 16 tinan 2012, formandu sira hamutuk 191 (97 no mane 94) no siklu 17 iha 2013 ne’e formandu sira hamutuk 230 (feto 105 no mane 125). Iha siklu 18 tinan 2014, formandu sira hamutuk 175 (feto 84 no mane 91) no siklu 19 tinan 2014-2015 ne’e formandu sira hamutuk 114 (feto 59 no mane 55).

Iha siklu 20 tinan 2015, formandu sira hamutuk 237 (feto 79 no mane 158) no siklu 21 iha 2016 ne’e formandu sira hamutuk 276 (feto 116 no mane 160). Iha siklu 22 tinan 2017, formandu sira hamutuk 272 (feto 116 no mane 156) no iha siklu 23 iha tinan 2019 ne’e formandu sira hamutuk 194 (feto 91 no mane 103).

Totál formandu hosi faze emerjénsia iha 2001 no to’o siklu 23 iha 2019 ne’e, formandu sira-ne’ebé tuir formasaum hamutuk 4.115 (feto 1.997 no mane 2.118).

“Iha 2020 ne’e formasaun la la’o tanbá laiha orsamentu ba kursu. Depois 2021 ba siklu 24, formasaun kontinua la’o ho partisipante ba formasaun hamutuk 393 (feto 133 no mane 260).

Área Formasaun

Diretór ne’e informa, hosi faze emerjénsia iha tinan 2001 to’o siklu dasia iha 2008-2009 ne’e, área formasaun hamutuk ualu (8) mak hanesan karpintária, kustura indust, eletrisidade, hidraulika, informátika, marcenaria, pedreiru no panifikasaun.

Iha siklu 10 hosi 2009 to’o siklu 18 iha tinan 2014, área formssun hamtuk hamutuk 11 mak hanesan karpintaria, kustura indust, eletrisidade, hidraulika, informátika, marcenaria, pedreiru, panifikasaun, mekanika motos, refrigerasaun no haedware.

Iha siklu 19 tinan 2014-2015 to’o siklu 23 iha tinan 2019, área formasaun hamutuk 13 mak hanesan karpintaria, kustura indust, eletrisidade, hidraulika, informátika, marcenaria, pedreiru, panifikasaun, mekanika motos, refrigerasaun, haedware, soldadura no tijolus kesi.

Notísia Relevante: CNFP Becora prodúz ona formandu joven rihun 4-resin

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here