Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres. Imajen/Espesiál.

DILI, 19 maiu 2021 (TATOLI)—Diretór Jerál Dezenvolvimentu Rurál Ministériu Administrasaun Estatál (DR-MAE), Rosito Guterres, hateten programa implementasaun ba kontrusaun Uma Kbiit Laek (UKL) ba ema kbiit laek sira iha territóriu Timor-Leste tomak ho pakote millaun $34.

Notísia Relevante: Marsu 2021, Governu hahú konstrui uma 1.272 ba kbiit laek

“Osan pakote millaun $34 ne’ebé MAE aloka ba implementasaun konstrusaun Uma Kbiit Laek ne’e, balun utiliza ba sosa ekipamentu konstrusaun, saláriu ba fasilitadór sira no seluk tán. Maibé hosi millaun $34 ne’e, osan millaun $25 ne’e konsidera ba konstrusaun Uma Kbiit Laek nian de’it,” Diretór Jerál haktuir ba TATOLI, iha nia knaar fatin Colmera, Dili tersa ne’e.

Hosi pakote millaun $34 ne’e, nia dehan, seidauk utiliza hotu tanba Rejiaun Administrativa Espesiál Oé-Cusse Ambeno (RAEOA) sei adi’a formasaun ba fasilitadór sira tanba iha RAEOA sei aplika hela serka sanitária.

“Atividade formasaun ba fasilitadór sira ba RAEOA nian labele hala’o tanba serka sanitaria hela. Maibé, bainhira serka sanitária ramata mak ekipa bele aranka ba RAEOA hodi fó formasaun inklui konstrusaun Uma Kbiit Laek ne’e,” nia dehan.

Notísia Relevante: Trimestre dahuluk, MAE konstrui “Uma Kbiit Laek” ba ema kbiit laek

Tuir nia, la’ós labele ba maibé tuir regra ne’ebé Governu deside katak tenke tuir teste swab bainhira dezloka ba munisípiu, no bainhira to’o iha ne’ebá tenke kumpre kuarentena loron 14 ne’e mak ekipa seidauk bele ba RAEOA.

“Ami deside, serka sanitária ramata mak ami ba hala’o atividade formasaun. Maibé, munisípiu seluk kontinua la’o tuir kalendáriu ne’ebé ita trasa ona,” nia hateten.

Diretór ne’e garante katak, atividade vormasaun ba fasilitadór sira iha RAEOA ne’e sei sei realiza iha fulan-jullu maibé depende ba desizaun hosi Estadu no Governu.

Notísia Relevante: MAE seidauk identifika benefisiáriu “Uma Kbiit Laek” iha RAEOA

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here