Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 23 abríl 2021 (TATOLI)—Ministériu Administrasaun Estatal (MAE) iha trimestre dahuluk transfere osan ba suku sira konstrui “Uma Kbiit Laek” ba ema kbiit laek sira iha territóriu nasionál.

Notísia Relevante: Marsu 2021, Governu hahú konstrui uma 1.272 ba kbiit laek

“Ezekusaun orsamentu hosi Ministériu Administrasaun Estatál nian sa’e ona 47% hosi totál orsamentu millaun $49, despeza barak liu ba transfere osan ba suku sira atubele halo Uma Kbiit Laek liu rihun-ida no agora daudaun la’o hela,” Ministru Administrasaun Estatal (MAE), Miguel Pereira de Carvalho, informa ba jornalista sira iha resintu Parlamentu Nasionál, sesta ne’e.

Transferénsia osan ne’e, nia dehan, ba suku sira liuhosi Planu Nasionál Dezenvolvimentu Suku (PNDS) iha territóriu nasionál. Trimestre dahuluk ne’e, sura hosi fulan-janeiru, fevereiru no marsu.

Governante ne’e fó-sai katak, hahú hosi marsu 2021 konstrui uma hamutuk 1.272 ba kbiit laek sira korresponde millaun $25.

Nia akresenta, dezafiu ne’ebé ministériu hasoru mak kestaun serka sanitária no konfinamentu obrigatóriu, tanba difikulta funsionáriu nasionál no funsionáriu Administrasaun Munisipál sira labele halo movimentu barak demais.

MAE iha OJE 2021 hetan millaun $53 inklui STAE millaun $2,476, Arkivu no Muzeu Rezisténsia Timorense (AMRT) ne’ebé tutela ba MAE ne’e ho orsamentu millaun $3,113.

Ministru Administrasaun Estatál (MAE) mós informa katak iha trimestre daruak, sira kontinua nafatin halo konstrusaun “Uma Kbiit Laek” ba ema kbiit laek sira to’o finaliza.

Notísia Relevante: Proposta orsamentu MAE aprovadu iha espesialidade

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here