Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 13 janeiru 2021 (TATOLI)--Governu liuhosi Ministériu Administrasaun Estatál, Miguel Pereira de Carvalho, informa iha marsu tinan ne’e Governu hahú konstrui uma kbiit laek.

“Governu sei konstrui uma hamutuk 1.272 iha suku sira iha teritórriu laran tomak, enkuantu planu ne’e hahú implementa ona maka halo idetifikasaun ba nesesidade no hahú dezeñu inklui halo ona idetifikasaun ba benefisáriu,” Minsitru Miguel Pereira, hateten hafoin partisipa enkontru Konsellu Ministru iha Pálasiu Governu, kuarta ne’e.

Notísia Relevante: Konstrui “Uma Kbiit Laek”, PNDS simu lista sobrevivente hosi CNC

Governante ne’e hatutan, tuir planu iha marsu 2021 hahú halo ona tranferénsia konta bánkaria ba kada suku atu hahú halo konstrusaun ba uma kbiit laek.

Iha Orsamentu Jerál Estadu (OJE) 2021, Governu liuhosi MAE aloka millaun $25 hodi konstrui uma hamutuk 1.272.

“Ita haree munisípiu ne’ebé barak liu asesu ba uma kbiit laek mak munsípiu Baucau, tanba númeru suku ne’ebé mak barak liu, ne’ebé kada suku sei kontrui uma tolu,” nia akresenta.

Governu mós estabelese ona kritériu ba banefisáriu sira hanesan ema vunerável ka ema ne’ebé kbiit laek duni, idozu ka idoza ona, kondisaun uma rezistente a’at duni no redimentu mínimu, maibé mós tenke iha rai.

“Modelu uma iha rua hanesan modelu ho medida metru kuadradu 38 ho kuartu rua ne’ebé kompleta ho dapur no haris fatin no ida seluk medida metru kuadradu 42 ho kuartu tolu inklui iha dapur no haris fatin ne’ebé sei haree tuir membru família,” nia tenik.

Programa Nasionál Dezenvolvimentu Suku (PNDS) dezeña hotu ona, ne’ebé sei uza materiál konstrusaun hanesan batako, semente, kalen no seluk tan.

Entretantu, Uma ba kbiit laek hanesan porgrama VIII Governu konstitusionál atu fó tratamentu dignu.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Boatarde, Hau hakarak hato’o ba VIII Guverno konstitusional katak:
    Guverno atu halo uma ba kbi’it la’ek sira iha territoriu Timor laran tomak kada suku, Karik iha suku balun ema kbi’it la’ek hamutuk lima nolu (50) resin, Ita bele rezolve oinsa, no sidadaun kada uma kain hotu iha Direito hanesan ka lae.
    Obrigadu ba atensaun.

HAKEREK NO HATÁN

Please enter your comment!
Please enter your name here