Xefe Estadu Maiór Jenerál FALINTIL-Forsa Defeza Timor-Leste (F-FDTL),, Tenente Jenerál Tito da Costa Cristovão ‘Lere Anan Timur’, Imajen/Media F-FDTL..

DILI, 19 maiu 2021(TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, kuarta ne’e informa ba Prezidente Repúblika, Francisco Gueterres Lú Olo, kona-ba rekrutamentu ba F-FDTL no tuir planu iha fulan ne’e sei taka sai lista naran kandidatu sira-nian iha kada munisípiu.

Notísia Relevante: Aplikante Rihun 11 ba Vaga F-FDTL Hatama Ona Formuláriu

“Ohin, hasoru malu ho Prezidente Repúblika, ami ko’alia kona-ba rekrutamentu F-FDTL nian. Ha’u informa katak fulan ne’e nia-laran taka sai ona, sira-nia naran iha munisípiu sira. Naran sira-ne’e la’ós taka iha suku maibé sei taka iha estasaun polisia sira-nian, tanba dala barak ema balun la pasa ne’e lees sai tiha naran sira-ne’e,” Tenente Jenerál Lere Anan Timur hateten ba jornalista sira, iha rezidénsia Prezidente Repúblika, Faról, Dili, kuarta ne’e.

Tanba impase polítika no pandemia COVID-19, Lere Anan Timur hatutan, komisaun organizadora rekrutamentu F-FDTL nian suspende tiha rekrutamentu ba tinan rua (2019-2020), ba aplikante Timor-oan feto no mane sira-ne’ebé konkore ba vaga ne’e.

“Ba aplikante feto no mane iha Timor-Leste ne’ebé hatama formuláriu ne’e rihun 10-resin hodi konkore ba vaga rekrutamentu F-FDTL nian ne’ebé uluk mai ho idade 20, 23, 24 no 25. Sira ne’ebé tinan 25 ne’e, liu tiha ona tinan ida, ita bele dehan skira-ne’e la pasa ona tanba sira katuas ona, tanba de’it sala polítiku sira-nian no impase polítika,” Lere hateten.

Joven ne’ebé mak hatama lista ba tropa ne’e fahe ba grupu tolu mak grupu ida mak veteranu ka jerasaun foun falintil sira-nia oan, rua mak grupu joven Timor-oan no grupu tolu mak grupu tékniku sira hanesan mekanista, enjineiru, agrikultór sira no seluk tan.

“Grupu tolu ne’e mak fleksibiliza tanba ita hakarak ita-nia forsa ne’e tenke joven. Maibé veteranu nia oan ne’e ami sei halo diskute, tanba ita hatene sira hakarak la’o tuir nia aman nia ain-fatin maibé sei haree mós ba idade. Karik, veteranu nia oan mak balun tinan 25 ka 26 ita tau no bele avansa uitoan maibé tenke saúde di’ak. Maibé ida-ne’e mós kestaun mais tékniku”, nia hateten.

Notísia Relevante: Governu Aprova Rekrutamentu Soldadu F-FDTL Na’in-600 ba Tinan Oin

Kritériu seluk, nia dehan, ba feto sira tenke solteira no tenke iha sinseriedade tanba aban bainrua bainhira sira tama inkorporasaun mak foin ema hatene forsa ne’e oan-na’in no kaben-na’in, to’o ikus tenke sai.

Aleinde ne’e, iha kritériu ida kona-ba inan-aman forsa foun nian tenke hela iha Timor-Leste la’os hela fali iha rai-seluk. Bainhira kandidatu ida mak la ko’alia loloos mak tama tiha inkorpora, mak to’o ikus ema hatene sira-nia inan-aman hela iha rai-seluk mak nia tenke sai.

“Hanesan uluk ha’u dehan militár ne’e oin seluk la hanesan Ministru, Sekretáriu Estadu, funsionáriu ida, maibé militár ne’e hanesan ema nasionalista no patriota mak tama ne’ebá. Tanba, nia prontu fó nia vida ba nasaun. Ia tenke tau melhores filhos tanba fó sira-nia aan ba mate,” nia esplika.

Entretantu, iha enkontru ho Prezidente repúblika ne’e, Tenente Jenerál Lere Anan Timur mós informa kona-ba konstrusaun portu naval Hera, tanba Austrália oferese nia ró ba Timor-Leste no Timor mak sai na’in ne’e, presiza fatin portu di’ak ida-ne’e mak sai problema.

“Ita tenke hadi’a lalais kondisaun portu naval Hera ne’e. Ba konstrusaun portu naval hera ne’e, iha projetu tolu, ida mak ró para ba ne’e, ida mak bolu kebra mar, ita tenke halo moru iha tasi laran para haleu, nune’e ita-nia ró iha kuartu laran, no ida seluk mak mota tanba iha ne’ebá mota rua mak hasoru malu iha baze entaun tenke dezafia mota ne’e,” Lere informa.

Lere Anan Timur subliña, hosi projetu ne’e dala ruma nia kustu boot maibé iha nia vantajén uitoan mak konstrusaun portu naval Hera ne’e nia folin no servisu ne’ebé boot liu fali, entaun tenke gasta osan boot no presiza halo di’ak para ró bele para-netik hodi fó seguransa.  

“Projetu ne’ebá ne’e tenke halo di’ak. Labele halo fali bloku ABC tanba bainhira ita halo tiha bloku A depois halo bloku B, haree ba bloku A komesa aat ona. Tanba ne’e, ha’u hakarak halo dala ida de’it ho bloku ida para gasta osan dala ida,” Lere hateten.

Notísia Relevante: MD Prevee OJE 2020 Ba Konstrusaun Portu Naval Hera

Jornalista: Osória Marques

Editór: Cancio Ximenes

5 KOMENTÁRIU

  1. Boanoite relasiona ho naran kandidatu sira ne’ebé atu taka sai ne’e, katak hau nu’udar Veteranus nia oan nia oan ida atu komfirma de’it katak, bazeia ba Tinan ne’ebé Liu ona 25 ou26 ne oinsa? Se tuir lolos ne’e, se la krize polítika karik oras ne’e ita bele dehan realiza tia ona, tamba ne’e, hau husu ba komisaun rekrutamentu F-FDTL nian hau nu’udar Veteranus nian oan prontu atu servi ba hau rai doben Timor-Leste e no hau hakarak tebes sai lutu ba hau nia nasaun ida ne’e, dala ida tan hau hakarak kontinua hau nia aman nia luta ida ne’bé mak husik hela mai hau nu’udar jerasaun foun ida ne’e obrigado🙏.

  2. Bnt! Hau atu declara Katak prontu atu sai hanesan lutu ba nasaun no Povo…no prontu tebes ho hau nia Kondisaun Fisiku, Mental no Kapasidade. I hau nia Begraund S1. Hau husu krk iha Fatin hau hkrk kontribui no Tama Iha Instituisaun F.FDTL ..no 76683182

  3. hau mos hanesan veteranus nia oan,hau hakarak profundo soberania husi familias.nb fakar ran ba rai ida nee,no.hau aman rasik veterano ida nebe ulk kontribui tebes ba rai.ida.nee..ho kodigu NELFRE.hau oan jda hakrak tebes sai jerasaun foun falintil nia i mos sai .lutu ba hau rain doben da.nee..hau hakarak tebes atu serviba Nasaun TIMOR LESTE.hau husi komisaun bele hare didiak hau nia documentu,hau tekniku sivil ,bele mos.mekaniko,

  4. Hau nundar ema veteranos frente
    Klaretina nia oan No hau nia inan ho
    Aman mak halo Abrigo ba comando
    Falintil regiao4 nian Subar fatin durante e
    Tempu Luta ba ukun rasik ba Rai doben Timor Leste
    Hau hakrak prontu servi ba nasaun No Povo
    Timor leste
    Hau husu karik iha fatin No fo kontrubui hau bele me tama Ba intitusaun FFDTL
    75527324

HAKEREK NO HATÁN

Please enter your comment!
Please enter your name here