Ministru Defeza no Seguransa, Filomeno da Paixão de Jesus

DILI (TATOLI)—Ministru Defeza (MD), Filomeno da Paixão de Jesus, hateten sira sei prevé orsamentu jerál Estadu (OJE) 2020 ba konstrusaun Portu Naval Hera ne’ebé antes ne’e konstrui ona maibé monu.

“Ami sei prevé. Ha’u haruka atu hatama mós ba iha OJE 2020 para bele halo portu foun hodi fasilita ró Navál,” governante ne’e ba jornalista sira iha Palásiu Prezidente Nicolau Lobato, Bairru Pité, tersa (9/10).

Filomeno informa katak montante orsamentu ba konstrusaun portu refere sira seidauk koloka tanba oras ne’e sira sei estuda hela ba iha TOR (Term of Reference), ninia espesifikasaun nomós ninia dezeñu.

“Tinan oin maka ami hateten konkretamente ba públiku no tinan oin nia rohan (2019) ami sei hatama ba iha OJE 2020 nune’e bele hahú konstrusaun,” nia esplika.

Eis Vise Xefe Estadu Maior Jenerál afirma katak Governu sei fó ba kompaña seluk atu konstroi portu ne’e liuhusi tenderizasaun.

Antes ne’e, Kompaña ida hosi Austrália ho naran Lifese Engeneering maka manán tender hodi harii portu refere ho kustu miloens $7 maibé monu hakdasak no to’o ohin loron seidauk iha  portu ba Komponente Naval F-FDTL.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here