MAE hamutuk ho Vise Primeiru-Ministru no Ministru Planu no Ordenamentu José Maria dos Reis halo vizita ofisiál no distribui nesesidade bázika ba vítima dezastre naturál iha sentru evakuasaun Grupu II João Paulo II Tasi-Tolu, Dili. Imajen/Mídia MAE.

DILI, 18 maiu 2021 (TATOLI)—Governu liuhosi Ministériu Administrasaun Estatál (MAE) hamutuk ho liña interministeriál halo intervensaun no finaliza ona distribuisaun apoiu umanitáriu hanesan ai-han no la’ós ai-han ba família afetadu dezastre naturál hamutuk 33.375 iha territóriu nasionál.

Notisia Relevante: Família afetadu 33.177 iha territóriu, 50% simu ona apoiu emerjénsia

“Ami intreministeriál ho Organizasaun Internasionál, Crus Vermelha Timor-Leste (CVTL) fó ona apoiu hodi distribui ai-han no la’ós ai-han ba família afetadu dezastre naturál ba dadus ne’ebé mak ami identifika ona hamutuk 33.375. La’ós de’it Governu mak fó apoiu maibé ita-nia komunidade ne’ebé hela iha rai-li’ur inklui Organizasaun Naun Govermentál (ONG) lokál no internasionál,” Vise-Ministru Administrasaun Estatál, Lino de Jesus Torrezão hateten ba Agência TATOLI, iha nia knaar fatin, Colmera, Dili, tersa ne’e.

Komunidade timor-oan iha rai-liur no ONG nasional-internasionál sira la’os fó apoiu umanitáriu ne’e direta ba vítima dezastre naturál sira maibé kolabora ho Sekretáriu Estadu Protesaun Sivíl (SEPS) mak halo distribuisaun ba afetadu sira.

Hosi totál família afetadu dezastre naturál 33.375 ne’e, nia hateten, Governu distribui hotu ona ai-han no la’os ai-han ne’e ba afetadu nível nasionál, no la’ós ai-han ne’e identifika ema ne’ebé mak bele simu mak fahe no la’ós fahe hotu ba família afetadu sira.

Tanba, tuir nia, afetadu balun presiza de’it mak hahan loron-loron nian, tanba ne’e autoridade lokál sira identifika prioridade duni mak parte relevante distribui tanba uitoan ka barak ne’e família afetadu sira hetan hotu ona.

Ba família ne’ebé kontinua halerik ba hahan, Vise-Ministru ne’e hateten, presiza autoridade lokál sira-nia aproximasaun no identifikasaun ba ema ne’ebé kbiit laek, tanba maske Governu distribui hotu ona maibé Governu mós presiza lista ida hosi autoridade lokál para Governu bele hatene no distribui ai-han ba sira.

“Maske Governu fahe hotu ona apoiu ne’e maibé presiza ita-nia autoridade lokál sira nia identifikasaun mak ita haruka tuir foos ba sira. To’o agora ami nafatin fahe foos ba suku ne’ebé ninia komunidade presiza duni,” nia dehan.

Entretantu, Vise-Ministru ne’e informa, daudaun ne’e sentru akollamentu ba refujiadu iha Dili ne’ebé sei ativu hamutuk 14 ne’ebé total ema hamutuk 2.130 ho família uma-kain 423, no ida-ne’ebé mate no lakon nafatin 41.

Sentru akollamentu sira-ne’ebé ativu iha Dili mak Sentru Don Bosco Comoro, EBF 12 Novembru Tasi-Tolu, SMA 4 de Setembru, Asrama Canosiana Hera, Igreja Parókia Hera, Sede Suku Manleuana, Lahane Osidentál, Eskola Primária 05 Comoro, Sentru E.P Saburaka Laran, EBF Metiaut, Eis Restorante Metiaut, Eis Brimob Eskola Tékniku Hera, Sentru akollamentu iha Canosa kotuk, no Igreja Nossa Senhora da Graça.

Entretantu, Diretór Jerál Dezenvolvimentu Rurál Ministériu Administrasaun Estatál (DR-MAE), Rosito Guterres, hateten hosi família afetadu dezastre naturál 33.375 ne’e, munisípiu Dili hamutuk 27.622 no hosi númeru ne’e Postu Administrativu Don Aleixo mak hamutuk 10.686, iha suku Comoro mak iha afetadu 4.587 no aldeia barak liu mak 12 novembru Tasi tolu.

“Dadus ne’ebé ita simu no identifika to’o iha horisehik (segunda, 17/05), mak 33.375 ne’e. Maibé ne’e sei prelimináriu tanba sei iha reklamasaun ne’ebé autoridade lokál sira rekolla iha baze,” nia dehan.

Notísia Relevante: MAE distribui apoiu umanitáriu ba família afetadu 4.400

Família 2.558 hela iha área risku dezastre naturál iha Dili

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here